ភ្នំពេញ៖ លោក ប៊ុន សុភក្តិរិទ្ធ អគ្គនាយករងនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានមានប្រសាសន៍ថា ការប្រកួតប្រជែងមិនស្មោះត្រង់នៅក្នុងធុរកិច្ចវិស័យប្រេងឥន្ធនៈ អាចបង្កផលប៉ះពាល់ដល់ជីវភាពសេដ្ឋកិច្ចរបស់អ្នកប្រើប្រាស់។
លោក ថ្លែងបែបនេះ នៅក្នុងពិធីផ្សព្វផ្សាយស្តីពីការយល់ដឹង អំពីខ្លឹមសារនៃច្បាប់ កិច្ចការពារអ្នកប្រើប្រាស់បទបញ្ញត្តិពាក់ព័ន្ធនឹងការធ្វើអាជីវកម្មផលិតផលប្រេងឥន្ធនៈដល់អាជីវករ ម្ចាស់ស្ថានីយ និងដេប៉ូប្រេងឥន្ធនៈនៅក្នុងខេត្តមណ្ឌលគិរី នៅផ្ទះសំណាក់ពេជ្រាដា ក្រុងសែនមនោរម្យ នាព្រឹកថ្ងៃទី ២៣ ខែ វិច្ឆិកា ឆ្នាំ២០២។ ពិធីផ្សព្វផ្សាយនេះ មានការអញ្ជើញចូលរួមពីសំណាក់លោក ជាក់ ម៉េងហ៊ាង អភិបាលរងខេត្តមណ្ឌលគិរី លោក លឹម ស្រេង ប្រធានមន្ទីរពាណិជ្ជកម្មខេត្ត លោក ណាល់ វិចិត្រ ប្រធានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំសាខាខេត្ត មន្ទីរអង្គភាពពាក់ព័ន្ធ និងអាជីវករ ម្ចាស់ស្ថានីយ និងដេប៉ូប្រេងឥន្ធនៈ នៅក្នុងខេត្ត ជាច្រើនរូប។
លោក ប៊ុន សុភក្តិរិទ្ធ បានឱ្យដឹងថា ដើម្បីការពារអ្នកប្រើប្រាស់អំពីការក្លែងបន្លំផ្នែកសេដ្ឋកិច្ច ក៏ដូចជាផលប៉ះពាល់ សុខុមាលភាពសង្គម ការពង្រឹងការអនុវត្តច្បាប់ គឺជាការងារអាទិភាព ។ការផ្គត់ផ្គង់ប្រេងឥន្ធនៈនៅប្រទេសកម្ពុជា ត្រូវបានចាត់ចូលក្នុងវិស័យសហគ្រាសធុនតូច និងមធ្យម ដែលជាផ្នែកមួយនៃឆ្អឹងខ្នងសេដ្ឋកិច្ចជាតិ ដូច្នេះ ការធ្វើអធិការកិច្ចទៅលើស្ថានីយចែកចាយប្រេងឥន្ធនៈ ត្រូវបានក្រសួងពាណិជ្ជកម្មចាត់ទុកជាកម្មវិធីមួយយ៉ាងសំខាន់ សំដៅធានាការដាក់លក់ឱ្យបានត្រឹមត្រូវទាំងបរិមាណ គុណភាព និងតម្លៃលក់រាយ។ លោក បញ្ជាក់ថា គោលបំណង នៃពិធីផ្សព្វផ្សាយនេះ ដើម្បីជំរុញការអនុវត្តមានភាពស្មោះត្រង់នៅក្នុងអាជីវកម្ម ធានាទីផ្សារនៅក្នុងស្រុក ប្រកបទៅដោយ ទំនុកចិត្តពីអ្នកប្រើប្រាស់ និងលើកស្ទួយកិត្យានុភាពជាតិ ការធានាការធ្វើអាជីវកម្មប្រកបដោយសុចរិត និងមិនមែនដាក់បន្ទុក ទៅលើវិស័យឯកជន មិនមានតម្រូវឲ្យបង់ថ្លៃសេវាត្រួតពិនិត្យ ហើយគោលដៅដែលត្រូវធ្វើអធិការកិច្ច គឺស្ថានីយ និង ដេប៉ូ ចែកចាយប្រេងឥន្ធនៈនៅទូទាំងប្រទេស និងអនុវត្តច្បាប់ចំពោះអ្នកបំពាន តាមរយៈការពិន័យអន្តរការណ៍ ឫ វិធានការតុលាការ ក្នុងករណីមិនរាងចាល។
លោក ជាក់ ម៉េងហ៊ាង អភិបាលរងខេត្តមណ្ឌលគិរី បានកោតសរសើរចំពោះមន្ត្រី ការពារអ្នកប្រើប្រាស់កិច្ចការ ប្រកួតប្រជែង និងបង្ក្រាបការក្លែងបន្លំសាខាខេត្ត និងមន្ទីរពាណិជ្ជកម្មខេត្ត ដែលកន្លងមកបានខិតខំក្នុងការត្រួតពិនិត្យតាម ស្ថានីយប្រេងឥន្ធនៈ និង ដេប៉ូចែកចាយក្នុងខេត្ត ដើម្បីពិនិត្យនូវបរិមាណ គុណភាព និងតម្លៃលក់រាយជាដើម ហើយក្នុងនោះ រដ្ឋបាលខេត្ត ក៏បានធ្វើការគាំទ្រនូវការផ្សព្វផ្សាយច្បាប់ ស្តីពីកិច្ចការពារអ្នកប្រើប្រាស់ បទបញ្ញត្តិពាក់ព័ន្ធនឹងការធ្វើអាជីវកម្ម ផលិតផលប្រេងឥន្ធនៈនេះ។
លោក អភិបាលរងខេត្ត បានជំរុញដល់អាជីវករដែលមានស្ថានីយ៍ប្រេងឥន្ធនៈ និងដេប៉ូចែកចាយ ទាំងអស់នៅក្នុងខេត្តមណ្ឌលគិរី ត្រូវមកសុំច្បាប់អាជីវកម្មរបស់ខ្លួនឱ្យបានត្រឹមត្រូវ មិនត្រូវគេចវេសនោះឡើយ ហើយសុំឱ្យមន្ត្រីជំនាញ ត្រូវចុះត្រួតពិនិត្យទៅតាមស្ថានីយ និងដេប៉ូចែកចាយប្រេងឥន្ធនៈទាំងអស់ឱ្យមានប្រសិទ្ធភាព ដើម្បីធានាដល់អ្នកប្រើប្រាស់ក្នុងបរិមាណ ក៏ដូចជាគុណភាព៕
#អរគុណសន្តិភាព
