អាមេរិក៖ យើងនាំគ្នាមកស្គាល់ អនាគតរដ្ឋមន្ត្រីក្រសួងការពារជាតិសហរដ្ឋអាមេរិក ព្រមទាំងសង្កេតមើលទំនោរទិសដៅការដំណើរការរឿងនយោបាយការបរទេស ក្នុងយុគសម័យរបស់លោក ចូ បៃដិន ដែលមានចំពោះមហាអំណាចចិនដីគោក ដូចតទៅ…។
បន្ទាប់ពីលោក ចូ បៃដិន កំពុងជិតបានឡើងធ្វើជាប្រធានាធិបតីទី៤៦ របស់សហរដ្ឋអាមេរិក ធ្វើឱ្យមនុស្សចំនួនមិនតិចឡើយ មានអារម្មណ៍កង្វល់ថា តើលោកបៃដិន នឹងអាចគ្រប់គ្រង និងទប់អំណាចជាមួយប្រទេសមហាអំណាច ដូចជាចិន បានដែរឬទេ? និងថែមទាំងមានភាពអាចទៅរួចទៀតផងថា លោកបៃដិន អាចជ្រើសរើសក្នុងការសុខចិត្តដកថយឱ្យចិន ក្នុងរឿងជាច្រើន តែយ៉ាងណាក៏ដោយ ការតតាំងចិនដីគោក គឺជានយោបាយមួយ ដែលទាំងគណបក្សដេម៉ូក្រេត និងគណបក្សរីផាប្ល៊ីកាន់ យល់ឃើញដូចគ្នា ក្នុងការបង្ក្រាបប្រទេសចិនដីគោកយ៉ាងដល់ទីបំផុត ទាំងដែលគណបក្សទាំង ២នេះ មានដំណើរផ្លូវ ខុសប្លែកពីគ្នាច្រើនគួរសម។
ដោយលោកស្រី Michèle Flournoy (មិឆេល ហ្វ្លាអ៊ើណយ)នឹងក្លាយជាស្ត្រីដំបូងគេ ដែលត្រូវបានគេរំពឹងថា នឹងគ្រងតំណែងរដ្ឋមន្ត្រីក្រសួងការពារជាតិថ្មី របស់សហរដ្ឋអាមេរិក។ លោកស្រី មិឆេល កើតនៅរដ្ឋខាលីហ្វ័រនៀ និងរៀនបន្តផ្នែករដ្ឋសាស្ត្រ នៅមហាវិទ្យាល័យ ហាវ៉ាដ បន្ទាប់ពីនោះ លោកស្រី បានចូលសិក្សាកម្រិតបរិញ្ញាទោ ផ្នែកសម្ព័ន្ធភាពរវាងប្រទេស នៅមហាវិទ្យាល័យ អក់ស្វ៊ើដ។ ក្រោយរៀនចប់បរិញ្ញាទោ លោកស្រីបានចូលធ្វើការងារវិភាគ ពាក់ព័ន្ធនឹងនយោបាយសម្ព័ន្ធភាពរវាងប្រទេស នៅមហាវិទ្យាល័យ ហាវ៉ាដ។
ឆ្នាំ១៩៩៣ គណៈរដ្ឋមន្ត្រីរបស់លោកប្រធានាធិបតី ប៊ីល គ្លីនតុន បានហៅឱ្យលោកស្រីមិឆេល ចូលមកធ្វើការរួមគ្នាក្នុងផ្នែកការពារជាតិ ដោយបានប្រគល់តួនាទីឱ្យលោកស្រីគ្រប់គ្រង មើលការខុសត្រូវការរៀបផែនការផ្នែកយុទ្ធសាស្ត្រខាងយោធា ក្នុងតំបន់របស់ប្រទេសរុស្ស៊ី យូក្រេន និងអាស៊ីកណ្ដាល។ ខណៈនោះ លោកស្រី មិឆេល មានផ្នត់គំនិតថា ទោះជាសង្គ្រាមត្រជាក់បានបញ្ចប់ទៅហើយក៏ដោយ តែកងទ័ពសហរដ្ឋអាមេរិក នៅតែត្រូវរក្សាកម្រិតសមត្ថភាពក្នុងការប្រយុទ្ធ ឱ្យទទួលបានជ័យជម្នះគ្រប់ពេលវេលា មិនថានឹងប្រយុទ្ធជាមួយអ្នកណាក៏ដោយ។ បន្ទាប់ពីលោកគ្លីនតុន មិនបានទទួលការជ្រើសតាំងជាប្រធានាធិបតីបន្ត លោកស្រីមិឆេល បានផ្លាស់ទៅធ្វើការជាទីប្រឹក្សា ធ្វើការងារវិភាគពាក់ព័ន្ធនឹងសន្តិសុខជាតិ និងកិច្ចការការបរទេស។
ក្រោយមក លោកបារ៉ាក់ អូបាម៉ា បានឡើងជាប្រធានាធិបតី លោកស្រីមិឆេល ក៏បានត្រឡប់មកធ្វើការជាជំនួយការរដ្ឋមន្ត្រីការពារជាតិ ផ្នែកនយោបាយ ដោយមានស្នាដៃសំខាន់ៗជាច្រើន ដូចជា គាំទ្រការបន្ថែមកម្លាំងយោធានៅក្នុងប្រទេសអាហ្វហ្គានីស្ថាន គាំទ្រការប្រើកម្លាំងយោធានៅក្នុងប្រទេសលីប៊ី គាំទ្រការបន្ថែមថវិកាការពារជាតិ និងគាំទ្រការផ្ដល់អាវុធឱ្យទៅប្រទេសយូក្រេន។ នៅឆ្នាំ២០១១ លោកស្រីមិឆេល បានលាឈប់ពីការបម្រើការងារឱ្យរដ្ឋបាលលោកអូបាម៉ា ដើម្បីទៅធ្វើការផ្នែកជំនាញការវិញម្ដង។
បើសិនជាលោកស្រី ហ៊ីលឡារី គ្លីនតុន ឈ្នះការបោះឆ្នោតឆ្នាំ២០១៦ លោកស្រីមិឆេល អាចនឹងក្លាយជាអនាគតរដ្ឋមន្ត្រីការពារជាតិ ក្នុងឆ្នាំនោះបាត់ទៅហើយ។ ខ្នាតដែលយុគសម័យរបស់លោក ដូណាល់ ត្រាំ កន្លងមក លោកឧត្ដមសេនីយ៍ឯក ជេមស៍ ម៉ាតទីស ក៏ធ្លាប់អញ្ជើញឱ្យលោកស្រីមិឆេល មកធ្វើជាជំនួយការរដ្ឋមន្ត្រីការពារជាតិផងដែរ ដែលអាចរាប់បានថា ជាតំណែងខ្ពស់បំផុត បន្ទាប់ពីរដ្ឋមន្ត្រីការពារជាតិ។
លោកស្រីមិឆេល ធ្លាប់សរសេរអត្ថបទ ដាក់ក្នុងទស្សនាវដ្តី Foreign Affairs ថា “ការដែលនឹងចៀសវាងពីសង្គ្រាមនៅក្នុងទ្វីបអាស៊ីបាន កងទ័ពសហរដ្ឋអាមេរិក ត្រូវតែមានកម្រិតសមត្ថភាព ក្នុងការពន្លិចនាវាចម្បាំងទាំងអស់ របស់កងទ័ពជើងទឹកចិន នៅក្នុងសមុទ្រចិនខាងត្បូង ឱ្យបានក្នុងរយៈពេល ៧២ម៉ោង” ។
ចំណែកឯ ទំនោរទិសដៅការដំណើរការរឿងនយោបាយការបរទេស លោក អ៊ែដវើដ អាល់ដេន អ្នកវិភាគជើងចាស់ មកពី Council on Foreign Relations បានបង្ហើបប្រាប់ថា លោកបៃដេន មានសញ្ញាថា នឹងប្រើដំណើរផ្លូវ ក្នុងការរួមសហការជាមួយប្រទេសសម្ព័ន្ធមិត្ត ដើម្បីផ្លាស់ប្ដូរទង្វើរបស់ប្រទេសចិន។ ក្រៅពីនេះ លោកបៃដិន បានធ្លាប់រិះគន់លោកស៊ី ជីនភីង រឿងការល្មើសសិទ្ធិមនុស្សទៅលើក្រុមបាតុករ នៅក្នុងទីក្រុងហុងកុង និងក្រៅពីនេះទៀត លោកបៃដិន ជាមនុស្សមកពីគណបក្សដេម៉ូក្រេត ដំបូងគេ ដែលបានចូលរួមសម្ដែងការស្វាគមន៍ចំពោះលោកស្រីប្រធានាធិបតី ឆៃ អ៊ិងវឹន ដែលឈ្នះការបោះឆ្នោតនាពេលកន្លងមក។ តែយ៉ាងណាក៏ដោយ គេសន្និដ្ឋានថា លោកបៃដិន នឹងនៅតែស្នើសុំការសហការអំពីប្រទេសចិន ក្នុងការជួយគ្រប់គ្រងប្រទេសកូរ៉េខាងជើងដែរ។
និយាយដោយសរុបទៅ ទិសដៅ ក្នុងការដំណើរការនយោបាយការបរទេស ក្នុងយុគសម័យរបស់លោក ចូ បៃដិន មានទំនោរទៅក្នុងបែបសន្តិភាព។ លោកបៃដិនមានឥរិយាបថមិត្តភាពជាមួយចិន ខ្លាំងជាងលោកត្រាំ តែ វាក៏ជាភាពជាមិត្ត ដែលទាំងគ្រប់គ្រងបាន និងសហការបាន ទៅដំណាលៗគ្នាហ្នឹងឯង៕
សូមអរគុណទិន្នន័យពី NikkeiAsia, DefenseNews, Foreignaffairs
ប្រភព៖ សាព័ត៌មានបរទេស
#អរគុណសន្តិភាព
