អាមេរិច៖ លោកត្រាំ បានបញ្ចប់អាណត្តិរបស់ខ្លួន មុនចាកចេញពីមន្ទីរសេតវិមាន ដោយការចុះហត្ថលេខាលើបញ្ជាអភ័យទោសឱ្យអតីតទីប្រឹក្សាជើងចាស់ និងបុគ្គលដទៃទៀត ជាង ៧០នាក់ ខណៈដែលអ្នកជំនាញការ បានចង្អុលបង្ហាញថា រដ្ឋធម្មនុញ្ញ បានបើកផ្លូវឱ្យប្រធានាធិបតី អាចអភ័យទោសឱ្យខ្លួនឯងបាន ដោយមិនចាំបាច់ប្រាប់ទៅសភា ឬប្រជាជន និងក្រៅពីនោះ នៅមានព័ត៌មានថា លោកត្រាំអាចនឹងបង្កើតគណបក្សនយោបាយរបស់ខ្លួនឯង ដោយអាចនឹងដាក់ឈ្មោះថា “ភែតធ្រីអត(Patriot)” ទៀតផង។
លោក ស្ទីហ្វ ប៊ែនណន អតីតទីប្រឹក្សាជើងចាស់ ជាមនុស្ស ដែលលោក ដូណាល់ ត្រាំ ចុះហត្ថលេខាអភ័យទោសឱ្យ កាលពីថ្ងៃអង្គារ(ទី១៩មករា) ឬ ១ថ្ងៃមុនផុតពីតំណែងប្រធានាធិបតីសហរដ្ឋអាមេរិក រួមទាំងអស់ ៧៣នាក់ ដោយមានទាំងលោក អេលលៀត ប្រ៊យឌី អតីតអ្នកប្រមូលផ្ដុំថវិកាខាងនយោបាយឱ្យលោកត្រាំ ដែលព្រមទទួលស្គាល់កំហុសថា បានសម្របសម្រួលដោយខុសច្បាប់ ឱ្យសហរដ្ឋអាមេរិក បញ្ឈប់ការស៊ើបអង្កេតរឿងអាស្រូវ របស់មូលនិធិ 1MDB របស់ប្រទេសម៉ាឡេស៊ី និងការនិរទេសមហាសេដ្ឋីចិន ដែលត្រូវបណ្ដេញពីប្រទេសទៀតផង។
តារារ៉េបពើរ៍ ល្បីឈ្មោះ ២នាក់ លោក លីល វេន និង កូដាក់ ប្ល៊ែក ដែលមានកំហុសពាក់ព័ន្ធនឹងអាវុធជាតិផ្ទុះ និងលោក ខ្វាមី ឃីលផាធ្រិក អតីតអភិបាលក្រុងឌីត្រយ ដែលត្រូវជាប់ពន្ធនាគារ ២៨ឆ្នាំ ក្នុងរឿងក្ដីពុករលួយ ក៏ជាផ្នែកមួយនៅក្នុងក្រុមអ្នកដែលបានទទួលការអភ័យទោស កាលពីថ្ងៃអង្គារដែរ ក្រៅពីនោះ នៅមាន ៧០នាក់ទៀត ដែលលោកត្រាំបានចុះហត្ថលេខា បន្ធូរបន្ថយទោសឱ្យ។
ស្ថាប័ន Noah Book Binder From the Citizens for Responsibility and Ethics ក្នុងទីក្រុងវ៉ាស៊ីនតោន បានរិះគន់ថា សូម្បីតែលោក រីឆាដ និកសុន អតីតប្រធានាធិបតី ទី៣៧ នៃសហរដ្ឋអាមេរិក ក៏មិនអភ័យទោសឱ្យបក្ខពួកច្រើនដូចលោកត្រាំដែរ។
ទោះជាបានដឹងហើយថា លោកត្រាំ មិនព្យាយាមអភ័យទោសឱ្យខ្លួនឯង ឬក្រុមគ្រួសារ រួមទាំងលោក រូឌី ជូលៀនី អតីតមេធាវីផ្ទាល់ខ្លួនក៏ដោយ តែអយ្យការ និងអ្នកជំនាញការជាច្រើននាក់ បានដាក់ការសង្កេតថា នៅក្នុងរដ្ឋធម្មនុញ្ញ មានខ្លឹមសារដែលមិនច្បាស់លាស់មួយ ដែលចង្អុលបង្ហាញថា ប្រធានាធិបតី អាចអភ័យទោសឱ្យខ្លួនឯង “បែបសម្ងាត់” បាន ដោយមិនចាំបាច់ជូនដំណឹងទៅរដ្ឋសភា ឬប្រជាជនឡើយ។
ក្រៅពីនោះ សារព័ត៌មាន វ៉លស្ទ្រីត ហ្សួរណាល់ នៅបានរាយការណ៍ ដោយអាងលើការបង្ហើបឱ្យដឹងរបស់អ្នកជំនួយការជាច្រើននាក់ របស់លោកត្រាំថា លោកត្រាំ អាចនឹងបង្កើតគណបក្សនយោបាយថ្មីមួយ ដោយដាក់ឈ្មោះថា ភែតធ្រីអត ទៀតផង។
អ្នកតាមដានរឿងរ៉ាវរបស់លោកត្រាំ បានប្រមើលមើលថា ក្រោយផុតពីតំណែង លោកត្រាំអាចនឹងត្រូវប្រឈមនឹងការស៊ើបអង្កេតរឿងក្ដីជាច្រើន ពាក់ព័ន្ធនឹងធុរកិច្ច និងអាចត្រូវប្ដឹងផ្ដល់ ពីការដំណើរការការងារ ខណៈគ្រងតំណែងជាប្រធានាធិបតី ដែលរួមទាំងការព្យាយាមក្នុងការផ្លាស់ប្ដូរលទ្ធផលការបោះឆ្នោត និងការពន្យុះញុះញង់ អ្នកគាំទ្រឱ្យវាយប្រហារអគាររដ្ឋសភា កាលពីដើមខែ ដែលធ្វើឱ្យសភាតំណាងរាស្ត្រ បោះឆ្នោតលោកដកចេញពីតំណែង ដែលបើសិនជាព្រឹទ្ធសភា បានទទួលសំណុំរឿងនេះហើយ និងសម្រេចថា មានកំហុសពិតមែននោះ លោកត្រាំនឹងមិនអាចឈរឈ្មោះបោះឆ្នោតក្នុងឆ្នាំ២០២៤ បានដូចការតាំងចិត្តនោះឡើយ៕
ប្រភព៖ សារព័ត៌មានបរទេស
ប្រែ និងសម្រួលដោយ ស៊ីតា
#អរគុណសន្តិភាព
