ឆ្នាំ២០២០ ៖ប្រទេសនានា បានបើកឆាកឡើង ដោយការអបអរសាទរយ៉ាងសប្បាយរីករាយ ដូចរៀងរាល់ឆ្នាំកន្លងមក តែមានហេតុការណ៍ខុសប្រក្រតីមួយ បានផ្លាស់ប្ដូរពិភពលោកយ៉ាងធំធេង និងមិនធ្លាប់កើតមានពីមុនមក បានបង្ហាញខ្លួនឡើងនៅក្នុងទីក្រុង វូហាន មណ្ឌលហ៊ូពេយ ភាគកណ្ដាលប្រទេសចិន ដោយរដ្ឋបាលនៅក្នុងតំបន់នោះ បានរកឃើញ មានអ្នកកើតជំងឺអាថ៌កំបាំងមួយជាច្រើនសិបនាក់ មានអាការរលាកសួត ស្រដៀងនឹងជំងឺសារស៍ (Sars)…។
-ថ្ងៃទី៧ មករា ការឆ្លងរាលដាល ត្រូវបានបញ្ជាក់ថា មានប្រភពកំណើតមកពីមេរោគ “វីរុសកូរ៉ូណាប្រភេទថ្មី។
-១១ មករា អ្នកស្លាប់ដំបូងគេដោយសារវីរុសប្រភេទនេះ ជាបុរសម្នាក់ អាយុ ៦១ឆ្នាំ រស់នៅក្នុងទីក្រុងវូហាន។
-២០ មករា អង្គការសុខភាពពិភពលោក ឬ WHO ថ្លែងការណ៍ អំពីការរកឃើញអ្នកជំងឺនៅក្រៅប្រទេសចិន ជាលើកដំបូងនៅក្នុងប្រទេសថៃ តាមដោយប្រទេសជប៉ុន និងកូរ៉េខាងត្បូង។
-២១ មករា សហរដ្ឋអាមេរិក រកឃើញអ្នកជំងឺដំបូងគេរបស់ប្រទេស ជាបុរសម្នាក់ស្ថិតក្នុងអំឡុងអាយុ ៣០ឆ្នាំ រស់នៅក្នុងរដ្ឋវ៉ាស៊ីនតោន។
-២៣ មករា រដ្ឋាភិបាលចិន បញ្ជាឱ្យបង្ខាំងខ្លួនប្រជាជនវូហាន ១១លាននាក់ឱ្យនៅដោយឡែក ផ្អាកសេវាកម្មរថភ្លើង និងយន្តហោះទាំងអស់ដែលចាកចេញពីក្រុងវូហាន ចំណែកក្នុងទីក្រុងវិញ មានការផ្អាកសេវាកម្មដឹកជញ្ជូនសាធារណៈ រថភ្លើងក្រោមដី និងនាវាដឹកអ្នកដំណើរ។
-៣០ មករា WHO ប្រកាសថា ការឆ្លងរាលដាលរបស់វីរុសកូរ៉ូណាប្រភេទថ្មី គឺជាសភាវអាសន្នផ្នែកសុខភាពសាធារណៈលំដាប់ពិភពលោក ដោយសារតែអ្នកឆ្លងមេរោគមិនបង្ហាញអាការ ដែលនៅពេលនោះបានរកឃើញរួចហើយចំនួន ៩ ០០០នាក់ នៅក្នុង ១៩ប្រទេសទូទាំងពិភពលោក។
ខែកុម្ភៈ
-៧ កុម្ភៈ លោកវេជ្ជបណ្ឌិត លី វឹនលៀង គ្រូពេទ្យជំនាញផ្នែកជំងឺភ្នែក អាយុ ៣៤ឆ្នាំ នៃមន្ទីរពេទ្យមជ្ឈិមក្រុងវូហាន បានប្រកាសដាស់តឿនមិត្តភក្តិគ្រូពេទ្យដូចគ្នា អំពីការឆ្លងរាលដាលរបស់ជំងឺនេះ តែត្រូវអាជ្ញាធររដ្ឋ ចាប់ឃុំខ្លួន យកទៅអប់រំកែសម្រួលទស្សនគតិ និងបានស្លាប់ដោយសារឆ្លងមេរោគវីរុសកំណាចនេះដូចគ្នា ធ្វើឱ្យកើតមានការមិនសប្បាយចិត្តឡើងនៅក្នុងសង្គម និងមានការប្រារព្ធពិធីកាន់ទុក្ខ និងរំឭកគុណលោកវេជ្ជបណ្ឌិតលី ទូទាំងប្រទេស។
-៩ កុម្ភៈ ចំនួនអ្នកស្លាប់ដោយសារវីរុសកូរ៉ូណាប្រភេទថ្មី នៅក្នុងប្រទេសចិនបានកើនឡើងចំនួន ៨១១នាក់ លើសចំនួនអ្នកស្លាប់ដោយសារជំងឺសារស៍ កាលពីឆ្នាំ២០០៣។
-១១ កុម្ភៈ WHO បានប្រកាសថា ជំងឺរាតត្បាតក្នុងគ្រានេះ កើតឡើងដោយសារមេរោគវីរុសកូរ៉ូណាប្រភេទថ្មី និងមានឈ្មោះជាផ្លូវការថា “កូវីដ-១៩”
បន្ទាប់ពីនោះ មានប្រទេសជាច្រើនទូទាំងពិភពលោក បានរកឃើញអ្នកជំងឺ ឬអ្នកស្លាប់ជាបន្តបន្ទាប់ ហើយនៅពេលនោះ ប្រទេសអ៊ីតាលី គឺជាប្រទេសដែលប្រឈមនឹងវិបត្តិជំងឺកូវីដ-១៩ ដែលបានរាតត្បាតយ៉ាងធ្ងន់ធ្ងរបំផុតនៅក្នុងទ្វីបអឺរ៉ុប ចំណែកប្រទេសអ៊ីរ៉ង់ មានអ្នកស្លាប់ ៤៣នាក់ ច្រើនជាងប្រទេសចិន ដែលជាប្រទេសកើតជំងឺនេះដំបូងគេ នៅថ្ងៃទី២៨ កុម្ភៈ។
-២៩ កុម្ភៈ លោកប្រធានាធិបតី ដូណាល់ ត្រាំ នៃសហរដ្ឋអាមេរិក បានប្រកាសកម្រិតការធ្វើដំណើរទៅប្រទេសអ៊ីរ៉ង់ រួមទាំងលើកកម្ពស់ការដាស់តឿនការធ្វើដំណើរទៅប្រទេសអ៊ីតាលី និងកូរ៉េខាងត្បូង ហើយក្នុងថ្ងៃជាមួយគ្នានោះ សហរដ្ឋអាមេរិក បានរកឃើញ អ្នកស្លាប់ដំបូងគេនៅក្នុងប្រទេស ជាបុរសម្នាក់ អាយុ ៥០ឆ្នាំ រស់នៅក្នុងរដ្ឋវ៉ាស៊ីនតោន។
ខែមីនា
-១ មីនា ថៃ ជាប្រទេសទី១០ ក្នុងពិភពលោក ដែលមានអ្នកស្លាប់ដំបូងគេដោយសារជំងឺកូវីដ-១៩ ជាមនុស្សប្រុស អាយុ ៣៥ឆ្នាំ។
-៣ មីនា រដ្ឋបាលទីក្រុងវូហាន បានដឹកជញ្ជូនអ្នកជំងឺកូវីដ-១៩ ទៅឯមន្ទីរពេទ្យ លើយឈឹនសាន ដែលទើបសាងសង់ឡើងថ្មី ដើម្បីទុកព្យាបាលអ្នកឆ្លងមេរោគវីរុសមរណៈនេះដោយឡែក និងសាងសង់ឡើងដោយប្រើរយៈពេលត្រឹមតែ ១០ថ្ងៃប៉ុណ្ណោះ និងជាមន្ទីរពេទ្យសង្គ្រោះបន្ទាន់ទី២ នៅក្នុងទីក្រុងវូហាន បន្ទាប់ពីមន្ទីរពេទ្យ ហួឈឹនសាន។
(សូមរង់ចាំអានបន្តនៅថ្ងៃស្អែក)
ប្រភព៖ សារព័ត៌មានបរទេស
បកប្រែ និងកែសម្រួលដោយ បុរសភ្នែក៤
#អរគុណសន្តិភាព
