មីយ៉ាន់ម៉ា៖ បានផ្ដាច់អ៊ីនធើណិត និងដាក់ទាហានប្រចាំការទូទាំងប្រទេស នៅថ្ងៃចន្ទ (ទី១៥កុម្ភៈ)នេះ ក្រោមសញ្ញានៃក្ដីបារម្ភកង្វល់ថា អាចនឹងមានការបង្ក្រាបក្រុមអ្នកប្រឆាំងតវ៉ាតតាំងនឹងរដ្ឋប្រហារ ប៉ុន្មានម៉ោងក្រោយពីកងកម្លាំងរក្សាសន្តិសុខ បានបាញ់កាំភ្លើង បំបែកហ្វូងបាតុករ នៅឯភាគខាងជើងនៃប្រទេស។
គណៈរដ្ឋប្រហារ បានប្រកាសលើកកម្ពស់ការព្យាយាមបង្ក្រាបយុទ្ធនាការប្រឆាំងបែបអហិង្សា ដែលកំពុងតែពង្រីកវង់ ធំឡើងជារឿយៗ ក្រោមការអំពាវនាវ ទាមទារឱ្យប្រគល់អំណាចជូនលោកស្រីអ៊ុងសាន ស៊ូជី មេដឹកនាំដែលត្រូវបានរិបអូសអំណាចនោះវិញ។
សកម្មភាពកាត់ផ្ដាច់អ៊ីនធើណិតនៅក្នុងថ្ងៃចន្ទ (ទី១៥កុម្ភៈ) និងការទាមទារអំពីអង្គការសហប្រជាជាតិ ដែលស្នើសុំបញ្ជូនអ្នកសង្កេតការណ៍ចូលទៅក្នុងប្រទេសមីយ៉ាន់ម៉ា បានកើតឡើងមិនយូរប៉ុន្មាន ក្រោយពីរូបភាពដែលបង្ហាញឡើងនៅក្នុងការផ្សាយបន្តផ្ទាល់ នៅលើផ្លាតហ្វ៉មប្រព័ន្ធបណ្ដាញសង្គមអនឡាញ ជារូបភាពយានយន្តរបស់កងទ័ព និងកងទាហាន កំពុងចល័តឆ្លងកាត់តំបន់មួយចំនួននៅក្នុងប្រទេស។
ក្រុមសង្កេតការណ៍ NetBlocks បានបញ្ជាក់ថា ការកាត់ផ្ដាច់ទិន្នន័យ ដែលបញ្ជាដោយរដ្ឋ បានធ្វើឱ្យគ្រប់ទីកន្លែងនៅក្នុងប្រទេសមីយ៉ាន់ម៉ា ស្ថិតក្នុងសភាវ អហ្វឡាញ(Off line)។
កងទាហាននៅក្នុងទីក្រុង មិតជីណា ទីក្រុងធំរបស់រដ្ឋ កៈឈីន បានបាញ់ឧស្ម័នទឹកភ្នែក តាមដោយការបើកឆាកបាញ់ទៅក្នុងហ្វូងមនុស្ស ដែលបានមកប្រមូលផ្ដុំគ្នា នៅក្នុងទីក្រុងភាគខាងជើងរបស់ប្រទេសមួយនេះ ក្រោយពីមានពាក្យចចាមអារ៉ាមថា កងទ័ពមានចេតនាប្រុងផ្ដាច់ចរន្តអគ្គិសនីបន្ថែមទៀត ខណៈអ្នកយកព័ត៌មានម្នាក់នៅក្នុងចំណុចកើតហេតុ បានបញ្ជាក់ថា មិនទាន់ប្រាកដច្បាស់ថា តើប៉ូលិសប្រើគ្រាប់កាំភ្លើងប្លាស្ទិក ឬគ្រាប់កាំភ្លើងពិតនៅឡើងទេ។
សារព័ត៌មានក្នុងតំបន់ បានរាយការណ៍ថា មានអ្នកយកព័ត៌មាន ដែលនៅសង្កេតការណ៍អំពីការធ្វើបាតុកម្មនោះ យ៉ាងតិច ៥នាក់ ត្រូវបានចាប់ខ្លួន និងមានការផ្សព្វផ្សាយពីរូបភាពអ្នករងរបួសមួយផ្នែកអំពីហេតុការណ៍នេះ។
ឯកអគ្គរដ្ឋទូតសហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានចេញសេចក្ដីថ្លែងការណ៍រួម អំពាវនាវដល់កងកម្លាំងសន្តិសុខ កុំឱ្យធ្វើបាបប្រជាពលរដ្ឋ “យើងសូមអំពាវនាវដល់កងកម្លាំងសន្តិសុខ សូមឱ្យអត់ធ្មត់ ចៀសពីការប្រើអំពើហិង្សាទៅលើក្រុមបាតុករ ដែលចេញមកតវ៉ា តតាំងនឹងការផ្ដួលរំលំរដ្ឋបាល ដែលត្រឹមត្រូវតាមច្បាប់របស់ពួកយើង។
លោក អ៊ែនតូនីអូ ហ្គុយតឺរេស អគ្គលេខាធិការអង្គការសហប្រជាជាតិ បានឆ្លុះបញ្ចាំងពីសេចក្ដីអំពាវនាវនោះ ដាក់សម្ពាធឱ្យអាជ្ញាធរមីយ៉ាន់ម៉ា “ធានាថា នឹងផ្ដល់ការគោរពយ៉ាងពេញលេញ ចំពោះសិទ្ធិការប្រមូលផ្ដុំគ្នាយ៉ាងសន្តិភាព ហើយក្រុមអ្នកតវ៉ា នឹងមិនត្រូវបានសងសឹក។
ខណៈពេលជាមួយគ្នា អ្នកនាំពាក្យរបស់លោកហ្គុយតឺរេស បានទាមទារ ឱ្យកងទ័ពបើកផ្លូវជាបន្ទាន់ អនុញ្ញាតឱ្យលោកស្រី គ្រីស្ទីន ឆ្រានើរ៍ ប៊ើហ្គេនើរ៍ អ្នកតំណាងទូតជនជាតិស្វ៊ីស បានធ្វើដំណើរចូលប្រទេសមីយ៉ាន់ម៉ា “ដើម្បីវាយតម្លៃពីស្ថានការណ៍ពិត។
ចំណែកស្ថានទូតសហរដ្ឋអាមេរិក បានចេញសេចក្ដីណែនាំដល់ជនជាតិអាមេរិកាំង ដែលកំពុងរស់នៅក្នុងប្រទេសមីយ៉ាន់ម៉ា ឱ្យស្ថិតនៅតែក្នុងទីស្នាក់អាស្រ័យ កុំប្រថុយប្រថានល្មើសបម្រាមគោចរ នាពេលរាត្រី ដែលកំណត់ដោយគណៈរដ្ឋប្រហារ៕
ប្រភព៖ ទីភ្នាក់ងារព័ត៌មាន AFP
ប្រែ និងសម្រួលដោយ ស៊ីតា
#អរគុណសន្តិភាព
