ភ្នំពេញ៖ ឯកឧត្ដម ឃួង ស្រេង អភិបាលរាជធានីភ្នំពេញបានស្នើឱ្យម្ចាស់បុរី និងខុនដូទាំង អស់នៅក្នុងរាជធានីភ្នំពេញ ផ្តល់ទិន្នន័យពីកាំមេរ៉ាសុវត្ថិភាពជូនសមត្ថកិច្ច ដើម្បីពង្រឹងកិច្ច សហការជាមួយគ្នាឱ្យបានល្អក្នុងការការពារសន្តិសុខ សណ្តាប់ធ្នាប់ ជូនប្រជាពលរដ្ឋឱ្យកាន់ តែប្រសើរ ហើយសមត្ថកិច្ចនឹងរក្សាជាការសម្ងាត់ ដោយមិនអនុញ្ញាតឱ្យយកទិន្នន័យចេញ ពីកាំមេរ៉ាសុវត្ថិភាពទាំងនោះទៅផ្សព្វផ្សាយដោយគ្មានការអនុញ្ញាតឡើយ។
ឯកឧត្ដម ឃួង ស្រេង បានមានប្រសាសន៍ថា ចាប់ពីពេលនេះទៅគ្រប់បូរី និងខុនដូ ទាំងអស់នៅរាជធានីភ្នំពេញ ត្រូវតែបំពាក់កាំមេរ៉ាសុវត្ថិភាព និងមានប្រព័ន្ធសន្តិសុខ សុវត្ថិភាព ដើម្បីធានាភាពកក់ក្តៅជូនប្រជាពលរដ្ឋដែលកំពុងស្នាក់នៅ។
ឯកឧត្ដមបន្តថា ការពង្រឹងកិច្ចសហការរវាងម្ចាស់បូរី ម្ចាស់ខុនដូ និងសមត្ថកិច្ចនេះ គឺដើម្បីអាចរាយការណ៍ឱ្យគ្នាទៅវិញទៅមក នៅពេលមានករណីមិនប្រក្រតីណាមួយកើត ឡើងដែលអាចឱ្យសមត្ថកិច្ចជួយអន្តរាគមន៍ជួយដោះស្រាយបានទាន់ពេលវេលា។ អភិបាល រាជធានីភ្នំពេញបានមានប្រសាសន៍បន្តថា បច្ចុប្បន្ននេះនៅរាជធានីភ្នំពេញ មានសំណង់ បូរីជាច្រើនបានរស់នៅដាច់ដោយឡែក ហើយកន្លែងខ្លះមានភាពស្មុគស្មាញ ងាយកើត ឡើងនូវបទល្មើសនានា ដែលទាមទារឱ្យភាគីទាំង២ មានកិច្ចសហការជាមួយ គ្នាទ្វេដង ដើម្បីបង្កើនភាពកក់ក្តៅជូនដល់ប្រជាពល រដ្ឋដែលរស់នៅក្នុងបូរីនោះ។
ឯកឧត្ដមនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការដ្ឋាននគរបាល ជាតិបានស្នើឱ្យម្ចាស់បូរី និងខុនដូ ត្រូវបំពាក់ប្រព័ន្ធការពារសុវត្ថិភាព បន្ថែមទៀត ដូចជាត្រៀមបង្ការពន្លត់អគ្គិភ័យ ឬរថយន្តពន្លត់អគ្គិសភ័យ មានប្រព័ន្ធទូរស័ព្ទ ទាន់ហេតុការណ៍ ២៤ម៉ោងលើ ២៤ម៉ោង មានច្រកចេញចូលត្រឹមត្រូវ ការគ្រប់គ្រងស្ថិតិ ប្រជាពលរដ្ឋត្រូវមានសន្តិសុខយាមកាមជាដើម។ បន្ថែមពីនេះទៀតម្ចាស់បុរីគួរបង្កើតឱ្យមាន បទបញ្ជាផ្ទៃក្នុងនៅក្នុងបុរី បើបុរីរបស់អស់លោកមានសន្តិសុខល្អ នោះមិនខ្វះ អតិថិជន នោះទេ។
សូមបញ្ជាក់ថា បច្ចុប្បន្ននៅរាជធានីភ្នំពេញមានបុរីចំនួន ១៤៩ទីតាំង និងខុនដូចំនួន ១៣៧ទីតាំង៕
#អរគុណសន្តិភាព
