អាមេរិក ៖ ក្នុងអំឡុងពេលដែលពលរដ្ឋអាមេរិកាំង និងមនុស្សទូទាំងពិភពលោក នៅមិនទាន់ដឹងថា តើលោកដូណាល់ ត្រាំ នឹងរិះរកវិធីចុះចេញពីសង្គ្រាមបោះឆ្នោតប្រធានាធិបតីសហរដ្ឋអាមេរិកយ៉ាងណា បន្ទាប់មិនព្រមទទួលស្គាល់ជ័យជម្នះរបស់លោក ចូ បៃដិន នោះ មានព័ត៌មានចចាមអារ៉ាមជាច្រើន ពាក់ព័ន្ធនឹងលោកស្រី មេឡានៀ ត្រាំ ស្ត្រីទី១ ដែលមិនមែនជារឿងល្អ សម្រាប់លោកត្រាំឡើយ។
មានទាំងព័ត៌មានថា លោកស្រីមេឡានៀ បានរៀបផែនការ ស៊ីញ៉េលើលិខិតលែងលះជាមួយអនាគតអតីតប្រធានាធិបតី ត្រាំ រួចរាល់ហើយ បន្ទាប់ពីគិតមកជាយូរហើយ តែមិនចង់ធ្វើក្នុងរយៈពេលការគ្រងតំណែង។
មានទាំងព័ត៌មានថា លោកស្រីមេឡានៀ ជាមនុស្សជិតដិតម្នាក់ ដែលលួងលោមលោក ត្រាំ ឱ្យទទួលយកការបរាជ័យ។
តែកាពិត ក៏គឺ មកដល់ថ្ងៃនេះ លោកស្រីមេឡានៀ នៅមិនទាន់ធ្វើអ្វីដែលបំបាក់មុខលោកត្រាំនៅឡើយ រួមទាំងមិនទាន់ទូរស័ព្ទដោយផ្ទាល់ ទៅសម្ដែងការស្វាគមន៍ចំពោះលោកស្រី ជីលល៍ បៃដិន ភរិយារបស់លោក ចូ បៃដិន ដែលជាទំនៀមទម្លាប់ប្រតិបត្តិមកយូរហើយ ព្រោះលោកស្រីមេឡានៀ ខ្លួនឯងក៏ធ្លាប់បានទទួលការស្វាគមន៍ ពីលោកស្រីមិឆេល អូបាម៉ា កាលពី ៤ឆ្នាំមុនដែរ។
កាលពី ៤ឆ្នាំមុន លោកស្រីមិឆេល បានបើកទ្វារមន្ទីរសេតវិមាន អញ្ជើញលោកស្រីមេឡានៀ ទៅក្រេបទឹកតែ និងសម្ដែងការស្វាគមន៍ ព្រមទាំងណែនាំរឿងការមើលថែទាំមន្ទីរសេតវិមាន ក្នុងឋានៈជាស្ត្រីទី១ ដែលធ្វើបន្តវេនគ្នា មកជាយូរហើយ តែខណៈនេះ លោកស្រីមេឡានៀ នៅសម្ងំស្ងៀមឈឹងនៅឡើយ។
អាចដោយសារតែ មិនហ៊ានឈានរំលងមុខមាត់ស្វាមី ដែលកំពុងតែតស៊ូរើបម្រះយ៉ាងខ្លាំងក្លា ក្នុងការចោទប្រកាន់ថា លោកបៃដិន បានកេងបន្លំការបោះឆ្នោត ដោយមិនទាន់បង្ហាញភ័ស្តុតាងសំអាង។
លោកស្រីមេឡានៀ ត្រាំ ធ្លាប់ប្រាប់ថា លោកស្រីមានសម្ព័ន្ធភាពដ៏ល្អជាមួយស្វាមី ខណៈពេលជាមួយគ្នា លោកត្រាំក៏បានបញ្ជាក់ដែរថា លោក និងមេឡានៀ មិនដែលឈ្លោះទាស់ទែងគ្នាសោះឡើយ។ ទាំងអស់នេះ គឺដើម្បីពន្លត់ព័ត៌មាន ដែលទាំង ២នាក់ត្រូវបានគេសង្ស័យថា ពេលចូលរួមក្នុងពិធីសង្គមធំៗ មេឡានៀ ចូលចិត្តទាញដៃខ្លួនឯង ចេញពីការចាប់ដៃរបស់លោកត្រាំ។
ទស្សនាវដ្តី Newyork Magazine បានរាយការណ៍ថា កាលពីឆ្នាំបោះឆ្នោត២០១៦ លោកស្រីមេឡានៀ បានស្រែកទ្រហោយំហ៊ូឡើង នៅពេលដឹងថា លោកត្រាំបានក្លាយជាប្រធានាធិបតីរបស់សហរដ្ឋអាមេរិក ដោយសារតែពេលនោះ លោកស្រីមិនបានចង់ក្លាយជាស្ត្រីទី១ និងលោកស្រី ថែមទាំងមិនបានគិតថា លោកត្រាំនឹងឈ្នះទៀតផង។
លោកស្រី គ្រីស្ទីណា ផ្រេវីធ អ្នកច្បាប់ដែលជំនាញក្នុងរឿងក្ដីលែងលះ បានបង្ហើបឱ្យដឹងថា អាចនឹងទៅរួច ដែលលោកស្រីមេឡានៀ ត្រាំ បានធ្វើកិច្ចសន្យាជាមួយស្វាមីទុកជាមុនហើយថា នឹងមិនសរសេរសំបុត្រ ឬផ្ដល់បទសម្ភាសណា ដែលបើកកកាយរឿងរ៉ាវមិនល្អ របស់លោកត្រាំក្នុងខណៈដែលលោកនៅគ្រងតំណែងជាប្រធានាធិបតីសហរដ្ឋអាមេរិក។
លោកដូណាល់ ត្រាំ និងលោកស្រីមេឡានៀ បានរស់នៅជាមួយគ្នាអស់រយៈពេល ១៥ឆ្នាំមកហើយ មានកូនប្រុសជាមួយគ្នា ១នាក់ ឈ្មោះ បារ៉ន ត្រាំ ដោយកុមារា បារ៉ន នឹងបានទទួលកេរមរតករបស់លោកត្រាំយ៉ាងស្របច្បាប់៕
សូមថ្លែងអំណរគុណប្រភព Dailymail.co.uk
ប្រភព៖ សារព័ត៌មានបរទេស
#អរគុណសន្តិភាព
