សហរដ្ឋអាមេរិក៖ កាលពីថ្ងៃអាទិត្យ(ទី២១កុម្ភៈ) កំពុងខិតចូលកាន់តែជិតបង្គោលជ័យដ៏សែនសោកសៅមួយទៀតហើយ ដោយសារចំនួនអ្នកស្លាប់ដោយសារកូវីដ-១៩ បានកើនឡើងជិត ៥០០ ០០០នាក់មែនទែនហើយ ចាប់តាំងពីការឆ្លងរាលដាល បានចាប់ផ្ដើមឡើង ខណៈដែលអ្នកជំនាញការលំដាប់ខ្ពស់ផ្នែកវីរុស របស់ប្រទេសមួយនេះ បានដាស់តឿនថា សភាវប្រក្រតី អាចមិនទាន់វិលមកវិញទេ រហូតដល់ដំណាច់ឆ្នាំ។
សញ្ញានៃក្ដីសង្ឃឹម បានចាប់ផ្ដើមបង្ហាញឡើង តាមរយៈគ្រោងការចាក់វ៉ាក់សាំង និងរដូវរងាដែលរុញច្រាន ឱ្យចំនួនអ្នកឆ្លងមេរោគ ហក់ខ្ពស់ឡើងនោះ កំពុងតែកន្លងផុតទៅ តែចំនួនអ្នកស្លាប់នៅក្នុងសហរដ្ឋអាមេរិក ប្រទេស ដែលរបាយការណ៍អ្នកស្លាប់ និងឆ្លងមេរោគច្រើនជាងគេក្នុងពិភពលោក នៅតែកើនឡើងជារឿយ។
លោកវេជ្ជបណ្ឌិត អ៊ែនថូនី ហ្វៅស៊ី ប្រធានក្រុមទីប្រឹក្សាផ្នែកវេជ្ជសាស្ត្រ របស់លោកប្រធានាធិបតី ចូ បៃដិន បានផ្ដល់សម្ភាស ជាមួយកម្មវិធី “Meet the press” របស់ស្ថានីយទូរទស្សន៍ NBC ថា “វាគួរឱ្យព្រឺខ្លាច និងជាលើកដំបូងក្នុងប្រវត្តិសាស្ត្រ…យើងមិនដែលឃើញអ្វី សូម្បីតែប្រហាក់ប្រហែលនឹងរឿងនេះឡើយ ក្នុងជុំជាង ១០០ឆ្នាំមកនេះ ចាប់តាំងពីជំងឺរាតត្បាតគ្រុនផ្ដាសាយធំក្នុងឆ្នាំ១៩១៨ មក”
“វាជាអ្វីម្យ៉ាងដែលគួរឱ្យភ័យរន្ធត់ និងភ្ញាក់ផ្អើល បើលោកអ្នកសម្លឹងមើលពីចំនួន ស្ទើរតែមិនគួរឱ្យជឿ តែវាជារឿងពិត” លោកបានថ្លែងយ៉ាងដូច្នេះ ក្រោយពីចំនួនអ្នកស្លាប់ដោយសារកូវីដ-១៩ នៅក្នុងសហរដ្ឋអាមេរិក តាមរយៈការតាមដានរបស់មហាវិទ្យាល័យ ចន ហប់គីនស៍ ដែលស្ថិតក្នុងចំនួនជាង ៤៩៨ ០០០នាក់។
ក្រោយពីរកឃើញអ្នកស្លាប់ដោយសារកូវីដ-១៩ ដំបូងគេនៅក្នុងសហរដ្ឋអាមេរិក កាលពីខែកុម្ភៈ ២០២០មក វាប្រើពេលវេលា ៣ខែ សម្រាប់ការស្ទុះហក់ផុតចំនួន ១០០ ០០០នាក់ ក្នុងវិបត្តិដំបូងនៃការឆ្លងរាលដាល ដែលនីវយ៉ក គឺជារដ្ឋដែលបានរងផលប៉ះពាល់ធ្ងន់ធ្ងរបំផុត។
តែក្រោយពីជំងឺរាតត្បាតដ៏ធំ បានឆ្លងរាលដាលទូទាំងប្រទេស អត្រាការស្លាប់ បានកើនឡើងដូចស្រមោលអន្ទោលតាមប្រាណ ដោយចុងក្រោយបំផុត វាប្រើពេលវេលាត្រឹមតែ ១ខែប៉ុណ្ណោះ ក្នុងការសម្លាប់ជីវិតមនុស្សពីចំនួន ៤០០ ០០០នាក់ ទៅក្បែរ ៥០០ ០០០នាក់ ដោយចំនួនដែលកើនឡើងយ៉ាងឆាប់រហ័សនេះ មួយផ្នែក ជាលទ្ធផលមកពីការប្រមូលផ្ដុំគ្នាក្នុងអំឡុងរដូវកាលថ្ងៃឈប់សម្រាករយៈពេលយូរ។
តែយ៉ាងណាក្ដី លោកហ្វៅស៊ី បានបញ្ជាក់ថា ចំនួនអ្នកឆ្លងមេរោគថ្មីប្រចាំថ្ងៃ បានថយចុះយ៉ាងច្រើន ក្រោយឆ្លងផុតចំណុចខ្ពស់បំផុតកាលពីខែមករា តែលោកបានដាស់តឿនថា នៅយូរតទៅទៀត ទម្រាំតែជីវិតប្រក្រតី នឹងវិលមកវិញ…“ខ្ញុំគិតថា យើងនឹងមានសភាវប្រក្រតីមួយកម្រិត ពេលដែលយើងឆ្លងផុតរដូវស្លឹកឈើជ្រុះ និងរដូវរងា ក្នុងអំឡុងចុងឆ្នាំ”
លោកបៃដិន បានបញ្ជាក់កាលពីសប្ដាហ៍កន្លងទៅថា គ្រោងការចាក់វ៉ាក់សាំងជូនប្រជាជន ត្រូវជួបនឹងបញ្ហាជ្រៀតជ្រែកជាច្រើន ដោយសារបណ្ដាអ្នកផលិត ត្រូវប្រឈមនឹងការសាកល្បងដ៏ធ្ងន់ធ្ងរ ត្រូវផលិតវ៉ាក់សាំងក្នុងចំនួនដ៏ច្រើនមហាសាលក្នុងរយៈពេលដ៏ឆាប់រហ័ស… “វាគឺ ការសាកល្បងផ្នែកឡូជីស្ទិក បែបមិនដែលធ្លាប់ជួបពីមុនមក តែយើងនឹងធ្វើវាឱ្យសម្រេច”
លោកបៃដិន បានដាក់គោលដៅចាក់វ៉ាក់សាំងឱ្យប្រជាជន ១លាននាក់ក្នុង ១ថ្ងៃ សរុបទៅ ឱ្យបាន ១០០លាននាក់ ក្នុង ១០០ថ្ងៃដំបូងនៃការគ្រងតំណែងប្រធានាធិបតីរបស់លោក ដែលមើលទៅដូចជា វានឹងសម្រេចគោលដៅបានយ៉ាងងាយស្រួល ដោយសារតែបច្ចុប្បន្ន អត្រាការចាក់វ៉ាក់សាំងជាមធ្យម ស្ថិតក្នុងចំនួន ១,៧លាននាក់ ក្នុង ១ថ្ងៃ។
ដោយចំនួនអ្នកស្លាប់ដោយសារកូវីដ-១៩ ក្នុងសហរដ្ឋអាមេរិក អាចនឹងកើនលើស ៥០០ ០០០នាក់ក្នុងពេលឆាប់ៗនេះ លោកបៃដិនប្រាប់ថា លោកមិនត្រូវការគណនាយ៉ាងច្បាស់លាស់ថា តើពេលណានឹងអាចគ្រប់គ្រងវិបត្តិនេះបាននោះទេ តែយ៉ាងណាក្ដី លោករំពឹងថា វ៉ាក់សាំងចំនួន ៦០០លានដូស ដែលគ្រប់គ្រាន់ក្នុងការចាក់ ២ដូសឱ្យប្រជាជនទាំងអស់របស់ប្រទេស នឹងត្រៀមរួចជាស្រេចក្នុងអំឡុងដំណាច់ខែកក្កដា។
ពេលនេះមានប្រជាជនច្រើនជាង ៦១លាននាក់រួចហើយ បានចូលទទួលការចាក់វ៉ាក់សាំងយ៉ាងតិច ១ដូសនៅក្នុងសហរដ្ឋអាមេរិក និងមានប្រមាណ ១៨លាននាក់ហើយ ដែលបានទទួលវ៉ាក់សាំងគ្រប់រួចហើយទាំង ២ដូស ទោះជាគ្រោងការចាក់វ៉ាក់សាំង ត្រូវជួបនឹងបញ្ហាយឺតយ៉ាវដោយប្រការខ្លះ ដោយសារតែស្ថានភាពធាតុអាកាសដែលរងាខ្លាំង និងមានព្យុះព្រឹលបោកបក់ក្នុងតំបន់ជាច្រើនរបស់អាមេរិក អស់រយៈពេលជាង ១សប្ដាហ៍ក៏ដោយ។
ទោះជាមានក្ដីព្រួយបារម្ភកាន់តែខ្លាំងឡើង ពាក់ព័ន្ធនឹងមេរោគក្លាយពូជរបស់វីរុសកូរ៉ូណាប្រភេទថ្មី ជាពិសេសមេរោគក្លាយពូជ ដែលចម្លងសាយភាយបានងាយ និងលឿនជាងប្រភេទមុន ដែលវ៉ាក់សាំងបច្ចុប្បន្នមានប្រសិទ្ធភាពថយចុះក៏ដោយ តែសំឡេងរបស់លោកហ្វៅស៊ី នៅតែពោរពេញទៅដោយក្ដីសង្ឃឹម ចំពោះសំណួរដែលសួរថា តើព្យុះនៃការឆ្លងរាលដាល នឹងមកដល់ ១រលកទៀតដែរឬទេ?។
លោកបានប្រាប់ទីភ្នាក់ងារព័ត៌មាន CNN ថា “ខ្ញុំមិនគិតថា វានឹងក្លាយជារឿងដែលមិនអាចចៀសវាងបាននោះទេ…វ៉ាក់សាំងបច្ចុប្បន្នដែលយើងកំពុងចែកចាយក្នុងពេលនេះ ទាំងរបស់ម៉ូឌើណា និងហ្វ៉ៃហ្ស៊ើរ សុទ្ធតែទទួលបានលទ្ធផលល្អជាមួយមេរោគក្លាយពូជចក្រភពអង់គ្លេស”៕
ប្រភព៖ ទីភ្នាក់ងារព័ត៌មាន AFP
ប្រែ និងសម្រួលដោយ តាវ៉ែនតា
#អរគុណសន្តិភាព
