WHO៖ ក្រុមការងារពិសេសរបស់អង្គការសុខភាពពិភពលោក ឬ WHO បានចូលទៅក្នុងទីតាំងមជ្ឈមណ្ឌលបង្ការ និងគ្រប់គ្រងជំងឺ ២កន្លែង នៅក្នុងមណ្ឌល ហ៊ូពេយ ដោយមានមន្ត្រីរបស់រដ្ឋបាលចិន “តាមមើលថែទាំយ៉ាងជិតដិត។
ទីភ្នាក់ងារព័ត៌មានអន្តរជាតិ បានរាយការណ៍ពីទីក្រុងវូហាន ប្រទេសចិន កាលពីថ្ងៃទី១ កុម្ភៈ ថា ក្រុមអ្នកជំនាញការរបស់អង្គការសុខភាពពិភពលោក ឬ WHO បានចូលទៅពិនិត្យមើលមជ្ឈមណ្ឌលបង្ការ និងគ្រប់គ្រងរោគ ២កន្លែង គឺមជ្ឈមណ្ឌលលំដាប់ទីក្រុងវូហាន ទីក្រុងឯករបស់មណ្ឌលហ៊ូពេយ និងទីស្នាក់ការលំដាប់មណ្ឌល នៅវេលារសៀល នៃថ្ងៃចន្ទ តាមម៉ោងក្នុងស្រុក ដោយក្រុមអ្នកជំនាញការ បានប្រើពេលវេលានៅក្នុងមជ្ឈមណ្ឌលទាំង ២កន្លែងនោះ “អស់ជាច្រើនម៉ោង” ដែលអាចនិយាយបានថា “យូរជាងគេបំផុត” ចាប់តាំងពីចាប់ផ្ដើមភារកិច្ចចុះគោលដៅ “ដើម្បីស៊ើបអង្កេតប្រភពមេរោគ” កាលពីថ្ងៃសុក្រ សប្ដាហ៍មុនមក។
យ៉ាងណាក៏ដោយ ប្រភពព័ត៌មាននៅក្នុងស្ថាប័ន WHO បានបង្ហើបឱ្យដឹងថា ខាងអង្គភាព “ហាក់ដូចជាខកបំណង” ដោយសារតែការកំណត់កម្មវិធីត្រួតពិនិត្យទាំងអស់ គឺដំណើរការទៅតាមអ្វី ដែលរដ្ឋបាលក្នុងប៉េកាំងចាត់ចែងត្រៀមទុកឱ្យទាំងអស់ ទោះជាមានឱកាសធ្វើដំណើរទៅ “ទីកន្លែងសំខាន់” សម្រាប់ភារកិច្ចក្នុងគ្រានេះ ដូចជាផ្សារលក់អាហារស្រស់ហួណាន និងមន្ទីរពេទ្យ ជីន អ៊ីន ថាន ក៏ដោយ តែក្រុមការងារជំនាញ មិនទាន់មានឱកាស បានសន្ទនា “យ៉ាងជិតស្និទ្ធ “ជាមួយអ្នកដែលធ្លាប់កើតជំងឺកូវីដ-១៩ បុគ្គលិកមន្ទីរពេទ្យ មេដឹកនាំសហគមន៍ និងប្រជាជននៅក្នុងទីក្រុងវូហាននៅឡើយ ដោយរដ្ឋបាលចិន បានបញ្ជាក់ហេតុផលពាក់ព័ន្ធនឹងរឿងនេះថា “ជាវិធានការគ្រប់គ្រងខាងសុខភាព” ដើម្បីឱ្យត្រូវគ្នានឹងវិធានការទប់ស្កាត់ជំងឺរាតត្បាត។
ទាំងអស់នេះ ក្រុមអ្នកជំនាញការរបស់ WHO បានធ្វើដំណើរទៅដល់ទីក្រុងវូហាន កាលពីថ្ងៃទី១៤ មករា និងបានចូលធ្វើចត្តាឡីស័ក រយៈពេល ១៤ថ្ងៃ ព្រមទាំងបានចូលទទួលការពិនិត្យចម្រាញ់តាមចំនួនដង ដែលរដ្ឋបាលក្រុងប៉េកាំងបានកំណត់ទៀតផង ដែលក្នុងអំឡុងពេលនោះ រដ្ឋបាលចិន បានអះអាងថា ក្រុមការងាររបស់ WHO អាចប្រជុំតាមរយៈប្រព័ន្ធអ៊ីនធើណិត “យ៉ាងជាប់លាប់” ជាមួយអ្នកតំណាងរបស់ប្រទេសចិនបាន៕
ប្រភព៖ ទីភ្នាក់ងារព័ត៌មាន រ៉យទ័រ
ប្រែ និងសម្រួលដោយ តាវ៉ែនតា
#អរគុណសន្តិភាព
