តូក្យូ៖ លោកនាយករដ្ឋមន្ត្រីជប៉ុន បានប្រើពាក្យធ្ងន់ៗថា ប្រទេសជាតិកំពុងប្រឈមនឹង “គ្រោះហាយនៈ” កូវីដ-១៩ ដែលធ្វើឱ្យរញ្ជួយសេដ្ឋកិច្ចរបស់ជប៉ុនយ៉ាងធ្ងន់ធ្ងរ។ រដ្ឋាភិបាល ត្រូវប្រញាប់ស្ដារធុរកិច្ច និងបន្ធូរបន្ថយវិធានការគ្រប់គ្រងជំងឺរាតត្បាតយ៉ាងប្រុងប្រយ័ត្ន។
លោក យ៉ូឈិហ៊ីដេ ស៊ូង៉ៈ បានថ្លែងគោលនយោបាយនៅក្នុងសភាកាលពីថ្ងៃទី២៦ តុលា ជាលើកដំបូង បន្ទាប់ពីឡើងគ្រងតំណែងជាមេដឹកនាំប្រទេសជប៉ុន។ ពាក្យថ្លែងការណ៍ ដែលត្រូវបានគេនិយាយដល់ខ្លាំងបំផុតនោះគឺ លោកនាយករដ្ឋមន្ត្រីជប៉ុន បានបញ្ជាក់ថា “ការរាតត្បាតរបស់វីរុសកូរ៉ូណា បានធ្វើឱ្យសេដ្ឋកិច្ចជប៉ុនធ្លាក់ចុះទាបបំផុតក្រោយចប់សង្គ្រាមលោក…ជប៉ុនកំពុងប្រឈមនឹងស្ថានការណ៍វិបត្តិដែលអាចហៅបានថា ជាគ្រោះហាយនៈកម្រិតជាតិ…ខ្ញុំបាទ ក្នុងនាមជាអ្នកដឹកនាំនាវារដ្ឋ បានដឹងយ៉ាងច្បាស់អំពីភាពទទួលខុសត្រូវដ៏ធំធេងនេះ” ។
ការប្រើពាក្យ ដែលបញ្ជាក់ពីភាពធ្ងន់ធ្ងរបែបនេះ បានឆ្លុះបញ្ចាំងឱ្យឃើញថា សេដ្ឋកិច្ចរបស់ប្រទេសជប៉ុន បានរងផលប៉ះពាល់ពីការរាតត្បាតរបស់មេរោគកូវីដយ៉ាងធ្ងន់ធ្ងរ ជាងអ្វីដែលគេមើលឃើញ ដោយសារតែកន្លងមក រដ្ឋបាលបានប្រើថវិកាចំនួនដ៏ច្រើន ក្នុងការទំនុកបម្រុងធុរកិច្ច និងប្រជាជន តែការឆ្លងរាលដាលដែលអូសបន្លាយពេលយូរនេះ ស្ទើរតែគ្រប់ប្រទេសទូទាំងពិភពលោក នៅតែបិទប្រទេស ផ្អាកការធ្វើដំណើរ ធ្វើឱ្យធុរកិច្ចផ្សេងៗ ពិបាកនឹងស្ដារខ្លួនឡើងវិញ។
បើទោះបីជា ចំនួនអ្នកឆ្លងមេរោគថ្មីនៅប្រទេសជប៉ុនក្នុង ថ្ងៃៗ នៅតែកើនឡើងប្រមាណជា ៤០០-៧០០នាក់ក្ដី តែរដ្ឋបាលជប៉ុន បានសម្រេចចិត្តរួចហើយថា នឹងដំណើរការសេដ្ឋកិច្ចទៅមុខ និង “រស់នៅរួមគ្នាជាមួយមេរោគវីរុស”…តែខណៈនេះ ជប៉ុននៅតែមិនទាន់បើកទ្វារទទួលអ្នកទេសចរបរទេសនៅឡើយ ទើបត្រូវឧបត្ថម្ភគាំទ្រវិស័យទេសចរណ៍ និងប្រើប្រាស់សេវាកម្មក្នុងប្រទេសជាចម្បង។
ចំណុចសំខាន់នៃពាក្យថ្លែងការណ៍របស់លោកនាយករដ្ឋមន្ត្រីជប៉ុន ដែលពាក់ព័ន្ធនឹងការស្ដារសេដ្ឋកិច្ចពីវីរុសកូវីដ មានដូចជា៖
លើកកម្ពស់ការពិនិត្យរកមេរោគ របស់អង្គភាពសុខភាពសាធារណៈក្នុងតំបន់ផ្សេងៗ ឱ្យបានក្នុង ១ថ្ងៃជាមធ្យម ២០០ ០០០ករណី។ អ្នកដែលមានភាពប្រថុយប្រថាន និងមានអាការធ្ងន់ធ្ងរ ជនចាស់ជរា នឹងបានទទួលការពិនិត្យយ៉ាងទូលំទូលាយ។
ស្វែងរកវ៉ាក់សាំងកូវីដ-១៩ ឱ្យប្រជាជនគ្រប់រូបដោយឥតគិតថ្លៃ ឱ្យបានក្នុងអំឡុងពេលពាក់កណ្ដាលឆ្នាំខាងមុខ ហើយរដ្ឋបាលនឹងត្រូវបង់ប្រាក់សំណង បើប្រជាជនបានរងផលប៉ះពាល់ រួមទាំងទូទាត់ឱ្យអង្គភាពដែលត្រូវរងការប្ដឹងផ្ដល់ ដោយសារផលប៉ះពាល់ពីការប្រើវ៉ាក់សាំង។
បន្តគោលនយោបាយ “អាបេ ណូនិកស៍” ព្រមទាំងកែសម្រួលការធ្វើការងារក្នុងផ្នែកផ្សេង។
ផ្ដល់ប្រាក់ឧបត្ថម្ភគាំទ្រ មិនលើស ២លានយ៉េន ទៅឱ្យក្រុមហ៊ុនដែលមានប្រាក់ចំណូលធ្លាក់ចុះដោយសារកូវីដ និងផ្ដល់ប្រាក់កម្ចីគ្មានការប្រាក់ គ្មានទ្រព្យបញ្ចាំ ឱ្យប្រជាជនដែលប្រឈមនឹងភាពលំបាកលំបិនក្នុងជីវិត។
រៀបចំគ្រោងការ “យុទ្ធនាការ GO TO” លើកកម្ពស់វិស័យទេសចរណ៍ ការប្រើប្រាស់ និងការចាយវាយក្នុងប្រទេស។
បង្កើត “ការិយាល័យសេដ្ឋកិច្ចឌីជីថល” ជំរុញការកែសម្រួលប្រព័ន្ធរាជការ និងម៉ូដែលសេដ្ឋកិច្ចថ្មី ដែលនៅរួមគ្នាជាមួយវីរុសកូរ៉ូណា (With Corona) និងក្រោយឆ្លងផុតវីរុសកូរ៉ូណា (Post Corona)។
បញ្ឈប់ការប្រើត្រាប្រថាប់នៅក្នុងការដំណើរការការងារ ដើម្បីងាយស្រួលដល់ការធ្វើការងារតាមអនឡាញ (ប្រទេសជប៉ុន មានវប្បធម៌ការប្រើត្រាប្រថាប់ ជំនួសការចុះហត្ថលេខា)។
កែសម្រួលខ្សែចង្វាក់ផ្គត់ផ្គង់របស់ម៉ាស់អនាម័យការពារ និងឧបករណ៍វេជ្ជសាស្ត្រ ឱ្យផលិតក្នុងប្រទេស ឬពង្រីកការផលិតនៅក្នុងប្រទេសជាច្រើនទៀត រួមទាំងប្រើការផលិតបែបស្វ័យប្រវត្តិ មិនចាំបាច់ប្រើមនុស្ស។
កាត់បន្ថយការផ្ដុំគ្នារបស់សេដ្ឋកិច្ចនៅក្នុងទីក្រុងតូក្យូ និងខេត្ត៣ ដែលនៅជុំវិញ (សៃតាម៉ៈ, ឈិបៈ, ខាណាង៉ាវ៉ៈ) មិនឱ្យលើស ៣០ភាគរយ របស់ GDP បង្កើនការពង្រីកសេដ្ឋកិច្ចឆ្ពោះទៅភូមិភាគផ្សេង។
ជំរុញវិស័យទេសចរណ៍ ឱ្យក្លាយជាផ្នែកមួយរបស់ជីវិតរស់នៅបែបថ្មី ដោយរដ្ឋាភិបាលនឹងឧបត្ថម្ភថ្លៃចាយវាយ ឱ្យការធ្វើដំណើរក្នុងប្រទេសមានតម្លៃថោក។
រដ្ឋាភិបាល នឹងផ្ដល់ប្រាក់ឧបត្ថម្ភគាំទ្រ ដល់អ្នកដែលមានបទពិសោធនៅក្នុងស្ថាប័នខ្នាតធំណា ដែលត្រូវការចេញមកធ្វើធុរកិច្ច SME ក្នុងតំបន់របស់ខ្លួនឯង។
បើកទទួលពលករបរទេសជាបន្តបន្ទាប់ ជាពិសេសក្រុមធុរកិច្ចហិរញ្ញវត្ថុ ដោយនឹងផ្ដល់សិទ្ធិពិសេសផ្នែកភាស៊ី និងវីសាស្នាក់នៅក្នុងប្រទេសជប៉ុន។
កែសម្រួលប្រព័ន្ធការធ្វើការងារ ជួយគាំទ្រស្ត្រី ជនបរទេស ការផ្លាស់ប្ដូរការងារ ដើម្បីបង្កើតភាពសម្បូរបែបក្នុងការធ្វើការ។
ប្រកាសរៀបចំព្រឹត្តិការណ៍កីឡា តូក្យូ អូឡាំពិក និងផារ៉ាឡាំពិក នៅឆ្នាំក្រោយ ដើម្បីបង្ហាញពីជ័យជម្នះរបស់មនុស្សជាតិ លើមេរោគវីរុសកូរ៉ូណា។
លោក យ៉ូឈិហ៊ីដេ ស៊ូង៉ៈ ជាមេដឹកនាំជប៉ុន ក្នុងអំឡុងពេលដែលលំបាកលំបិនបំផុត លោកថ្លែងថា លោកត្រូវការរុញច្រានប្រទេសជប៉ុន ឱ្យក្លាយជាសង្គមមួយដែលពឹងអាស្រ័យលើខ្លួនឯង ជួយគ្នាទៅវិញទៅមក និងឧបត្ថម្ភគាំទ្រសួនរួម ដើម្បីឱ្យប្រទេសជប៉ុនរួចផុតពីវិបត្តិដ៏ធ្ងន់ធ្ងរក្នុងគ្រានេះឱ្យបាន៕
ប្រភព៖ សារព័ត៌មានបរទេស
ចុចអាន៖ តើជប៉ុននឹងមានវិធានការទប់ស្កាត់កូវីដ-១៩ យ៉ាងណា នៅពេលរៀបចំព្រឹត្តិការណ៍ “តូក្យូ អូឡាំពិក”?
#អរគុណសន្តិភាព
