សហរដ្ឋអាមេរិក៖ លោកវេជ្ជបណ្ឌិត អ៊ែនថូនី ហ្វៅស៊ី នាយកស្ថាប័នអាល្លែកហ្ស៊ី និងជំងឺឆ្លងនៃសហរដ្ឋអាមេរិក បានបញ្ជាក់កាលពីថ្ងៃទី៨ កុម្ភៈ ថា ការប្រញាប់ចាក់វ៉ាក់សាំងឱ្យបានលឿន និងគ្របដណ្ដប់លើប្រជាជនឱ្យបានច្រើនបំផុត តាមដែលអាចធ្វើបាន គឺជាវិធីដែលល្អបំផុត ក្នុងការប្រយុទ្ធប្រឆាំងនឹងជំងឺកូវីដ-១៩ និងពន្យារការកើតឡើងរបស់វីរុសក្លាយពូជ។
ខណៈនេះ សហរដ្ឋអាមេរិក មានរបាយការណ៍អ្នកឆ្លងមេរោគកូវីដ-១៩ ក្លាយពូជជិត ៧០០នាក់ហើយ ដោយក្នុងចំនួននេះ មាន ៦៩០នាក់ មានជំងឺដោយសារមេរោគវីរុសក្លាយពូជ ដែលរកឃើញនៅក្នុងប្រទេសអង់គ្លេស ឬ B.1.1.7 ដែលចម្លងសាយភាយបានលឿនជាង និងគេសន្និដ្ឋានថា នឹងក្លាយជាប្រភេទដែលចម្លងរាលដាលធ្ងន់ធ្ងរបំផុតនៅក្នុងសហរដ្ឋអាមេរិក ក្នុងអំឡុងខែមីនា ខាងមុខ។
ដោយសារតែសហរដ្ឋអាមេរិក នៅមិនទាន់មានការពិនិត្យរកមេរោគក្លាយពូជយ៉ាងទូលំទូលាយនោះ ដូច្នេះហើយទើបចំនួនអ្នកជំងឺដែលពិតប្រាកដអាចនឹងខ្ពស់ជាងនេះ។
ទោះជាវីរុសគ្រប់ប្រភេទ ជាប្រក្រតី តែងតែមានការក្លាយពូជជាប្រចាំស្រាប់ហើយក៏ដោយ តែអ្នកវិទ្យាសាស្ត្រក៏នៅតែមានការកង្វល់ ពាក់ព័ន្ធនឹងរូបបែបនៃការក្លាយពូជ ដែលអាចធ្វើឱ្យវីរុសនោះ ចម្លងរាលដាលបានលឿន ឬធ្វើឱ្យអាការជំងឺកាន់តែធ្ងន់ធ្ងរឡើង។
លោកវេជ្ជបណ្ឌិតហ្វៅស៊ី បានបញ្ជាក់ថា ការសិក្សាស្រាវជ្រាវ ពីភាពអាចទៅរួចក្នុងការចាក់វ៉ាក់សាំងហ្វ៉ៃហ្ស៊ើរ និងម៉ូឌើណា ត្រឹមតែ ១ដូស នឹងក្លាយជារឿងសមហេតុសមផល ក្នុងសភាវដែលប្រទេសនៅមិនទាន់មានវ៉ាក់សាំងគ្រប់គ្រាន់ ប៉ុន្តែ ការសិក្សាស្រាវជ្រាវបែបនេះ ត្រូវប្រើពេលវេលាយូរ ច្រើនខែ ដែលអាចធ្វើឱ្យបទសរុបចេញមក ក្លាយជាចំណុចជជែកតវ៉ាគ្នាបាន។
លោកដុកទ័រធំនៃសហរដ្ឋអាមេរិករូបនេះ បានអះអាងយ៉ាងម៉ឺងម៉ាត់ ក្នុងការគាំទ្រឱ្យប្រជាជន ចូលទទួលវ៉ាក់សាំងឱ្យបានគ្រប់ ២ដូស។
លោកបានបញ្ជាក់នៅក្នុងពិធីថ្លែងព័ត៌មាន នៅឯមន្ទីរសេតវិមានកាលពីថ្ងៃចន្ទ(ទី៨កុម្ភៈ)ថា “ដោយសារតែវីរុសមានការបំប្លែងខ្លួន ដើម្បីឆ្លើយតបនឹងកម្លាំងតតាំង ទើបលោកអ្នកអាចនឹងកំពុងធ្វើឱ្យកើតមេរោគក្លាយពូជច្រើនឡើងដោយមិនដឹងខ្លួន…ដោយហេតុផលហើយនេះ ទើបវិធីដែលស័ក្តិសមបំផុត គឺការបំផុសបំផុលឱ្យប្រជាជនមកចាក់វ៉ាក់សាំង ១ដូសដំបូងឱ្យបានលឿន និងច្រើនបំផុត តាមដែលអាចធ្វើបាន និងត្រូវប្រាកដក្នុងចិត្តថា ពួកគេនឹងបានទទួលដូសទី២ យ៉ាងភ្លាមៗនៅពេលបន្ទាប់មក”
លោក អ៊ែនឌី ស្លេវីតត៍ ទីប្រឹក្សារបស់ក្រុមការងារពិសេសឆ្លើយតបកូវីដ-១៩ របស់មន្ទីរសេតវិមាន បានបញ្ជាក់ថា រហូតមកដល់ខណៈពេលនេះ សហរដ្ឋអាមេរិក បានធ្វើការចាក់វ៉ាក់សាំងឱ្យប្រជាជនដែលមានអាយុលើស ៦៥ឆ្នាំឡើងទៅបានចំនួនជាង ១៧លាននាក់ហើយ ខណៈដែលមជ្ឈមណ្ឌលគ្រប់គ្រង និងបង្ការជំងឺនៃសហរដ្ឋអាមេរិក ឬ CDC បានថ្លែងអំពីទិន្នន័យ កាលពីថ្ងៃអាទិត្យ(ទី៧កុម្ភៈ)ថា វ៉ាក់សាំងជាង ៤១លានដូស ត្រូវបានចែកចាយឱ្យទៅប្រជាជនអាមេរិកាំងរួចហើយជាង ៣១លាននាក់។
ចំណែកលោក រ៉ូសេលល៍ វ៉ាលេនស្គី អគ្គនាយក CDC បានគាំទ្រឱ្យប្រជាជនអាមេរិកាំង ពាក់ម៉ាស់ការពារជាបន្តទៀត ព្រមទាំងសំណូមពរឱ្យរដ្ឋផ្សេងៗ កុំអាលបន្ធូរបន្ថយច្បាប់ស្ដីពីការពាក់ម៉ាស់ការពារនៅក្នុងទីសាធារណៈ ដែលស៊ីចង្វាក់គ្នានឹងនយោបាយរបស់លោកប្រធានាធិបតី ចូ បៃដិន ដែលបានបំផុសឱ្យប្រជាជនអាមេរិក នាំគ្នាពាក់ម៉ាស់ការពារ ឱ្យបានពេញមួយរយៈពេល ១០០ថ្ងៃដំបូង ដែលលោកចូលគ្រងតំណែង៕
ប្រភព៖ ទីភ្នាក់ងារព័ត៌មាន Reuters និង Business insider
ប្រែ និងសម្រួលដោយ តាវ៉ែនតា
#អរគុណសន្តិភាព
