បរទេស៖ មានតែមិនប៉ុន្មានឆ្នាំប៉ុណ្ណោះ ដែលកើតមានហេតុការណ៍សំខាន់ៗ ដែលហុចផលប៉ះពាល់ដល់ទូទាំងពិភពលោក ហើយឆ្នាំ២០២០ ក៏ជាឆ្នាំមួយក្នុងចំណោមឆ្នាំទាំងនោះដែរ ដែលមនុស្សម្នាទូទាំងពិភពលោក សុទ្ធតែត្រូវប្រឈមនឹងការឆ្លងរាលដាលរបស់មេរោគកូវីដ-១៩។
តែយ៉ាងណាក៏ដោយ ក្នុងអំឡុងពេល ១២ខែកន្លងទៅនោះ មិនមែនមានតែរឿងវីរុសកូរ៉ូណាប្រភេទថ្មីតែមួយនោះប៉ុណ្ណោះទេ…។
អីលូវយើងនាំគ្នាត្រឡប់ទៅមើល ១០ហេតុការណ៍សំខាន់ក្នុងទ្វីបអាស៊ី ដែលមិនមានពាក់ព័ន្ធនឹងជំងឺកូវីដ-១៩ទាល់តែសោះ ដូចតទៅ…៖
១-ថ្ងៃទី២៤ កុម្ភៈ ២០២០ ៖ ប្រជាជនបង្កហេតុការណ៍ចលាចលដ៏អាក្រក់ និងសាហាវបំផុតក្នុងជុំរាប់សិបទសវត្សរ៍កន្លងមក ក្នុងទីក្រុងនីវដេលី ប្រទេសឥណ្ឌា
រូបភាពនេះ ជារូបភាពដែលអ្នកកាន់សាសនាហិណ្ឌូ កំពុងចោមរោមវាយដំបុរសជនជាតិមូស្លីមម្នាក់យ៉ាងឃោរឃៅ ដែលវាបានក្លាយជារូបភាពដ៏សំខាន់មួយ នៃហេតុការណ៍ចលាចលខាងសាសនា នៅក្នុងទីក្រុងនីវដេលី កាលពីខែកុម្ភៈ។
“អ្នកដែលបានឃើញរូបភាពនេះ គ្មានអ្នកណាម្នាក់គិតថា ខ្ញុំរួចជីវិតនោះទេ” លោកម៉ូហាម៉ាត់ ស៊ូបាអ៊ីរ បានថ្លែងប្រាប់ទីភ្នាក់ងារព័ត៌មានBBC ក្រោយពេលចេញពីមន្ទីរពេទ្យ ក្នុងសភាពដែលក្បាលរបស់លោក នៅត្រូវរុំដោយក្រណាត់បង់រុំរបួសនៅឡើយ។
ការប្រើកម្លាំងបាយប្រទូសរ៉ាយ ក្នុងអំឡុងការតវ៉ា ដែលមានមូលហេតុមកពីច្បាប់សញ្ជាតិថ្មី របស់ប្រទេសឥណ្ឌា បានធ្វើឱ្យលោកស៊ូបាអ៊ីរ ប៊ិះនឹងស្លាប់ តែបុរសវ័យ ៣៧ឆ្នាំរូបនេះ ក៏រួចជីវិតមកបាន ទោះជារងរបួសយ៉ាងធ្ងន់ធ្ងរក៏ដោយ។
ខណៈដែលមានអ្នកស្លាប់ដោយសារហេតុការណ៍ចលាចលនេះ ច្រើនជាង ៥០នាក់ និងមានអ្នកត្រូវភៀសខ្លួនចេញពីផ្ទះជាច្រើនពាន់នាក់ទៀត។ នេះគឺជាការចលាចលដែលបង្កដោយប្រជាជនមួយ ដែលអាក្រក់ និងឃោរឃៅបំផុត ដែលបានកើតឡើងនៅក្នុងទីក្រុងចម្បងរបស់ប្រទេសឥណ្ឌា ក្នុងជុំច្រើនសិបឆ្នាំកន្លងមកនេះ។
តែលោក ស៊ូបាអ៊ីរ បានថ្លែងថា លោកនៅតែមិនអស់ជំនឿលើភាពមនុស្សធម៌ “មនុស្សដែលធ្វើអំពើដ៏កាចសាហាវបែបនេះ មិនអាចជាមនុស្សរបស់សាសនាដ៏ល្អបានទេ” លោកថ្លែងយ៉ាងដូច្នេះនៅទីបញ្ចប់។
២-ថ្ងៃទី១៦ មិថុនា ២០២០ ៖ នៅពេលដែលសេចក្ដីសង្ឃឹមថាមានសន្តិភាព រវាងប្រទេសកូរ៉េខាងជើង និងកូរ៉េខាងត្បូង ត្រូវរលំរលាយ ក្លាយមកត្រឹមតែជាផ្សែង
ការិយាល័យទំនាក់ទំនងការងាររវាងប្រទេសកូរ៉េខាងជើង និងកូរ៉េខាងត្បូង គឺជានិមិត្តរូប នៃសេចក្ដីសង្ឃឹមថា នឹងកើតមានសន្តិភាពនាយុគសម័យថ្មីនេះ។
ទីនេះ គឺជាទីកន្លែងដែលប្រទេសទាំង២ បានរៀបចំកិច្ចចរចារវាងគ្នាដោយផ្ទាល់ ជាលើកដំបូង ចាប់តាំងពីសង្គ្រាមកូរ៉េត្រូវបានបញ្ចប់…តែនៅខែមិថុនា ទីកន្លែងនេះ បែរជារលំរលាយក្លាយជាផ្សែង…។
រដ្ឋបាលកូរ៉េខាងជើង បានបំផ្ទុះគ្រាប់បែកកម្ទេចអគារមួយនេះ ដោយបានបញ្ជាក់ថា ត្រូវការឱ្យ “កម្ទេចសំរាមមនុស្ស និងអ្នកដែលផ្ដល់ការការពារកម្ទេចសំរាមពួកនេះ ត្រូវតែសងមកវិញយ៉ាងស័ក្តិសម ពីឧក្រិដ្ឋកម្មដែលពួកគេបានបង្កឡើង”
នោះគឺ សំដៅទៅលើពួកក្រុមអ្នកក្បត់ប្រទេស ដែលរស់នៅក្នុងប្រទេសកូរ៉េខាងត្បូងទាំងឡាយ ដែលបានចែកចាយខិត្តប័ណ្ណប្រឆាំងរបបលោកគីម ជុងអ៊ុន ចូលទៅក្នុងប្រទេសកូរ៉េខាងជើង ដោយប្រើបាល់ឡុងហោះ ឬមិនទេក៏ដាក់ចូលក្នុងដប បណ្ដែតទៅតាមទឹកទន្លេ ក្នុងអំឡុងច្រើនឆ្នាំកន្លងមក។
អគារនេះ ត្រូវបានទុកចោលមកតាំងពីខែមករា ដោយសារតែមេរោគកូវីដ-១៩ តែសំឡេងគ្រាប់បែកផ្ទុះកម្ទេចអគារក្នុងគ្រានោះ នៅតែលាន់ឮកងរំពងនៅក្នុងពិភពលោក។
វាជាសញ្ញាដែលបញ្ជាក់ច្បាស់ រដ្ឋបាលកូរ៉េខាងជើង មិនសប្បាយចិត្តយ៉ាងខ្លាំង និងតាមដែលអ្នកវិភាគម្នាក់បានថ្លែងថា ហេតុការណ៍នេះគឺ “ជាចំណុចផ្លាស់ប្ដូរ ដែលជាប្រផ្នូលអាក្រក់បំផុតរបស់ប្រទេសទាំង២។
ចុចអានភាគ២៖ រំឭកហេតុការណ៍សំខាន់ៗប្រចាំឆ្នាំ២០២០ ដែលធ្វើឱ្យទ្វីបអាស៊ី ត្រូវញ័ររញ្ជួយ ក្រៅពីមេរោគកំណាចកូវីដ-១៩
ប្រភព៖ ទីភ្នាក់ងារព័ត៌មាន BBC
បកប្រែ និងកែសម្រួលដោយ បុរសភ្នែក៤
#អរគុណសន្តិភាព
Pingback: រំឭកហេតុការណ៍សំខាន់ៗប្រចាំឆ្នាំ២០២០ ដែលធ្វើឱ្យទ្វីបអាស៊ី ត្រូវញ័ររញ្ជួយ ក្រៅពីមេរ