កំពង់ឆ្នាំង ៖ កាលពីព្រឹកថ្ងៃទី១១ ខែវិច្ឆិកា ឆ្នាំ២០២០ នៅមជ្ឈមណ្ឌល ហ្វឹកហ្វឺនកងរាជអាវុធហត្ថ ភ្នំជុំរីករាយ គណៈប្រតិភូ ១ក្រុម ដឹកនាំដោយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំគណៈប្រតិភូ អញ្ជើញចុះត្រួតពិនិត្យកាងារសាងសង់ហេដ្ឋារចនាសម្ព័ន្ធ មជ្ឈមណ្ឌលហ្វឹកហ្វឺន កងរាជអាវុធហត្ថ ភ្នំជុំរីករាយ ស្ថិតនៅក្នុងស្រុកសាមគ្គីមានជ័យ ខេត្តកំពង់ឆ្នាំង។ ក្នុងដំណើរទស្សនកិច្ចនេះ ក៏មានការអញ្ជើញចូលរួមពីសំណាក់ ឯកឧត្តម ថោង ខុន រដ្ឋមន្ត្រីក្រសួង ទេសចរណ៍ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ព្រមទាំងមន្ត្រីជាន់ខ្ពស់ជាច្រើនរូបទៀត។
ក្នុងដំណើរត្រួតពិនិត្យនេះ ត្រូវបានទទួលស្វាគមន៍ដោយ លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ព្រមទាំងឧត្តមសេនីយ៍ នាយទាហានជាន់ខ្ពស់នៃកងរាជអាវុធហត្ថ ជាច្រើនរូបទៀតផង។
លោកឧត្តមសេនីយ៍ឯក ភួង ស៊ីភិន មេបញ្ជាការរងកងរាជអាវុធហត្ថលើផ្ទៃប្រទេស បានធ្វើបទបង្ហាញជូនគណៈប្រតិភូ អំពីការសាងសង់ទីលានបាញ់គ្រាប់ពិត ឃ្លាំងគ្រាប់ ឃ្លាំងអាវុធ ស្ថានីយផលិតទឹកស្អាតទី២ ឃ្លាំងភ័ស្តុភាបច្ចេកទេស ទីតាំងមណ្ឌលពហុសិក្សា អគារទីចាត់ការ អាងស្តុកទឹក វេទិកា ការសិក្សារបស់សិក្ខាកាម និងអគារស្នាក់នៅ ហេដ្ឋារចនាសម្ព័ន្ធរបស់មជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំរីករាយ ដែលបានចាប់ផ្តើមដំណើរការសាងសង់ ពីឆ្នាំ២០១៣ ក្នុងផ្ទៃដីប្រមាណ ៥០០០ហិកតា និងបានដំណើរការសាងសង់ រហូតមកទល់នឹងពេលនេះ សម្រេចតាមផែនការដែលបានគ្រោងទុក នឹងបញ្ចប់ការសាងសង់ នៅឆ្នាំ២០២២ ខាងមុខ ហើយមជ្ឈមណ្ឌលហ្វឹកហ្វឺននេះ នឹងក្លាយជាកន្លែងហ្វឹកហ្វឺនដ៏ធំមួយ សម្រាប់កងរាជអាវុធហត្ថ និងកងយោធពលខេមរភូមិន្ទ ហើយក៏ជាកន្លែងសម្រាប់ធ្វើការប្រកួតបាញ់កាំភ្លើងអាស៊ាន នៅក្នុងឱកាសដែលកម្ពុជា ធ្វើជាម្ចាស់ផ្ទះនៃកីឡា SEA Games ឆ្នាំ២០២៣ ខាងមុខផងដែរ៕
#អរគុណសន្តិភាព
