ប្រទេសចិន៖ បានរាយការណ៍ ពីការរកឃើញអ្នកឆ្លងមេរោគកូវីដ-១៩ថ្មី ប្រចាំថ្ងៃ លើស ១០០នាក់ រយៈពេល ៧ថ្ងៃជាប់ៗគ្នា នៅថ្ងៃនេះ(អង្គារ ទី១៩ មករា) ដែលចំនួននេះ អាចនិយាយបានថា ខ្ពស់បំផុត ចាប់តាំងពីខែមីនា ឆ្នាំមុនមក ក្រោមស្ថានការណ៍ការឆ្លងរាលដាលដ៏គួរឱ្យព្រួយបារម្ភ នៅក្នុងមណ្ឌលមួយ ដែលស្ថិតនៅភាគខាងកើតឆៀងខាងជើងនៃប្រទេស ចាប់តាំងពីកើតមានការឆ្លងរាតត្បាតឡើង។
គណៈកម្មការសុខភាពសាធារណៈ នៃប្រទេសចិន បានបញ្ជាក់នៅក្នុងសេចក្ដីរាយការណ៍ថា ប្រទេសចិនដីគោក បានរកឃើញអ្នកឆ្លងមេរោគថ្មី ១១៨នាក់ នៅថ្ងៃទី១៨ មករា កើនឡើងពីចំនួន ១០៩នាក់ កាលពី ១ថ្ងៃមុនហ្នឹង។
ក្នុងចំណោមអ្នកឆ្លងមេរោគថ្មីទាំងនោះ មាន ១០៦នាក់ ជាការឆ្លងនៅក្នុងតំបន់ ក្នុងនោះ ៤៣នាក់ រស់នៅក្នុងមណ្ឌលជីលីន ជាតួលេខប្រចាំថ្ងៃ ខ្ពស់ជាថ្មីម្ដងទៀត របស់មណ្ឌលភាគខាងកើតឆៀងខាងជើងនៃប្រទេសចិនមួយនេះ ខណៈដែលមណ្ឌលហ៊ើពេយ ដែលនៅក្បែរៗទីក្រុងប៉េកាំង បានរាយការណ៍ពីការរកឃើញអ្នកឆ្លងមេរោគ ៣៥នាក់។
ចំណែកចំនួនដែលនៅសល់ របាយការណ៍ បានឱ្យដឹងថា រកឃើញអ្នកឆ្លងមេរោគ ១នាក់ និង ២៧នាក់ក្នុងមណ្ឌលហ៊ើលង់ចៀង ភាគខាងជើងនៃប្រទេសចិន។
ប្រជាជនជាច្រើនលាននាក់ ត្រូវស្ថិតក្នុងវិធានការ Lockdown ក្នុងអំឡុងពេលប៉ុន្មានថ្ងៃកន្លងមកនេះ ខណៈដែលទីក្រុងខ្លះ នៅប៉ែកខាងជើងរបស់ប្រទេសចិន បានដំណើរការពិនិត្យ រកមេរោគកូវីដ-១៩ បែបសហគមន៍ ក្រោមក្ដីកង្វល់ថា ការឆ្លងមេរោគបែបពិនិត្យហើយ រកមិនឃើញ អាចនឹងឆ្លងរាលដាលយ៉ាងឆាប់រហ័សក្នុងអំឡុងរដូវកាលចូលឆ្នាំចិន ដែលនៅសល់តែប៉ុន្មានសប្ដាហ៍ទៀតប៉ុណ្ណោះនឹងមកដល់។
អាជ្ញាធរ បានណែនាំប្រជាជន ឱ្យផ្អាកការធ្វើដំណើរ ដែលមិនចាំបាច់ ក្នុងអំឡុងថ្ងៃចូលឆ្នាំចិន នាខែខាងមុខ ដែលជាប្រក្រតី នឹងមានអ្នកធ្វើការជនជាតិចិនជាច្រើនរយលាននាក់ ចេញធ្វើដំណើរត្រឡប់ទៅស្រុកកំណើត ឬដើរលេងកម្សាន្តក្នុងអំឡុងពេលឈប់សម្រាកយូរថ្ងៃ។ ក្រៅពីនេះ អាជ្ញាធរថែមទាំងបានសំណូមពរឱ្យផ្អាកកិច្ចការងារប្រមូលផ្ដុំគ្នា របស់ក្រុមមនុស្សដែលមានគ្នាច្រើនផ្សេងៗ ដែលក្នុងនោះរួមទាំងពិធីរៀបអាពាហ៍ពិពាហ៍ផងដែរ។
ការឆ្លងរាលដាល រលកបច្ចុប្បន្ន ក្នុងមណ្ឌលជីលីន មានដើមកំណើតមកពី ស៊ែលមែនម្នាក់ (អ្នកដើរលក់ទំនិញ) បានធ្វើដំណើរចេញ-ចូលញឹកញាប់ ក្នុងមណ្ឌលហ៊ើយលង់ចៀង ដែនដីដែលធ្លាប់មានសហគមន៍អ្នកឆ្លងមេរោគកូវីដ-១៩ កាលពីពេលមុន។
ចំនួនអ្នកឆ្លងមេរោគថ្មី ដែលមិនបង្ហាញអាការ ដែលប្រទេសចិនមិនបានចាត់ទុកក្នុងករណី ដែលបានទទួលការអះអាងនោះ បានធ្លាក់ចុះនៅសល់ ៩១នាក់ ពីកម្រិត ១១៥នាក់ កាលពី ១ថ្ងៃមុននេះ។
ក្នុងពេលនេះចំនួនអ្នកឆ្លងមេរោគកូវីដ-១៩ ដែលបានទទួលការអះអាងហើយ នៅក្នុងប្រទេសចិនដីគោក មានចំនួន ៨៩ ៤៥៤នាក់ ខណៈដែលចំនួនអ្នកស្លាប់ នៅតែមិនប្រែប្រួលគឺ ៤ ៦៣៥នាក់។
ប្រភព៖ ទីភ្នាក់ងារព័ត៌មានរ៉យទ័រ
ប្រែ និងសម្រួលដោយ តាវ៉ែនតា
#អរគុណសន្តិភាព
