សិង្ហបុរី៖ បុគ្គលិកម្នាក់ របស់មជ្ឈមណ្ឌលចក្ខុសាស្ត្រនៃប្រទេសសិង្ហបុរី ឬ SNEC បានទទួលវ៉ាក់សាំងកូវីដ-១៩ របសហ្វ៉ៃហ្ស៊ើរ/បៃអូអេនថេក លើសខ្នាត ក្នុងបរិមាណស្មើនឹង ៥ដូស ដោយសារតែកំហុសឆ្គង ដែលកើតឡើងដោយសារមនុស្ស តែយ៉ាងណាក្ដី ក្នុងអំឡុងពេលដំបូងៗ បុគ្គលិកម្នាក់នោះ នៅមានអាការល្អប្រសើរជាធម្មតា។ នេះបើតាមការបង្ហើបឱ្យដឹង ពីស្ថាប័នសុខភាពជាតិ កាលពីថ្ងៃសៅរ៍(ទី៦កុម្ភៈ)។
កំហុសឆ្គងនេះ បានកើតឡើង កាលពីថ្ងៃទី 14មករា ក្នុងអំឡុងពេលដែលមជ្ឈមណ្ឌលចក្ខុសាស្ត្រនៃប្រទេសិង្ហបុរី ដំណើរការចាក់វ៉ាក់សាំងកូវីដ-១៩ ឱ្យទៅបណ្ដាបុគ្គលិករបស់មជ្ឈមណ្ឌល។ SNEC បានបញ្ជាក់នៅក្នុងសេចក្ដីថ្លែងការណ៍ថា “កំហុសឆ្គងនេះ ត្រូវបានរកឃើញ ក្នុងរយៈពេលមិនប៉ុន្មាននាទី ក្រោយការចាក់វ៉ាក់សាំងរួច នៅពេលដែលបុគ្គលិកម្នាក់នោះ កំពុងសម្រាកនៅក្នុងទីតាំង ដែលកំណត់ទុកសម្រាប់អ្នកចាក់វ៉ាក់សាំងរួច…គ្រូពេទ្យជំនាញ បានប្រញាប់ប្រកាសជូនដំណឹងភ្លាមៗ និងធ្វើការវាយតម្លៃ អាការបុគ្គលិកម្នាក់នោះ និងបានរកឃើញថា រូបនាងសុខសប្បាយជាធម្មតា មិនមានអាការអាក្រក់ ឬផលប៉ះពាល់ណាមួយកើតឡើងឡើយ”
តែ ដើម្បីជាផ្នែកមួយនៃវិធានការការពារទុកជាមុន បុគ្គលិកដែលទទួលបានវ៉ាក់សាំងលើសខ្នាតរូបនោះ ត្រូវបានបញ្ជូនទៅសម្រាកនៅក្នុងបន្ទប់ព្យាបាល របស់មន្ទីរពេទ្យ សាំងហ្គាពួរ ជេនេរ៉ាល ដើម្បីសង្កេតតាមដានអាការ “អាការរបស់បុគ្គលិករូបនោះ នៅល្អជាធម្មតារហូត ហើយរូបនាង បានទទួលការអនុញ្ញាតឱ្យចេញពីមន្ទីរពេទ្យ នៅ ២ថ្ងៃក្រោយមក តែយើងនៅតែតាមដានអាការរបស់នាងយ៉ាងដិតដល់ និងឃើញថា រូបនាងនៅសុខសប្បាយជាធម្មតា”
ប្រតិបត្តិការចាក់វ៉ាក់សាំងការពារវ៉ាក់សាំងកូវីដ-១៩ នៅមជ្ឈមណ្ឌលចក្ខុសាស្ត្រនៃប្រទេសសិង្ហបុរី ត្រូវបានបញ្ឈប់ភ្លាមៗ ហើយបុគ្គលិកដទៃទៀតដែលនៅសល់ ត្រូវទៅទទួលយកការចាក់វ៉ាក់សាំង នៅឯមន្ទីរពេទ្យសាំងហ្គាពួរ ជេនេរ៉ាល ជំនួសវិញ។
តាមរយៈទិន្នន័យរបស់ SNEC លទ្ធផលនៃការស៊ើបអង្កេត បានរកឃើញថា កំហុសឆ្គងដែលកើតឡើងក្នុងគ្រានេះ មានដើមកំណើតមកពីការទំនាក់ទំនងមិនយល់គ្នា នៅក្នុងក្រុមការងារផ្នែកចាក់វ៉ាក់សាំង ដោយក្នុងអំឡុងពេលនោះ “មន្ត្រីដែលទទួលខុសត្រូវខាងបន្សាបវ៉ាក់សាំង ត្រូវបានហៅទៅមើលរឿងផ្សេងក្នុងអំឡុងពេលកំពុងត្រៀមវ៉ាក់សាំង ហើយមន្ត្រីម្នាក់ទៀត បានយល់ច្រឡំគិតថា ដូសដែលមិនទាន់បានបន្សាបនៅក្នុងដបកែវនោះ គឺបានត្រៀមរួចរាល់ហើយ(បានបន្សាបហើយ) សម្រាប់ការចាក់”
មជ្ឈមណ្ឌលចក្ខុសាស្ត្រនៃប្រទេសសិង្ហបុរី បានដំណើរការពិនិត្យមើលកម្មវិធីផ្ទៃក្នុងឡើងវិញយ៉ាងលម្អិត ដើម្បីធានាថា កំហុសឆ្គងទាំងនោះ នឹងមិនកើតឡើងម្ដងទៀត។ នេះបើតាមការអះអាងរបស់លោកសាស្ត្រាចារ្យ Wong Tien Yin នាយកផ្នែកវេជ្ជសាស្ត្ររបស់ SNEC ព្រមទាំងបានសូមទោសចំពោះហេតុការណ៍ ដែលបានកើតឡើងនេះផងដែរ។
ខាងក្រសួងសុខាភិបាលនៃប្រទេសសិង្ហបុរី បានបញ្ជាក់ពីទិន្នន័យនៃការសាកល្បងខាងគ្លីនិក របស់ក្រុមហ៊ុនហ្វ៉ៃហ្ស៊ើ និងបៃអូអេនថេកថា ការបានទទួលវ៉ាក់សាំងរបស់ហ្វ៉ៃហ្ស៊ើរ-បៃអូអេនថេក ច្រើនជាងការណែនាំ នឹងមិនបង្កឱ្យមានគ្រោះថ្នាក់អ្វីទាំងអស់ ព្រមទាំងបញ្ជាក់ទៀតថា ហេតុការណ៍ដែលកើតឡើងនៅ SNEC គឺជាហេតុការណ៍តែមួយគត់ និងមិនមានការផ្ដល់ដំណឹងណាផ្សេងទៀត ដែលមានលក្ខណៈស្រដៀងគ្នានេះ កើតឡើងនៅទីតាំងចាក់វ៉ាក់សាំងដទៃទៀតឡើយ។
SNEC បានប្រាប់ថា បុគ្គលិកដែលបានទទួលការចាក់វ៉ាក់សាំង លើសខ្នាតរូបនោះ នៅតែមានសុខភាពល្អជាធម្មតា និងមានកំណត់ត្រូវចូលទទួលវ៉ាក់សាំង ដូសទី២ ជាបន្ត ប៉ុន្តែត្រូវរង់ចាំលទ្ធផលពិនិត្យមើល ប្រព័ន្ធប្រឆាំងជំងឺនៅក្នុងឈាមជាមុនសិន។
សូមរំឭកថា ប្រទេសសិង្ហបុរី បានចាប់ផ្ដើមចាក់វ៉ាក់សាំង ឱ្យបណ្ដាមន្ត្រីសុខភាពសាធារណៈរបស់ប្រទេស ឈុតដំបូងៗ កាលពីថ្ងៃទី៣០ ធ្នូ ឆ្នាំ២០២០ ដោយការសាកល្បងលើក្រុមតូចៗ នៅឯមជ្ឈមណ្ឌលជាតិនៃជំងឺឆ្លង បន្ទាប់ពីនោះ ទើបវ៉ាក់សាំង ត្រូវបានចែកចាយទៅកាន់ស្ថាប័នពេទ្យដទៃទៀត និងបណ្ដាពលករក្នុងវិស័យផ្សេងៗ ដូចជា អាកាសចរណ៍ និងដឹកជញ្ជូនជើងគោក និងរំពឹងថា នឹងមានការដំណើរការជាបន្ត ទៅលើក្រុមមនុស្សចាស់ទូទាំងប្រទេសសិង្ហបុរី ចាប់ពីពាក់កណ្ដាលខែកុម្ភៈនេះតទៅ៕
ប្រភព៖ Channel News Asia
ប្រែ និងសម្រួលដោយ តាវ៉ែនតា
#អរគុណសន្តិភាព
