ចិន៖ ក្រសួងការបរទេសសហរដ្ឋអាមេរិក បានអនុម័តការលក់យន្តហោះដ្រូនបំពាក់អាវុធស៊េរី MQ-9 Reaper ចំនួន ៤គ្រឿងទៅឱ្យតៃវ៉ាន់ កាលពីថ្ងៃម្សិលមិញ(ទី៣ វិច្ឆិកា) ដែលនេះ ជាការបន្ថែមចង្កូមឱ្យទៅកងទ័ពតៃប៉ិ ដើម្បីត្រៀមទប់ទល់នឹងឥរិយាបថគំរាមរុករានអធិបតេយ្យភាពពីប្រទេសចិន។
ក្រសួងការបរទេសសហរដ្ឋអាមេរិក បានបញ្ជាក់ថា កិច្ចព្រមព្រៀងលក់យន្តហោះដ្រូន ដែលមានតម្លៃសរុបប្រមាណ ៦០០លានដុល្លារនេះ នឹងជួយគាំទ្រភាពព្យាយាមរបស់តៃវ៉ាន់ ដែលចង់លើកកម្ពស់សមត្ថភាពកងទ័ពរបស់ខ្លួនឱ្យទាន់សម័យ និងថែរក្សាសក្ដានុពលផ្នែកការពារជាតិដែលអាចជឿទុកចិត្តបាន។
សហរដ្ឋអាមេរិកនៅតែជឿថា អាវុធទាំងអស់នេះ នឹងជួយជ្រោងស្ថិរភាពខាងនយោបាយ និងតុល្យភាពខាងយោធាក្នុងភូមិភាគ។
កិច្ចព្រមព្រៀងច្បាប់នេះ នឹងគ្របដណ្ដប់លើយន្តហោះដ្រូនចំនួន ៤គ្រឿង, ស្ថានីយគ្រប់គ្រង, និងឧបករណ៍ទំនាក់ទំនង/ស៊ើបការណ៍ដែលពាក់ព័ន្ធ តែមិនទាន់រួមទាំងគ្រាប់បែក ឬកាំជ្រួច ដែលនឹងត្រូវប្រើរួមគ្នានោះទេ។
ការលក់យន្តហោះដ្រូនឱ្យទៅតៃវ៉ាន់ បានកើតឡើង ក្រោយពីសហរដ្ឋអាមេរិក បានអនុម័តការលក់អាវុធជាកញ្ចប់ ទៅឱ្យតៃវ៉ាន់ជាច្រើនលើកក្នុងអំឡុងមិនប៉ុន្មានសប្ដាហ៍កន្លងមក សរុបជាទឹកប្រាក់ប្រមាណ ៤២០០លានដុល្លារ។ ក្នុងចំនួននេះ មិនទាន់រួមទាំងកាំជ្រួចប្រឆាំងនាវាចម្បាំង Harpoon, កាំជ្រួចបាញ់ពីអាកាសមកផែនដី SLAM-ER, តិចណូឡូជីស៊ើបការណ៍ខាងអាកាស និងមូលដ្ឋានបាញ់កាំជ្រួចខ្នាតតូចចល័ត។
ចំណែកក្រសួងការបរទេសតៃវ៉ាន់បានថ្លែងថា “នេះគឺជាកិច្ចព្រមព្រៀងលក់អាវុធឱ្យតៃវ៉ាន់ លើកទី ១០ហើយ ដែលធ្វើឡើងក្រោមរដ្ឋបាលលោកប្រធានាធិបតីដូណាល់ ត្រាំ និងជាលើកទី៣ ក្នុងជុំ ២សប្ដាហ៍ ដែលអាវុធទាំងអស់នេះ នឹងជួយបង្កើនសក្ដានុពល និងភាពជឿជាក់ដល់យើង ក្នុងការការពារសន្តិភាពនៅក្នុងឈូងសមុទ្រតៃវ៉ាន់” ។
ប្រទេសចិន មិនពេញចិត្តយ៉ាងខ្លាំង ដែលសហរដ្ឋអាមេរិក លក់អាវុធទៅឱ្យតៃវ៉ាន់ ដែលក្រុងប៉េកាំងបានប្រកាន់ខ្ជាប់ថា ជាដែនដីនៅក្នុងអធិបតេយ្យភាពរបស់ខ្លួន និងរំពឹងក្នុងការនាំត្រឡប់ យកមកនៅក្រោមការគ្រប់គ្រងរបស់ខ្លួនវិញ នៅថ្ងៃណាមួយ ទោះបីជាត្រូវប្រើកម្លាំងក៏ដោយ។
សម្ព័ន្ធភាពចិន-តៃវ៉ាន់ បានចុះទ្រុឌទ្រោមខ្លាំងបំផុត ក្នុងជុំច្រើនទសវត្សរ៍កន្លងមកនេះ ចាប់តាំងពីលោកស្រីប្រធានាធិបតី ឆៃ អ៊ីងវឹន ឡើងគ្រងតំណែងជាមេដឹកនាំ កាលពីឆ្នាំ២០១៦ និងប្រកាសគោលជំហរថា តៃវ៉ាន់ គឺជារដ្ឋអធិបតេយ្យ និងមិនមែនជាផ្នែកមួយរបស់ចិនតែមួយឡើយ(One China) ។
រដ្ឋបាលចិន បានកាត់ផ្ដាច់ច្រកផ្លូវទំនាក់ទំនងជាផ្លូវការ រួមទាំងបន្ថែមសម្ពាធ ទាំងខាងសេដ្ឋកិច្ច, កិច្ចការយោធា និងការទូត ដើម្បីឆ្លើយតបនឹងលោកស្រីឆៃ ប៉ុន្តែស្ត្រីមេដឹកនាំរូបនេះ បែរជានៅតែបានទទួលការនិយមចូលចិត្តយ៉ាងស្អិតល្មួតពីប្រជាជន និងឈ្នះការបោះឆ្នោតដល់ទៅ ២អាណត្តិ កាលពីខែមករា កន្លងមក។
លោកប្រធានាធិបតី ស៊ី ជីនភីង របស់ចិន ដែលអាចរាប់បានថា ជាមេដឹកនាំដែលរឹងមាំបំផុត បន្ទាប់ពីលោកប្រធានម៉ៅ ធ្លាប់បានចេញមកគំរាមថា ការដណ្ដើមយកកោះតៃវ៉ាន់ គឺជារឿងដែល “មិនអាចចៀសវាងបាន” ខណៈដែលកងទ័ពប្រជាជនចិន ក៏បានបញ្ជូនយន្តហោះប្រដេញ រុករានចូលទៅក្នុងតំបន់ការពារសុវត្ថិភាពខាងអាកាសរបស់តៃវ៉ាន់ កាន់តែញឹកញាប់ឡើងទៀតផង ក្នុងអំឡុងប៉ុន្មានខែមកនេះ។
ចំណែកយន្តហោះដ្រូន Reaper ដែលផលិតដោយក្រុមហ៊ុន General Atomics នោះ ត្រូវបានច្នៃឡើង ដើម្បីប្រើប្រាស់ក្នុងភារកិច្ចស៊ើបការណ៍ រយៈចម្ងាយឆ្ងាយ ដែលមានពិតានហោះខ្ពស់ ហើយសហរដ្ឋអាមេរិក ធ្លាប់បានប្រើយន្តហោះដ្រូនប្រភេទនេះ កំណត់មុខសញ្ញាវាយប្រហារ ឬពិឃាតមេដឹកនាំក្រុមអ្នកប្រយុទ្ធជីហាត នៅក្នុងមជ្ឈិមបូព៌ា និងអាហ្វហ្គានីស្ថានរួចមកហើយ៕
ប្រភព៖ សារព័ត៌មានបរទេស
#អរគុណសន្តិភាព
