ព្រះសីហនុ៖ ក្នុងគោលដៅរួមចំណែកជាមួយរាជរដ្ឋាភិបាលក្នុងការទប់ស្កាត់ប្រយុទ្ធប្រឆាំងនឹងជំងឺកូវីដ-១៩ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី គ្រោងចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃចន្លោះពី៦០០ ទៅ ៧០០នាក់ នៅហែលរីសត ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ នៅថ្ងៃទី៧ ខែមករា ឆ្នាំ២០២១ខាងមុខ ។
លោក លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តមហ៊ុន ម៉ានី នៅក្នុងជំនួបសំដែងការគួរសមជាមួយលោក ឈិន សេងងួន អភិបាលរងខេត្តព្រះសីហនុ នៅថ្ងៃទី ១០ ខែវិច្ឆិកា ឆ្នាំ ២០២០ នវ បានឱ្យដឹងថា ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានីចំនួន ៥០០នាក់ នឹងចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃចន្លោះពី៦០០ ទៅ៧០០នាក់ជាមធ្យម។
លោកបន្តថាដោយមូលហេតុមកពីទីធ្លាឆ្នេរសមុទ្រកោះរ៉ុងមានទំហំធំល្វឹងល្វើយតាមជំនាញរបស់ក្រសួងសុខាភិបាលដាក់មនុស្សឱ្យស្ថិតនៅចន្លោះឃ្លាតពីគ្នាចំងាយ ១,៥០ម៉ែត្រ ទៅបានយ៉ាងងាយស្រួល ជាពិសេសទាក់ទាញភ្ញៀវទេសចរមកកំសាន្តកោះរ៉ុងបន្ថែមទៀត។
លោកបន្ថែមថា ក្នុងឱកាសចុះពិនិត្យព្យាបាលជំងឺដោយឥតគិតថ្លៃ ក្រុមគ្រូពេទ្យស្មគ្រចិត្តឯកឧត្តម ហ៊ុន ម៉ានី មានបង្រៀនប្រជាពលរដ្ឋអោយយល់ដឹងអំពីការរស់នៅស្អាតប្រកបដោយអនាម័យល្អ លាងសម្អាតដៃនិងអាកុល ឬសាប៊ូពាក់ម៉ាស់ឱ្យបានត្រឹមត្រូវនៅពេលចាំបាច់ ហូបស្អាត គេងស្អាត ចែកអាកុល ម៉ាស់ ម៉ាស៊ីនវាស់កំដៅ សាប៊ូ ក្រដាសរូបភាពផ្សព្វផ្សាយអំពីការថែទាំរក្សាអនាម័យរួមទាំងស្បៀង អាហារមានជានំបុ័ង និងទឹកសុទ្ធជាដើម ។
លោកបន្តថា ក្នុងការចុះពិនិត្យ និងព្យាបាលជូនប្រជាពលរដ្ឋដោយឥតគិតថ្លៃមានជំងឺទូទៅដូចជា អប់រំសុខភាពជំងឺផ្លូវចិត្ត ជំងឺទូទៅផ្នែកកុមារជំងឺរោគស្ត្រី ជំងឺឬសដូងបាត ជំងឺក្រពះពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺព្រូន ជំងឺស្លេកស្លាំង ជំងឺសន្លាក់ឆ្អឹង ជំងឺរលាកថ្លើម ជំងឺកាមរោគ ជំងឺគ្រុនចាញ់ ជំងឺគ្រុនឈាម ជំងឺទឹកនោមផ្អែម ជំងឺបេះដូង ជម្ងឺលើស ឈាម ជំងឺតំរងនោម អេកូសាស្ត្រ មន្ទីរពិសោធន៍ (វិភាគឈាម) វះកាត់តូច និងព្យាបាលរបួស ។ល ។
លោក ឈិន សេងងួន អភិបាលរងខេត្តព្រះសីហនុ បានស្វាគមន៍ក្រុមគ្រូពេទ្យស្ម័គ្រចិត្ដឯកឧត្តម ហ៊ុន ម៉ានី ដែលមានគម្រោងរួមចំណែកជាមួយរាជរដ្ឋាភិបាលក្នុងការទប់ស្កាត់ប្រយុទ្ធប្រឆាំងនឹងជំងឺកូវីដ-១៩ ដើម្បីពិនិត្យព្យាបាលជំងឺជូនប្រជាពលរដ្ឋនៅក្រុងកោះរ៉ុង ខេត្តព្រះសីហនុ លោកនឹងយកសំណើរខាងលើនេះ ទៅឯកឧត្តមអភិបាលខេត្ត ពិនិត្យសម្រេចក្នុងការជួយពិនិត្យព្យាបាលជំងឺជូនប្រជាពលរដ្ឋ ក្រុងកោះរ៉ុង នៅដើមឆ្នាំ២០២១ ខាងមុខ ៕
#អគុណសន្តិភាព
