ចិន ៖ ទីភ្នាក់ងារព័ត៌មានស៊ីនហួ បានរាយការណ៍កាលពីថ្ងៃទី១៥ ខែវិច្ឆិកាថា បច្ចុប្បន្ន ប្រទេសចិនបានដំឡើងស្ថានីយមូលដ្ឋាន 5G រួចរាល់ហើយ ជិត ៧០០ ០០០កន្លែង ដែលនេះជាចំនួនមួយ ច្រើនជាងការដំឡើងស្ថានីយ 5G ទាំងអស់នៅក្នុងតំបន់ផ្សេងៗរបស់ពិភពលោកដល់ទៅ ២ដង។
ក្នុងរយៈពេល ៣ឆ្នាំខាងមុខទៀត គេរំពឹងថា ប្រទេសចិន នឹងស្ថិតក្នុងដំណាក់កាលណែនាំសេវាកម្មប្រព័ន្ធ 5G មុនចូលឆ្ពោះទៅរកទីផ្សារ ដូច្នេះហើយទើប ប្រទេសចិន ចាំបាច់ត្រូវតែដំណើរការបែបវាយលុកលើការកសាងស្ថានីយទាំងនោះ។
តិចណូឡូជី 5G កំពុងតែចូលមកមានតួនាទីសំខាន់ក្នុងផ្នែកផ្សេងៗ ជាពិសេសបំផុត ក្នុងការថែរក្សាស្ថិរភាពការវិនិយោគទុន ជំរុញការប្រើប្រាស់ និងបង្កើនយន្តការថ្មីៗក្នុងការអភិវឌ្ឍសេដ្ឋកិច្ច។
ការអភិវឌ្ឍបណ្ដាញ 5G របស់ប្រទេសចិន ទទួលបានលទ្ធផលដ៏ល្អអស្ចារ្យ ដោយចំនួនការលក់ទូរស័ព្ទដៃប្រព័ន្ធ 5G ក្នុងអំឡុង ១០ខែនៃឆ្នាំ២០២០នេះ មានខ្ពស់ដល់ទៅ ១២៤លានគ្រឿង ដោយក្នុងនោះមានស៊េរីថ្មីៗចូលក្នុងទីផ្សារដល់ទៅ ១៨៣ស៊េរី៕
ប្រភព៖ សារព័ត៌មានបរទេស
#អរគុណសន្តិភាព
