កំពង់ស្ពឺ៖ លោកឧកញ៉ា បណ្ឌិត ទ្រី ភាព ទីប្រឹក្សាផ្ទាល់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអគ្គនាយកក្រុមហ៊ុនទ្រី ភាព គ្រុប និងលោកជំទាវ ព្រមទាំងសហការី និងអាចារ្យ គណៈកម្មការ ពុទ្ធបរិស័ទចំណុះជើងវត្ត និងពុទ្ធបរិស័ទមកពីទីក្រុងភ្នំពេញ មានសទ្ធាជ្រះថ្លា បានផ្តួចផ្តើមធ្វើបុណ្យកឋិនទានសាមគ្គី ដើម្បីវេរប្រគេនព្រះសង្ឃ ដែលគង់ចាំព្រះវស្សាអស់កាលត្រីមាស ក្នុងព័ទ្ធសីមាវត្តហរិរក្សរាជិនី ហៅវត្តវាំងចាស់ ស្ថិតក្នុងឃុំវាំងចាស់ ក្នុងស្រុកឧដុង្គ ខេត្តកំពង់ស្ពឺ ដែលបានប្រព្រឹត្តទៅរយៈពេលពីរថ្ងៃ នាថ្ងៃ១៣-១៤ រោច ខែអស្សុជ ឆ្នាំរជូត ទោស័ក ព.ស.២៥៦៤ ត្រូវនឹង ថ្ងៃព្រហស្បតិ៍ និងថ្ងៃសុក្រ ទី១៥និង១៦ ខែតុលា ឆ្នាំ២០២០ ។
នៅក្នុងឱកាសនោះ ក៏មានការចូលរួម ពីថ្នាក់ដឹកនាំបុគ្គលិកក្រុមហ៊ុនទ្រី ភាព គ្រុប និងពុទ្ធបរិស័ទ ម្ចាស់ដើមទាន ប្រធានដើមបុណ្យ ទាំងមកពីភ្នំពេញ និងចំណុះជើងវត្តយ៉ាងច្រើនកុះករ ក៏បានធ្វើពិធីដង្ហែអង្គកឋិនទានសាមគ្គី ប្រទក្សិណជុំវិញព្រះវិហារទៅតាមគន្លង នៃព្រះពុទ្ធសាសនា ដែល មានតាំងពីយូរលង់ណាស់មកហើយ។
អង្គកឋិនទានទទួលបានបច្ច័យចំនួន ៥៦០០០ (ប្រាំម៉ឺនប្រាំមួយពាន់) ដុល្លារ សម្រាប់កសាង និងផ្គត់ផ្គង់ក្នុងទីអារាមនេះ៕
#អរគុណសន្តិភាព
