ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍នៃប្រទេសកម្ពុជា និងជាអនុប្រធានអចិន្ត្រយ៍នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ថា CAMSOC បានអញ្ជើញដឹកនាំគណៈប្រតិភូចុះត្រួតពិនិត្យមើលការសាងសង់កីឡដ្ឋានធំ នៃពហុកីឡដ្ឋានជាតិមរតកតេជោ ស្ថិតនៅខណ្ឌជ្រោយចង្វារ រាជធានីភ្នំពេញ កាលពីព្រឹកថ្ងៃទី២៨ ខែធ្នូ ឆ្នាំ២០២០ នេះបើតាមការចេញផ្សាយរបស់ CAMSOC។
ផ្អែកតាមប្រភពដដែល ឯកឧត្តម ថោង ខុន បានមានប្រសាសន៍ក្នុងពេលនោះថា ទោះស្ថិតក្នុងស្ថានភាពវិបត្តិជំងឺកូវីដ-១៩ក៏ដោយ ក៏ដំណើរការសាងសង់នៅតែបន្តធ្វើយ៉ាងសកម្ម ប្រកបដោយការទទួលខុសត្រូវខ្ពស់ ដើម្បីបញ្ចប់តាមគម្រោង នាអំឡុងខែឧសភា ឆ្នាំ២០២១ខាងមុខនេះ។ ក្រុមហ៊ុនចិនដែលសាងសង់កីឡដ្ឋានធំបាននិងកំពុងគ្រប់គ្រងកម្មករខ្មែរ-ចិនជាង៥០០នាក់បានល្អណាស់ ក្នុងនោះ មានកម្មករខ្មែរជាង៣០០នាក់ ដោយយឺតយ៉ាវតែទៅលើការដឹកជញ្ជូនសម្ភារៈ បំពាក់ដំបូលប៉ុណ្ណោះ ដែលត្រូវបញ្ជាទិញមកពីអាល្លឺម៉ង់។
ពហុកីឡាដ្ឋានជាតិមរតកតេជោគ្រោងចំណាយការសាងសង់សរុបទាំងអស់ ជិត១៦០លានដុល្លារអាមេរិក គឺជាជំនួយឥតសំណងទាំងស្រុងរបស់សាធារណរដ្ឋប្រជាមានិតចិន អាចផ្ទុកអ្នកទស្សនាប្រមាណ៦ម៉ឺននាក់ ពេលសាងសង់រួចរាល់៕
#អរគុណសន្តិភាព
