អ៊ែស្ត្រាហ្សេនេកា (Astrazeneca)៖ កាលពីថ្ងៃចន្ទ(ទី២៥) បានចេញមកបដិសេធ ដំណឹងចចាមអារ៉ាម ដែលថា វ៉ាក់សាំងប្រឆាំងកូវីដ-១៩ របស់ខ្លួន មានប្រសិទ្ធភាព ត្រឹមតែបន្តិចបន្តួចលើបុគ្គល ដែលមានអាយុលើស ៦៥ឆ្នាំឡើង ក្រោយពីបណ្ដាញសារព័ត៌មានអាល្លឺម៉ង់ មានរបាយការណ៍ថា ក្រុមមន្ត្រី បារម្ភខ្លាចក្រែង វ៉ាក់សាំងមួយនេះ អាចមិនបានទទួលបានការឯកភាពនៅក្នុងសហភាពអឺរ៉ុប សម្រាប់ឱ្យប្រើជាមួយមនុស្សវ័យចំណាស់។
Handelsblatt និង Bild សារព័ត៌មានរបស់អាល្លឺម៉ង់ បានរាយការណ៍ថា វ៉ាក់សាំងដែលសហការគ្នាអភិវឌ្ឍ រវាងអ៊ែស្ត្រាហ្សេនេកា ជាមួយមហាវិទ្យាល័យ អុកស្វ៉ដ មានប្រសិទ្ធភាពត្រឹមតែ ៨% ឬមិនដល់ ១០%តាមលេខរៀង លើបុគ្គលដែលមានអាយុលើស ៦៥ឆ្នាំឡើង។
ទិន្នន័យទាំងនេះ បានធ្វើឱ្យមន្ត្រីនៃប្រទេសអាល្លឺម៉ង់ មានក្ដីកង្វល់ថា វ៉ាក់សាំងនេះ អាចមិនបានទទួលការអនុម័ត ពីអង្គការឱសថ នៃសហភាពអឺរ៉ុប(EMA) សម្រាប់ប្រើជាមួយបុគ្គលដែលមានអាយុលើស ៦៥ឆ្នាំឡើង។ នេះបើតាមរបាយការណ៍របស់ Bild ច្បាប់អនឡាញ។
របាយការណ៍ព័ត៌មាននេះ បានក្លាយជាចំណុចបញ្ហារបស់ Astrazeneca បន្ទាប់ពីខាងក្រុមហ៊ុន បានជូនដំណឹងទៅសហភាពអឺរ៉ុប ឬ EU កាលពីថ្ងៃសុក្រ(ទី២២មករា) ថា នឹងមានការផ្ទេរ-ប្រគល់វ៉ាក់សាំងជូនសហភាពអឺរ៉ុប ទាបជាងគោលដៅ ដោយសារតែមកពីបញ្ហាផ្នែកការផលិត។
ក្ដីអស់សង្ឃឹម បានចាប់ផ្ដើមបង្កខ្លួនខ្លាំងឡើង នៅក្នុងក្រុមប្រទេសផ្សេងៗ របស់សហភាពអឺរ៉ុប ដោយសារតែកាលពីពេលមុននេះ ក្រុមហ៊ុនហ្វ៉ៃហ្ស៊ើរ និងសម្ព័ន្ធមិត្ត គឺ បៃអូអេនថេក ក៏បានជូនដំណឹង អំពីការកាត់បន្ថយការផ្ទេរ-ប្រគល់វ៉ាក់សាំងកូវីដ-១៩ ទៅឱ្យអឺរ៉ុប ជាបណ្ដោះអាសន្នដូចគ្នាដែរ កាលពីពាក់កណ្ដាលខែមករា ធ្វើឱ្យរដ្ឋបាលនៃប្រទេសជាច្រើនក្នុងអឺរ៉ុប សម្ដែងការមិនពេញចិត្ត ខណៈដែលប្រទេសផ្សេងទៀត ដូចជាអ៊ីតាលី ជាដើម បានគំរាមដំណើរការតាមផ្លូវច្បាប់។
Astrazeneca បានឆ្លើយតបនឹងព័ត៌មានចចាមអារ៉ាមនោះ ជាលាយលក្ខណ៍អក្សរ ដោយបានបញ្ជាក់ថា របាយការណ៍របស់សារព័ត៌មានអាល្លឺម៉ង់ ដែលប្រាប់ថា វ៉ាក់សាំងកូវីដ-១៩ របស់ពួកគេ បង្ហាញប្រសិទ្ធភាពក្នុងកម្រិតទាបខ្លាំង នៅលើមនុស្សចាស់នោះ “មិនត្រឹមត្រូវទាំងអស់។
ក្រុមហ៊ុនមួយនេះ បានបញ្ជាក់ថា គណៈកម្មការរួមផ្នែកវ៉ាក់សាំង និងសាងប្រព័ន្ធប្រឆាំងជំងឺ នៃចក្រភពអង់គ្លេស បានគាំទ្រការប្រើវ៉ាក់សាំងរបស់ពួកគេ (Astrazeneca) លើមនុស្សចាស់ជរា ព្រមទាំងបានអះអាងថា តាមរយៈការវិភាគឈាម របស់អ្នកស្ម័គ្រចិត្តវ័យចំណាស់ ដែលបានចូលរួមក្នុងការពិសោធសាកល្បង បានរកឃើញ ការតបស្នងខាងប្រព័ន្ធប្រឆាំងជំងឺ ដែលរឹងមាំល្អ ចំពោះវ៉ាក់សាំងរបស់ខ្លួន។
ចក្រភពអង់គ្លេស កាលពីថ្ងៃទី៣០ ធ្នូ បានក្លាយជាប្រទេសដំបូងគេ ដែលអនុម័តលើវ៉ាក់សាំងមួយនេះ ដែលប្រើក្នុងបរិមាណ ២ដូស និងមិនបានកំណត់ខកម្រិត ផ្នែកអាយុរបស់មនុស្សវ័យចំណាស់នោះទេ និងរហូតមកដល់ពេលនេះ គ្រោងការចាក់វ៉ាក់សាំងរបស់ពួកគេ កំពុងតម្រង់ឆ្ពោះទៅរកមនុស្សវ័យចំណាស់ និងបណ្ដាមន្ត្រីសុខាភិបាលមុនគេ។
ការសាកល្បងរបស់ Astrazeneca នៅក្នុងចក្រភពអង់គ្លេស បានចាប់ផ្ដើមនៅលើបុគ្គលវ័យចំណាស់ អាយុមិនលើស ៥៥ឆ្នាំ ដោយសារតែរយៈដំបូង ពួកគេបានតម្រង់ភាពសំខាន់ទៅលើបុគ្គលិកផ្នែកសុខភាពសាធារណៈ និងបណ្ដាមន្ត្រីក្នុងជួរមុខ ចំណែកក្រុមអ្នកស្ម័គ្រចិត្តវ័យចំណាស់ ទើបតែត្រូវបានកេណ្ឌឱ្យមកចូលរួមការសាកល្បងនៅពេលក្រោយប៉ុណ្ណោះ។
បណ្ដាអ្នកស្រាវជ្រាវ របស់មហាវិទ្យាល័យអុកស្វ៉ដ បានបញ្ជាក់នៅក្នុងឯកសារដែលផ្សព្វផ្សាយនៅក្នុង The Lancet ព្រឹត្តិបត្រផ្នែកវេជ្ជសាស្ត្រ កាលពីថ្ងៃទី៨ ធ្នូ ឆ្នាំកន្លងទៅ ក្នុងគ្រាដែលមានការផ្សព្វផ្សាយ អំពីសេចក្ដីលម្អិតនៃការសាកល្បងវ៉ាក់សាំង នៅក្នុងចក្រភពអង់គ្លេស និងប្រទេសប្រេស៊ីលថា ទិន្នន័យប្រសិទ្ធភាព របស់វ៉ាក់សាំងលើអ្នកឆ្លងមេរោគក្នុងវ័យចំណាស់ ហាក់ដូចជានៅមានកម្រិត។
ពួកគេ(អ្នកស្រាវជ្រាវខាងលើ) បានបញ្ជាក់នៅក្នុងឯកសារនោះថា “ទិន្នន័យប្រសិទ្ធភាពលើមនុស្សក្រុមនេះ បច្ចុប្បន្ន ត្រូវកម្រិតដោយករណី(អ្នកឆ្លងមេរោគ) ចំនួនតិចតួច តែទិន្នន័យបន្ថែម នឹងរកបាននៅក្នុងការវិភាគនាពេលអនាគត។
ប្រភព៖ ទីភ្នាក់ងារព័ត៌មាន រ៉យទ័រ
ប្រែ និងសម្រួលដោយ តាវ៉ែនតា
#អរគុណសន្តិភាព
