មីយ៉ាន់ម៉ា៖ អ្នកនិពន្ធផ្នែកសិទ្ធិមនុស្ស ១ក្រុមនៅក្នុងប្រទេសមីយ៉ាន់ម៉ា បានសរសេរអត្ថបទមួយ រៀបរាប់អំពីស្ថានភាពផ្សេងៗ ក្នុងអំឡុងពេល ៥ឆ្នាំ របស់រដ្ឋបាលលោកស្រីអ៊ុងសាន ស៊ូជី ដោយបានបង្ហើបឱ្យដឹងថា ក្រុមជាតិសាសន៍ក្នុងប្រទេសមីយ៉ាន់ម៉ា បានចេញមកបកអាក្រាតថា រយៈពេល ៥ឆ្នាំ របស់រដ្ឋបាលលោកស្រីអ៊ុងសាន ស៊ូជី ប្រទេសជាតិមិនបានចម្រើនរុងរឿងឡើយ មានការជិះជាន់កៀបសង្កត់ក្រុមជនជាតិដើមភាគតិច មិនចង់សហការជាមួយក្រុមជាតិសាសន៍ បំផ្លាញថវិការដ្ឋ ដោយការជួលបរទេស ជិត ១០០នាក់មកធ្វើទីប្រឹក្សា ទាំងដែលប្រជាជនកំពុងក្រីក្រ ហើយនិងការបោះឆ្នោតថ្មីៗនេះ ពោរពេញដោយការកេងបន្លំយ៉ាងវីវក់ និងលោក មីន អង់ ឡាយ បានប្រាប់ច្រើនដងហើយ តែមិនស្ដាប់ ថែមទាំងប្រញាប់បើកប្រជុំសភាឱ្យបានទៀតផង ដែលទាំងអស់នេះហើយ បានក្លាយជារដ្ឋប្រហារ។
ថ្ងៃទី៣ កុម្ភៈនេះ តាមរយៈស្ថានការណ៍រដ្ឋប្រហារនៅក្នុងប្រទេសមីយ៉ាន់ម៉ា ក្រោយពីលោកឧត្ដមសេនីយ៍ឯក មីន អង់ ឡាយ អគ្គមេបញ្ជាការកងទ័ពមីយ៉ាន់ម៉ា បានចាប់ឃុំខ្លួនលោកស្រី អ៊ុងសាន ស៊ូជី ប្រធានគណបក្សសម្ព័ន្ធជាតិ ដើម្បីប្រជាធិបតេយ្យ ឬ NLD និងលោក វិន មីនត៍ ប្រធានាធិបតីមីយ៉ាន់ម៉ា និងប្រកាសដាក់ប្រទេសក្នុងស្ថានការណ៍គ្រាអាសន្ន និងសន្យា ១ឆ្នាំ នឹងរៀបចំឱ្យមានការបោះឆ្នោតជាថ្មី។
ក្រុមអ្នកនិពន្ធផ្នែកសិទ្ធិមនុស្សដដែល បានផូស្តសំណេរ រៀបរាប់អំពីហេតុការណ៍ទាំងនោះ តាមរយៈការសម្ភាសប្រជាជនមីយ៉ាន់ម៉ាមួយចំនួន និងមនុស្សរបស់ក្រុមជាតិសាសន៍ ក្នុងអំឡុងពេលកន្លងមក នៅក្នុងវគ្គមួយថា ទាហានមីយ៉ាន់ម៉ា បានចូលទៅចាប់ខ្លួនអ្នកនយោបាយក្នុងតំបន់ ដែលរដ្ឋបាលលោកស្រីស៊ូជី របស់គណបក្ស NLD បានតែងតាំងឱ្យធ្វើការនៅតាមតំបន់ផ្សេងៗ តែមេដឹកនាំក្រុមជាតិសាសន៍ និងមនុស្សរបស់ក្រុមជាតិសាសន៍ ដែលធ្វើកិច្ចការងារខាងនយោបាយវិញ បែរជាមិនមានរងផលប៉ះពាល់អ្វីទាំងអស់។
ប្រជាជនដែលរស់នៅក្នុងប្រទេសមីយ៉ាន់ម៉ា បានប្រាប់ថា ជីវិតរបស់ពួកគេ គ្រប់យ៉ាងស្ងប់ស្ងាត់ជាធម្មតា មិនមានអ្វីប្រែប្រួលនោះទេ និងទើបតែដឹងពីការប្រកាសជាផ្លូវការនៅក្នុងទូរទស្សន៍ថា មានការតែងតាំងលោក អ៊ូ មីន សួយ អនុប្រធានាធិបតីទី១ ឱ្យឡើងធ្វើជាប្រធានាធិបតីស្ដីទី រួមទាំងប្រកាសស្ថានការណ៍គ្រាអាសន្ន រយៈពេល ១ឆ្នាំ មុននឹងរៀបចំឱ្យមានការបោះឆ្នោតជាថ្មី ឱ្យស្អាត និងយុត្តិធម៌ជាងនេះឡើង។
អត្ថបទរបស់ពួកគេ បានបន្តទៀតថា សម្រាប់ក្រុមជាតិសាសន៍វិញ ទោះជាច្រើនឆ្នាំមកនេះ ក្នុងអំឡុងរដ្ឋបាលលោកស្រីស៊ូជី រដ្ឋបាលបានជួយដល់ក្រុមជនជាតិដើមភាគតិច ច្រើនយ៉ាងក៏ពិតមែន តែក៏ជិះជាន់សង្កត់សង្កិនយ៉ាងខ្លាំងក្លាដែរ ដោយបង្ខំឱ្យមេដឹកនាំគ្រប់ក្រុមជាតិសាសន៍ ត្រូវតែនិយាយភាសាមីយ៉ាន់ម៉ានៅក្នុងរដ្ឋសភា និងសូម្បីអ្នកនយោបាយរបស់បក្ស NLD ខ្លួនឯង បើចង់ស្នើគំនិតយោបល់អ្វីមួយ នៅក្នុងរដ្ឋសភា ក៏ត្រូវតែយកប្រធានបទនោះ ទៅជម្រាបលោកស្រីស៊ូជី ជាមុនសិនដែរ ទើបមានឱកាសបានឡើងបញ្ចេញគំនិតយោបល់ នៅក្នុងរដ្ឋសភាបាន។
អ្នកនយោបាយមីយ៉ាន់ម៉ាជាច្រើន និងក្រុមជាតិសាសន៍ គ្រប់ក្រុម បានជួបនឹងរឿងដ៏ឈឺចាប់ ពីលោកស្រីស៊ូជី រហូត ៥ឆ្នាំកន្លងមក រហូតដល់មានខ្លះ រាងចាល និងមានអ្នកនយោបាយជំនាន់ក្រោយ ទាំងរបស់មីយ៉ាន់ម៉ា និងក្រុមជាតិសាសន៍ លែងចូលរួមជាមួយ NLD និងងាកទៅសហការជាមួយក្រុមយោធាជំនាន់ថ្មី ចូលប្រឡូកក្នុងសមរភូមិបោះឆ្នោតកាលពីចុងឆ្នាំកន្លងទៅទៀតផង។
អត្ថបទនោះ បានសរសេរទៀតថា ការធ្វើរដ្ឋប្រហារលើកនេះ ប្រជាជនមីយ៉ាន់ម៉ា និងអ្នកដឹកនាំខាងគំនិតរបស់ក្រុមជាតិសាសន៍ បានឯកភាព។ អ្នកដែលធ្លាប់ត្រូវទាហានចាប់ដាក់ពន្ធនាគារ និងធ្លាប់តស៊ូដើម្បីប្រជាធិបតេយ្យរហូតមក បានអះអាងថា ល្អណាស់ ដែលមានរដ្ឋប្រហារ ពួកគេឯកភាពជាមួយការធ្វើរដ្ឋប្រហារ ព្រោះទាហាន មិនបានចូលមកដណ្ដើមអំណាច ដូចកាលពីលើកមុននោះទេ តែទាហានមកធ្វើជានាយករដ្ឋសភា ព្រោះច្រើនឆ្នាំកន្លងមកនេះ ក្នុងការគ្រប់គ្រងរបស់លោកស្រីស៊ូជី និងរដ្ឋបាលគណបក្ស NLD លោកស្រីស៊ូជី បានធ្វើនូវរឿងជាច្រើន ដែលប្រជាជនតតាំង មិនឯកភាព ជាទង្វើដែលយ៉ាប់ៗខ្លាំងណាស់។
ឧទាហរណ៍ដូចជា លោកស្រីស៊ូជី ទៅយកជនជាតិអឺរ៉ុប បរទេស មកធ្វើជាទីប្រឹក្សារបស់ប្រទេស ជាង ៩០នាក់ ម្នាក់ៗទទួលបានប្រាក់ខែយ៉ាងតិច ២ ០០០ដុល្លារ ទាំងប្រទេសមីយ៉ាន់ម៉ាកំពុងនៅក្រ ប្រជាជននៅក្រ នៅឡើយ តែលោកស្រីស៊ូជី យកថវិកាជាតិទៅបំផ្លាញ ទាំងជនជាតិមីយ៉ាន់ម៉ា ក៏មានអ្នកដែលពូកែៗ មានចំណេះដឹងក៏ច្រើនដូចគ្នា តែលោកស្រីស៊ូជី មិនយកទៅធ្វើជាទីប្រឹក្សាទេ។ ពេញមួយរយៈពេល ៥ឆ្នាំនៃការគ្រប់គ្រងរបស់លោកស្រីស៊ូជី ប្រទេសជាតិ មិនបានរីកចម្រើនអ្វីឡើយ៕
ប្រភព៖ សារព័ត៌មានបរទេស
ប្រែ និងសម្រួលដោយ ស៊ីតា
#អរគុណសន្តិភាព
