អាមេរិក៖ ចំនួនអ្នកស្លាប់ប្រចាំថ្ងៃ ដោយសារកូវីដ-១៩ នៅក្នុងសហរដ្ឋអាមេរិក បានបំបែកស្ថិតិចាស់ជាថ្មីម្ដងទៀត ចាប់តាំងពីមានការឆ្លងរាលដាលមក ដល់ជិត ៤ ៥០០នាក់។ នេះបើតាមទិន្នន័យរបស់មហាវិទ្យាល័យ ចន ហប់គីនស៍ កាលពីអំឡុងពេលព្រលប់ នៃថ្ងៃអង្គារ(ទី១២មករា) តាមម៉ោងក្នុងស្រុក ខណៈចំនួនអ្នកឆ្លងមេរោគសរុប ស្ថិតក្នុងតួលេខប្រមាណ ២២,៨លាននាក់។
វិបត្តិសុខភាពសាធារណៈ នៅក្នុងសហរដ្ឋអាមេរិក នៅតែស្ថិតនៅក្រៅការគ្រប់គ្រង និងទិន្នន័យកាលពីថ្ងៃអង្គារ(ទី១២មករា) អាចនិយាយបានថា ជាលើកដំបូងហើយដែលប្រទេសមួយនេះ បានរងផលប៉ះពាល់ ពីជំងឺរាតត្បាតដ៏ធំដោយសារវីរុសកូរ៉ូណាប្រភេទថ្មី ធ្ងន់ធ្ងរបំផុតក្នុងពិភពលោក ដោយមានអ្នកស្លាប់លើស ៤ ០០០នាក់ ក្នុងជុំ ២៤ម៉ោង (១ម៉ោង ស្លាប់ជាង ១៨០នាក់)។
តាមទិន្នន័យរបស់មហាវិទ្យាល័យ ចន ហប់គីនស៍ រហូតដល់ម៉ោង ២០.៣០នាទី តាមម៉ោងនៅក្នុងស្រុក(ត្រូវនឹងម៉ោង ៨.៣០ព្រឹក ថ្ងៃពុធ ទី១៣ មករា) សហរដ្ឋអាមេរិក បានរកឃើញអ្នកឆ្លងមេរោគវីរុសកូរ៉ូណាប្រភេទថ្មី ក្នុងតែ ១ថ្ងៃគត់ ចំនួន ២៣៥ ០០០នាក់ និងស្លាប់ ៤ ៤៧០នាក់ ដោយពេលនេះ មានអ្នកជំងឺកូវីដ-១៩ ដែលដេកព្យាបាលនៅក្នុងមន្ទីរពេទ្យ ប្រមាណជា ១៣១ ០០០នាក់ទៀត។
ចំណែកអត្រាជាមធ្យម ប្រចាំសប្ដាហ៍របស់អ្នកស្លាប់ដោយសារកូវីដ-១៩ ក៏អាចនិយាយបានថា ខ្ពស់បំផុតដូចគ្នា ចាប់តាំងពីមានការឆ្លងរាលដាលមក។
ដោយត្រូវប្រឈមនឹងតួលេខដ៏គួរឱ្យសោកសៅនេះ និងការបង្ហាញខ្លួនរបស់កូវីដ-១៩ ក្លាយពូជ ដែលអាចចម្លងមេរោគបានងាយជាងមុនផងនោះ អាជ្ញាធរអាមេរិក បានថ្លែងកាលពីថ្ងៃអង្គារ(ទី១២មករា) ថា បុគ្គលណាក៏ដោយ ដែលមានបំណងធ្វើដំណើរចូលមកសហរដ្ឋអាមេរិក ចាំបាច់ត្រូវតែបង្ហាញឯកសារពិសោធន៍ថា មានលទ្ធផលពិនិត្យកូវីដ-១៩ អវិជ្ជមាន មុនពេលចេញដំណើរពីគោលដៅ។
ក្រោយពីការទន្ទឹងរង់ចាំដ៏យូរមក ទីបំផុតសហរដ្ឋអាមេរិក ក៏បានចាប់ផ្ដើមគ្រោងការចាក់វ៉ាក់សាំងកូវីដ-១៩ ជាក្រុម កាលពីអំឡុងពាក់កណ្ដាលខែធ្នូ ឆ្នាំទៅ បន្ទាប់ពីបានអនុម័តឱ្យប្រើវ៉ាក់សាំង ២ប្រភេទ ក្នុងក្ដីសង្ឃឹមថា នឹងបញ្ចប់វិបត្តិផ្នែកសុខភាពសាធារណៈមួយនេះឱ្យបាន។
តែយ៉ាងណាក្ដី ការព្យាយាមទាំងនោះ បានដំណើរការទៅមុខ យ៉ាងយឺតយ៉ាវ ដោយមកដល់ពេលនេះ ទើបតែមានប្រជាជនត្រឹមតែ ៩,៣លាននាក់ប៉ុណ្ណោះ ដែលបានទទួលវ៉ាក់សាំង ១ដូសដំបូងរួចហើយ ពីចំនួនដែលត្រូវចាក់ទាំងអស់ ២ដូស ឬគិតជាភាគរយ មិនដល់ទាំង ១០% នៃចំនួនប្រជាជនទាំងអស់ផង។
រហូតមកដល់ពេលនេះ សហរដ្ឋអាមេរិក ប្រទេសដែលមានសេដ្ឋកិច្ចធំជាងគេបំផុតលើពិភពលោក មានអ្នកឆ្លងមេរោគកូវី-១៩ សរុបជាង ២២,៨លាននាក់ និងស្លាប់ទៅហើយ ប្រមាណ ៣៨០ ០០០នាក់ គិតចាប់តាំងពីមានការឆ្លងរាលដាល រហូតមកដល់ពេលនេះ៕
ប្រភព៖ ទីភ្នាក់ងារព័ត៌មាន AFP
ប្រែ និងសម្រួលដោយ តាវ៉ែនតា
#អរគុណសន្តិភាព
