សហរដ្ឋអាមេរិក៖ លោក ចូ បៃដិន វ័យ ៧៧ឆ្នាំ ក្លាយពីអតីតអនុប្រធានាធិបតី ២អាណត្តិរបស់លោក បារ៉ាក់ អូបាម៉ា ប្រធានាធិបតីសហរដ្ឋអាមេរិកទី៤៤ ឈានឡើងមកជាអនាគតប្រធានាធិបតីសហរដ្ឋអាមេរិកទី៤៦ ក្រោយយកឈ្នះលោក ដូណាល់ ត្រាំ មកបានយ៉ាងញាប់ញ័របំផុត។
តាមរយៈរបាយការណ៍របស់ BBC នៅពេលលទ្ធផលការរាប់សំឡេងឆ្នោតកន្លងទៅបាន៤៥ ក្នុងចំណោម ៥០រដ្ឋ លោកបៃដិនមានពិន្ទុតំណាងបោះឆ្នោតលើស ២៧០រួចរាល់ហើយ ដោយរដ្ឋទី៤៥ ផេនស៊ីលវេនៀ ធ្វើឱ្យលោកបៃដិនដណ្ដើមពិន្ទុតំណាងអ្នកបោះឆ្នោត ២០សំឡេង សរុបទាំងអស់ ២៧៣សំឡេង។
អ្នកនយោបាយជើងចាស់រូបនេះ បានទទួលការជ្រើសរើសឱ្យធ្វើជាបេក្ខជនតំណាងគណបក្សដេម៉ូក្រេត ប្រជែងតំណែងប្រធានាធិបតីតំណាង ក្នុងឋានៈ អ្នកមានបទពិសោធជ្រៅជ្រះក្នុងហ្គេមនយោបាយ ជាច្រើនទសវត្សរ៍ ប្រជាជនស្គាល់ច្បាស់ តែមានចំណុចខ្សោយត្រង់ ធ្លាប់ត្រូវបានរងការវាយប្រហាររឿងប្រវត្តិ ការប្រព្រឹត្តមិនសមរម្យជាមួយសុភាពនារី និងកូនប្រុសធ្លាប់រងការរិះគន់។
ប្រវត្តិសង្ខេប(ទិន្នន័យ AP)
កើតថ្ងៃទី២០ វិច្ឆិកា ឆ្នាំ១៩៤២ នៅទីក្រុងស្គ្រែនតុន រដ្ឋផេនស៊ីលវេនៀ ជាកូនប្រុសច្បង របស់លោក ចូសេហ្វ និងលោកស្រី ជីន បៃដិន មានប្អូនស្រីម្នាក់ និងប្អូនប្រុស ២នាក់។
ពីដើម ឪពុក ជាសេដ្ឋី តែក្រោយមក មានបញ្ហារឿងហិរញ្ញវត្ថុ ឪពុកក៏នាំក្រុមគ្រួសារ ផ្លាស់ទៅនៅរដ្ឋដេឡាវែរ ដើម្បីរកការងារធ្វើ រហូតចាប់ផ្ដើមមានជីវភាព រើបឡើងវិញបានម្ដងទៀត និងរស់នៅដេឡាវែរ តាំងពីពេលនោះរហូតមក។
កម្ពស់ ១៨៣សង់ទីម៉ែត្រ
ការសិក្សា ចប់សាខានីតិសាស្ត្រ មហាវិទ្យាល័យ ស៊ីរ៉ាឃីវស៍ រដ្ឋនីវយ៉ក ឆ្នាំ១៩៦៨
ដំណើផ្លូវខាងនយោបាយ- បានទទួលការជ្រើសតាំង ជាសមាជិកសភាទីក្រុងនីវ ខាសស៊ើល ឆ្នាំ១៩៧០ បន្ទាប់ពីនោះ ឆ្នាំ១៩៧២ បានទទួលការជ្រើសតាំងជាព្រឹទ្ធសភារដ្ឋដេឡាវែរ អាណត្តិដំបូង (ជាសមាជិកព្រឹទ្ធសភា ដែលមានអាយុតិចលំដាប់ទី៦ ដោយអាយុ ២៩ឆ្នាំ)
ភរិយា- ជីលល៍ បៃដិន (តាំងពីឆ្នាំ១៩៧៧) ចំណែកភរិយាទី១ នីលលៀ ហាន់ធើរ រៀបការឆ្នាំ១៩៦៦ ស្លាប់នៅឆ្នាំ១៩៧។
កូន- បូ កូនប្រុសច្បង(ស្លាប់) ហាន់ធើរ, កូនប្រុសបន្ទាប់ អ៊ែឈ្លីយ៍, កូនស្រីពៅ និងណាអូមិ គ្រិស្ទីណា(ស្លាប់ក្នុងឧប្បត្តិហេតុជាមួយម្ដាយ ឆ្នាំ១៩៧២)
ចៅ- ណាតាលី បៃដិន, ហ្វ៊ីននីហ្គែន បៃដិន, រ៉ូប៊ើត បៃដិនទី២, ណាអូមី បៃដិន និងមេស៊ី បៃដិន។
ទិន្នន័យនៅលើវេបសាយ បៃអូហ្ក្រាហ្វ៊ី បានបញ្ជាក់ថា លោកបៃដិន ចូលប្រឡូកក្នុងពិភពនយោបាយយូរណាស់មកហើយ តាមរយៈការធ្វើជាសមាជិកព្រឹទ្ធសភា ៧អាណត្តិ រាប់តាំងពីលើកដំបូងក្នុងឆ្នាំ១៩៧។ ធ្លាប់ជាបេក្ខជន ប្រជែងតំណែងប្រធានាធិបតី លើកដំបូងក្នុងឆ្នាំ១៩៨៧ មុននឹងបានសម ដូចបំណងនៅឆ្នាំ២០២០ នេះ។
មានចំណុចលេចធ្លោ ក្នុងរឿងការថ្លែងប្រាស្រ័យ បែបមិនមានការរៀបចំទុកមុន ដែលទោះជាកាលស្ថិតក្នុងវ័យកុមារ លោកបៃដិនមានបញ្ហា និយាយត្រដិតជាប់ៗក៏ដោយ តែលោកបៃដិន ក៏ខំព្យាយាមហ្វឹកហាត់យ៉ាងខ្លាំង ដោយការឈរនិយាយនៅមុខកញ្ចក់ អស់ជាច្រើនខែ។ រហូតទីបំផុត ក៏អាចឆ្លងផុតឧបសគ្គនេះ និងលែងនិយាយត្រដិតបានសម្រេច។ ក្រៅពីនេះ លោកថែមទាំងចូលទៅដល់បេះដូងប្រជាជនវណ្ណៈពលករអាមេរិកាំង មានភាពជាគ្នាឯង មិនប្រកាន់ខ្លួន តែងតែស្វាគមន៍រាក់ទាក់មនុស្សម្នា ចាប់ដៃ អង្អែលស្មា និងឱ្យថតសែលហ្វ៊ី ជាមួយមនុស្សម្នាទាំងឡាយ ប្រៀបដូចជាតារាភាពយន្តទៀតផង។
មានចំណុចខ្សោយ រឿងស្រី
តែ ការជិតដិតស្និទ្ធស្នាលជាមួយមនុស្សម្នា ច្រើនហួសហេតុពេក ក៏ក្លាយជាបញ្ហា ជាពិសេសជាមួយនារី។
តាមរយៈទិន្នន័យរបស់ BBC បានឱ្យដឹងថា មកដល់ថ្ងៃនេះ មានស្ត្រី ៨នាក់ហើយ ដែលនិយាយថា លោកបៃដិន បានប៉ះពាល់ ឱប និងថើបពួកនាងយ៉ាងមិនសមរម្យ និងថែមទាំងមានឃ្លីបវីដេអូ ដែលបង្ហាញឱ្យឃើញថា លោកបៃដិន បានចូលកៀកកិត នែបនិត្យខ្លួនប្រាណមនុស្សស្រី ពេលចូលរួមក្នុងពិធីការខាងសង្គម ដែលរួមទាំងការចូលចិត្តថើបសក់ស្រីៗទៀតផង។
ករណីនេះ លោកបៃដិន បានផ្ដល់ការសន្យាថា លោកនឹងប្រយ័ត្នប្រយែងខ្លួន ក្នុងការមានបដិសម្ព័ន្ធ ឱ្យបានខ្លាំងឡើង។
ដៃគូដ៏ប្រសើរ របស់លោកអូបាម៉ា
លោកបៃដិន គ្រងតំណែងជាអនុប្រធានាធិបតី ៨ឆ្នាំ និងអំឡុងពេលចុងក្រោយនៃការគ្រងតំណែង មានការធ្វើឱ្យភ្ញាក់ផ្អើល ពីលោកប្រធានាធិបតីអូបាម៉ា ដែលបានប្រគល់មេដៃនៃសេរីភាពរបស់ប្រធានាធិបតី កិត្តិយសកម្រិតខ្ពស់បំផុតសម្រាប់ពលរដ្ឋអាមេរិកាំង ជូនលោកបៃដិនទៀតផង។
សូម្បីតែការបោះឆ្នោតឆ្នាំ២០២០ លើកនេះ ក៏លោកបារ៉ាក់ អូបាម៉ា បានឡើងវេទិកាថ្លែងប្រាស្រ័យ ជួយលោកបៃដិន ប្រមូលសំឡេងឆ្នោតផងដែរ ដោយលោកបៃដិន ទទួលបានពិន្ទុនិយម ហាក់ដូចជាខ្ពស់ ពីពលរដ្ឋអាមេរិក ខ្សែស្រឡាយអាហ្វ្រ៊ិក។
តែ កាលពីមិនយូរប៉ុន្មានមកនេះ លោកបៃដិន ប៊ិះភ្លាត់ស្នៀត នៅពេលលោកទៅថ្លែង នៅក្នុងកម្មវិធីវិទ្យុរបស់លោក ឆាឡាម៉ាន ថាហ្កដ ឌីជេស្បែកខ្មៅ ថា “បើនៅគិតមិនទាន់ចេញថា នឹងគាំទ្រខ្ញុំ ឬលោកត្រាំនោះ មានន័យថា អ្នកមិនមែនជាមនុស្សស្បែកខ្មៅទេ។
ប្រយោគនេះ ធ្វើឱ្យកើតមានចរន្តវិភាគរិះគន់យ៉ាងច្រើន រហូតធ្វើឱ្យក្រុមការងាររបស់លោក ត្រូវប្រញាប់ចេញមកថ្លែងបញ្ជាក់ថា ការពិត លោកបៃដិន មើលឃើញពីតម្លៃនៃពិន្ទុសំឡេងពីប្រជាជនអាមេរិក ខ្សែស្រឡាយអាហ្វ្រិក។
ធ្លាប់បាត់បង់ប្រពន្ធកូន និងកូនប្រុសបែកធ្លាយរឿងអាស្រូវ
សម្រាប់ជីវិតឯកជនវិញ លោកបៃដិន ធ្លាប់ប្រឈមនឹងសោកនាដកម្មក្រុមគ្រួសារយ៉ាងច្រើន ដោយនៅឆ្នាំ១៩៧២ ភរិយាដំបូង បានស្លាប់បាត់បង់ជីវិត ព្រមជាមួយកូនស្រី ក្នុងគ្រោះថ្នាក់ចរាចរណ៍ កូនប្រុស ២នាក់រងរបួស។ អំឡុងពេលនោះ លោកបៃដិន កំពុងតែជិតបានធ្វើជាសមាជិកព្រឹទ្ធសភាអាណត្តិដំបូង ធ្វើឱ្យមនុស្សម្នា នាំគ្នាអាណិតអាសូរ និងយល់ចិត្តយ៉ាងច្រើន។
តមក បូ កូនប្រុសច្បង បានស្លាប់ដោយអាការសាច់ដុះក្នុងខួរក្បាល ក្នុងវ័យ ៤៦ឆ្នាំ ចំណែកកូនប្រុសបន្ទាប់ ហាន់ធើរ បែកធ្លាយរឿងអាស្រូវដ៏ច្រើន មិនថាតែ ផឹកស្រា ស្រវឹងអួទីនួ និងចូលទៅពាក់ព័ន្ធក្នុងករណីទុច្ចរិតជាមួយមហាសេដ្ឋីខាងថាមពលជនជាតិចិន និងរងការចោទប្រកាន់យ៉ាងធ្ងន់ធ្ងរថា បានចូលទៅធ្វើធុរកិច្ចបែបមិនសុចរិត នៅឯប្រទេសយូក្រេនទៀតផង។
ករណីនេះ ត្រូវបានលេចឮខ្ចរខ្ចាយថា លោកត្រាំ បានទូរស័ព្ទទៅប្រធានាធិបតីថ្មី របស់ប្រទេសយូក្រេន ឱ្យជួយជំរុញការស៊ើបអង្កេតលោកចូ បៃដេន រួមទាំងកូនប្រុសថា តើមានទៅពាក់ព័ន្ធក្នុងការចោទប្រកាន់ទុច្ចរិតនោះ ឬទេ? រហូតក្លាយជាប្រធានបទ ដែលលោកត្រាំ ត្រូវរងការសម្ដែងការមិនទុកចិត្តនៅក្នុងសភាថា បានប្រើប្រាស់អំណាចក្នុងផ្លូវដែលមិនត្រឹមត្រូវ តែលោកត្រាំ បានរួចផុតពីការត្រូវ អ៊ីមភីចឈ្មែន នៅក្នុងសភាជាន់ខ្ពស់។
រហូតបានមកតស៊ូគ្នាយ៉ាងចំៗ ជាមួយលោកបៃដិន ក្នុងការបោះឆ្នោតជ្រើសតាំងប្រធានាធិបតីសហរដ្ឋអាមេរិក ២០២០ ដែលបញ្ចប់ដោយ ជ័យជម្នះរបស់លោកបៃដិន។
អ្នកដែលធ្លាប់និយាយថា “ខ្ញុំអាចស្លាប់បិទភ្នែកជិតបាន ដោយមិនចាំបាច់ធ្វើជាប្រធានាធិបតី”
តែ ពេលនេះ លោកមានភារកិច្ចដ៏ធំសម្បើម ក្នុងការក្លាយជាប្រធានាធិបតីយ៉ាងពេញមុខហើយ…៕
ប្រភព៖ សារព័ត៌មានបរទេស
#អគុណសន្តិភាព
