សៀមរាប៖ នៅល្ងាចថ្ងៃទី០២ ខែកុម្ភៈ ឆ្នាំ២០២១នេះ ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បង្ហាញថា ប្រឡាយទឹកផ្លូវ៦០ម៉ែត្រ នៅតាមបណ្ដោយផ្លូវសម្ដេចវិបុលបញ្ញាសុខ អាន ឬផ្លូវ៦០ម៉ែត្រ ស្ថិតនៅតំបន់អង្គរឃ្យុងយូ ក្នុងសង្កាត់ស្លក្រាម ក្រុងសៀមរាប នឹងត្រូវកែលម្អទៅជាសួនកំសាន្ដមានផ្លូវកង់ ផ្លូវថ្មើរជើង កន្លែងអង្គុយ ដើម្បីលើកកម្ពស់សោភណ្ឌភាពក្រុង និងទាក់ទាញភ្ញៀវទេសចរ។
ឯកឧត្ដមអគ្គនាយក បន្ថែមថា៖ ប្រឡាយទឹកនេះ មានទទឹងប្រវែង ៤ម៉ែត្រ ជម្រៅ២ម៉ែត្រ និងមានចម្ងាយជិត២គីឡូម៉ែត្រ។ ការកែលម្អនៅដំណាក់កាលទីមួយនេះ ចាប់ផ្ដើមពីចំណុចស្ពាននាគ ដល់ចំណុចរង្វង់មូលនាងអប្សរា តំបន់អង្គរឃ្យុងយូរ។ គម្រោងកែលម្អប្រឡាយទឹកផ្លូវ៦០ម៉ែត្រ អនុវត្តន៍ដោយអាជ្ញាធរជាតិអប្សរានេះ នឹងប្រើស្ថាបនារយៈពេល១៨ខែ។
សម្រាប់ដំណាក់កាលបន្តបន្ទាប់ ឯកឧត្ដម ក៏បានបង្ហាញផងដែរថា នឹងបន្តចាប់ពីចំណុចរង្វង់មូលនាងអប្សរា ឆ្ពោះទៅកាន់ផ្លូវជាតិលេខ៦ និងចាប់ពីចំណុចដដែលឆ្ពោះទៅកាន់ចំណុចឆែកសំបុត្រ ផ្លូវទៅទស្សនាប្រាសាទអង្គរ និងទៅកាន់ប្រាសាទស្រះស្រង់ឬផ្លូវទៅព្រះដាក់ ស្រុកបន្ទាយស្រី។
បើតាមការបញ្ជាក់របស់ឯកឧត្ដមអគ្គនាយក ការកែលម្អប្រឡាយទឹកផ្លូវ៦០ម៉ែត្រនេះ ដោយសារ តំបន់នេះ មានអ្នកទេសចរណ៍ធ្វើដំណើរទៅមកច្រើន ជាពិសេសកន្លែងទិញសំបុត្រ សម្រាប់ប្រាសាទនានានៅក្នុងរមណីយដ្ឋានអង្គរ ព្រមទាំងមានសារមន្ទីរចំនួន៣កន្លែង សម្រាប់ទាក់ទាញភ្ញៀវទេសចរផងដែរ៕
#អរគុណសន្តិភាព
