បរទេស៖ មូលនិធិដើម្បីកុមារ របស់អង្គការសហប្រជាជាតិ (UNICEF) បានប្រកាសពីផែនការចែកចាយវ៉ាក់សាំងប្រឆាំងវីរុសកូរ៉ូណាប្រភេទថ្មី ចំនួនជិត ២០០០លានដូស ទៅឱ្យក្រុមប្រទេសកំពុងអភិវឌ្ឍន៍ នៅក្នុងឆ្នាំ២០២១ ដែលអាចនិយាយបានថា នេះជាភារកិច្ចសំខាន់មួយ ដែលឆ្លើយតបនឹងការទាមទាររបស់មេដឹកនាំទូទាំងពិភពលោក ដែលត្រូវការឱ្យវ៉ាក់សាំងកូវីដ-១៩ ត្រូវបានចែកចាយទៅគ្រប់ប្រទេស យ៉ាងទូលំទូលាយ និងយុត្តិធម៌។
យូនីសេហ្វ បានទំនាក់ទំនងទៅខាងក្រុមហ៊ុនអាកាសចរណ៍ និងក្រុមហ៊ុនដឹកជញ្ជូនចំនួន ៣៥០កន្លែង ដើម្បីត្រៀមចាត់បញ្ជូនវ៉ាក់សាំង និងម្ជុលចាក់ថ្នាំ ១០០០លានឈុត ទៅឱ្យក្រុមប្រទេសក្រីក្រ ដូចជា ប្រទេសប៊ុរុនឌី អាហ្វហ្គានីស្ថាន និងយេមែន ជាដើម តាមគ្រោងការចែកចាយវ៉ាក់សាំង COVAX របស់អង្គការសុខភាពពិភពលោក WHO។
“កិច្ចសហការ ដ៏មានតម្លៃនេះ នឹងដំណើរការក្នុងរយៈពេលវែង ដើម្បីឱ្យប្រាកដក្នុងចិត្តថា យើងនឹងមានសក្ដានុពលផ្នែកការដឹកជញ្ជូនដែលគ្រប់គ្រាន់ សម្រាប់ប្រតិបត្តិការដ៏អស្ចារ្យជាប្រវត្តិសាស្ត្រនេះ” លោក អេតឡេវ៉ា ខាឌីលលី អគ្គនាយកផ្នែកបញ្ជូនកម្លាំង និងសេវាកម្មរបស់យូនីសេហ្វបានថ្លែងបែបនេះ។
គ្រោងការ COVAX ដែលជាកិច្ចសហការរវាង WHO ជាមួយស្ថាប័នសម្ព័ន្ធមិត្តដើម្បីវ៉ាក់សាំង(GAVI) និងក្រុមសម្ព័ន្ធមិត្ត រួមសហការផ្នែកនវានុវត្តន៍ ដើម្បីទប់ទល់នឹងជំងឺរាតត្បាត (Coalition for Epidemic Preparedness Innovation-CEPI) មានគោលបំណងដើម្បីបញ្ចុះបញ្ចូលរដ្ឋាភិបាលទូទាំងពិភពលោក កុំឱ្យប្រមូលទិញវ៉ាក់សាំងកូវីដ-១៩ ទុកសម្រាប់តែពលរដ្ឋរបស់ខ្លួនឯង និងសង្កត់ធ្ងន់លើការចែករំលែកទៅឱ្យប្រជាជន ដែលស្ថិតក្នុងក្រុមប្រថុយប្រថានខ្លាំងបំផុត នៅក្នុងគ្រប់ប្រទេសមុនគេបង្អស់។
ក្នុងអំឡុងកិច្ចប្រជុំសាំមីត G20 កាលពីអំឡុងចុងសប្ដាហ៍មុន មេដឹកនាំក្រុម ២០ប្រទេស ដែលមានសេដ្ឋកិច្ចធំជាងគេបំផុតក្នុងពិភពលោក សុទ្ធតែបានផ្ដល់ការសន្យាថា នឹងចែករំលែកវ៉ាក់សាំងប្រឆាំងមេរោគកូវីដ-១៩, ថ្នាំព្យាបាល និងឈុតពិនិត្យវីរុស យ៉ាងយុត្តិធម៌ ដើម្បីមិនឱ្យប្រទេសក្រីក្រ ត្រូវគេបោះបង់ចោលនៅក្រោយខ្នង។
ទាំងអស់នេះ សក្ដានុពល ក្នុងការចូលដល់វ៉ាក់សាំងរបស់ប្រទេសនីមួយ វាមិនស្មើភាពគ្នាស្រាប់ទៅហើយ តាំងពីពេលមុនមានកូវីដ-១៩ ម្ល៉េះ ដោយទិន្នន័យ ពីអង្គការសុខភាពពិភពលោក WHO បានបញ្ជាក់ថា មានទារកកើតថ្មីប្រមាណ ២០លាននាក់ មិនបានទទួលវ៉ាក់សាំង ដែលអាចឃុំគ្រងការពារជីវិតពួកគេ ពីជំងឺកាចសាហាវ, សេចក្ដីស្លាប់, ពិការភាព និងបញ្ហាសុខភាពផ្សេង។
យូនីសេហ្វ គឺជាស្ថាប័នដែលចាត់ចែងទិញវ៉ាក់សាំងដ៏ធំបំផុតមួយក្នុងពិភពលោក ដោយក្នុង ឆ្នាំៗ នឹងមានការបញ្ជាទិញវ៉ាក់សាំងច្រើនជាង ២០០០លានដូស ដើម្បីនាំយកទៅចាក់បន្ថែម តាមជុំប្រក្រតី និងចាក់ដើម្បីការពារជំងឺឆ្លងផ្សេងៗ នៅជិត ១០០ប្រទេស។
វ៉ាក់សាំងប្រឆាំងកូវីដ-១៩ របស់ក្រុមហ៊ុន ហ្វ៉ៃហ្ស៊ើរ អ៊ិងក៍ និងបៃអូអ៊ែនថេក ត្រូវបានរំពឹងថា នឹងបានទទួលភ្លើងបៃតង ពីរដ្ឋបាលសហរដ្ឋអាមេរិក និងអឺរ៉ុប ដើម្បីប្រើការក្នុងករណីអាសន្ន ក្នុងអំឡុងខែធ្នូ ខាងមុខនេះ ក្រោយពីលទ្ធផលនៃការសាកល្បង បានរកឃើញថា មានប្រសិទ្ធភាពខ្ពស់បំផុត ដល់ទៅ ៩៥% និងមិនបង្កឱ្យមានផលប៉ះពាល់ដែលធ្ងន់ធ្ងរឡើយ។
ចំណែកខាង ក្រុមហ៊ុនផលិតឱសថ ម៉ូឌើណា ក៏បានបង្ហើបប្រាប់ពីរបាយការណ៍បឋម កាលពីសប្ដាហ៍កន្លងទៅដែរថា វ៉ាក់សាំងកូវីដ-១៩ ដែលក្រុមហ៊ុនកំពុងស្រាវជ្រាវឡើង មានប្រសិទ្ធភាពក្នុងការការពារការឆ្លងមេរោគបានខ្ពស់ដល់ទៅ ៩៤,៥%៕
ប្រភព៖ សារព័ត៌មានបរទេស
#អរគុណសន្តិភាព
