អាមេរិក៖ លទ្ធផលនៃការស្រាវជ្រាវ ២កន្លែង បានបង្ហាញឱ្យឃើញថា មេរោគក្លាយពូជរបស់វីរុសកូរ៉ូណាប្រភេទថ្មី ដែលរកឃើញនៅក្នុងទីក្រុងនីវយ៉ក ស៊ីធី កាលពីខែវិច្ឆិកា ឆ្នាំទៅ អាចមានកម្លាំងតតាំង ខ្លាំងជាងមេរោគក្លាយពូជដទៃទៀត ជាមួយវ៉ាក់សាំង ដែលមនុស្សកំពុងនាំគ្នាចាក់នាពេលបច្ចុប្បន្ន តែយ៉ាងណាក្ដី ក្រុមមន្ត្រីពេទ្យជាន់ខ្ពស់ កាលពីថ្ងៃព្រហស្បតិ៍ (ទី២៥កុម្ភៈ) ម្សិលមិញ បានប្រញាប់ចេញមកថ្លែងសម្រាលការព្រួយបារម្ភនេះ ដោយបានបញ្ជាក់ថា វាហាក់ដូចជាលឿនពេកហើយ ក្នុងការប្រញាប់សរុបពីប្រសិទ្ធភាពរបស់វ៉ាក់សាំងជាមួយមេរោគក្លាយពូជមួយនេះ។
លោកវេជ្ជបណ្ឌិត ចេយ៍ វើម៉ា ប្រធានទីប្រឹក្សាខាងវេជ្ជសាស្ត្រ របស់លោក ប៊ីល ដឹ ប្រាស៊ីអូ អភិបាលក្រុងនីវយ៉ក បានបញ្ជាក់ថា វាហាក់ដូចជាលឿនពេកហើយ ក្នុងសន្និដ្ឋានលើលទ្ធផលពីបន្ទប់ប្រតិបត្តិការ ពាក់ព័ន្ធនឹងប្រសិទ្ធភាពរបស់វ៉ាក់សាំងផ្សេងៗ ដែលមានចំពោះវីរុសកូរ៉ូណាប្រភេទថ្មីក្លាយពូជមួយនោះ ព្រមទាំងបង្ហាញពីការបារម្ភកង្វល់ របស់បណ្ដាអ្នកវិទ្យាសាស្ត្រដទៃៗទៀត ដែលបានដាក់សំណួរថា តើហេតុអី បានលទ្ធផលនៃការស្រាវជ្រាវ ក្នុងរយៈបឋមនេះ បែកធ្លាយទៅដល់អ្នកសារព័ត៌មាន មុនដល់ដៃអ្នកជំនាញការ?។
“យើងមិនទាន់ដឹងច្បាស់ពាក់ព័ន្ធនឹងប្រព័ន្ធប្រឆាំងមេរោគរបស់មនុស្សច្រើនគ្រប់គ្រាន់ ដើម្បីអាចសរុបរឿងនេះដោយត្រង់បានទេ” លោកវើម៉ា បានថ្លែងបែបនេះ ក្នុងអំឡុងពេលថ្លែងសរុបព័ត៌មាន រួមជាមួយលោកអភិបាលក្រុង “នោះគឺជាហេតុផលដែលថា តើហេតុអី បានយើងត្រូវសាកល្បងខាងគ្លីនិក(ការព្យាបាល) នោះគឺជាហេតុផលដែលថា តើហេតុអី បានយើងត្រូវប្រមូលទិន្នន័យជាបន្តបន្ទាប់ទៀតនោះ”
លោកវើម៉ា បានបញ្ជាក់ថា ការសាកល្បងខាងគ្លីនិករបស់វ៉ាក់សាំង ក្នុងនោះរួមទាំងការសាកល្បងនៅក្នុងប្រទេសផ្សេងៗ ដូចជាប្រេស៊ីល និងអាហ្វ្រិក ប្រទេសដែលកំពុងសាកល្បងវ៉ាក់សាំងរបស់ក្រុមហ៊ុន ចនសុន អ៊ែន ចនសុន ដែលមិនទាន់បានអនុម័តនោះ បានរកឃើញថា វ៉ាក់សាំងទាំងឡាយ “មានប្រសិទ្ធភាពយ៉ាងគួរឱ្យស្ងើចសរសើរ” សម្រាប់ការពារការស្លាប់ ឬឈឺធ្ងន់ដោយសារការឆ្លងមេរោគ។
មេរោគប្រភេទក្លាយពូជ ដែលរកឃើញលើកដំបូងនៅក្នុងប្រទេសអាហ្វ្រិកខាងត្បូង និងប្រេស៊ីល អាចចម្លងសាយភាយមេរោគ បានងាយជាងមេរោគចាស់ជាច្រើនដង និងនៅពេលនេះ ពួកវាកំពុងតែចម្លងរាលដាលក្នុងរង្វង់កាន់តែធំឡើង ឆ្ពោះទៅរកប្រទេសផ្សេងៗទៀតហើយ។
នៅសហរដ្ឋអាមេរិក ប្រទេសដែលវីរុសបានប្រហារជីវិតមនុស្ស រួចហើយជាង ៥០០ ០០០នាក់ ក្នុងអំឡុងពេល ១៣ខែនោះ តួលេខអ្នកឆ្លងមេរោគថ្មី និងស្លាប់ បានថយចុះជាបន្តបន្ទាប់ ក្នុងអំឡុងប៉ុន្មានសប្ដាហ៍កន្លងមកនេះ។ ចំណែកឯចំនួនអ្នកឆ្លងមេរោគ ដែលមានអាការធ្ងន់ធ្ងរ ដល់ថ្នាក់ត្រូវចូលមន្ទីរពេទ្យព្យាបាល ដែលជាកត្តាកំណត់ដ៏សំខាន់ លើក្ដីព្រួយបារម្ភ ពាក់ព័ន្ធនឹងសភាវអ្នកជំងឺហៀរមន្ទីរពេទ្យក្នុងតំបន់នោះ ក៏បានថយចុះអស់ជាង ៦០% ពីលំដាប់ខ្ពស់បំផុត ៥៣ ៩៣៨នាក់កាលពីថ្ងៃទី៦ ខែមករាដែរ។
ទោះជាទិដ្ឋភាពរួម ស្ថិតក្នុងសញ្ញាថយចុះក៏ដោយ តែគេនៅតែរកឃើញ អ្នកស្លាប់ក្នុងចំនួនដែលខ្ពស់ នៅក្នុងរដ្ឋកាលីហ្វ័រនៀ ដោយចំនួនសរុបអ្នកស្លាប់នៅក្នុងរដ្ឋមួយនេះ បានកើនឡើងធ្លុះ ៥០ ០០០នាក់រួចរាល់ហើយ កាលពីថ្ងៃពុធ (ទី24កុម្ភៈ) តាមដោយទីក្រុងនីវយ៉ក មានអ្នកស្លាប់ចំនួន ៤៥ ៨៧១នាក់។
មជ្ឈមណ្ឌលគ្រប់គ្រង និងបង្ការជំងឺនៃសហរដ្ឋអាមេរិក ឬ CDC បានសន្និដ្ឋានថា មានប្រជាជនចំនួន ៤២,២លាននាក់នៅក្នុងសហរដ្ឋអាមេរិក បានទទួលវ៉ាក់សាំងកូវីដ-១៩ ដែលបានអនុម័តហើយ របស់ហ្វ៉ៃហ្ស៊ើរ អ៊ិងក៍ ដែលសហការគ្នាអភិវឌ្ឍជាមួយ បៃអូអេនថេក ឬវ៉ាក់សាំងរបស់ម៉ូឌើណា អ៊ិងក៍ យ៉ាងតិច ១ដូស ពីចំនួនទាំងអស់ ២ដូស ខណៈដែលវ៉ាក់សាំង របស់ចនសុន អ៊ែន ចនសុន ត្រូវបានគេរំពឹងថា នឹងបានទទួលការអនុម័តប្រើក្នុងករណីអាសន្ន ក្នុងប៉ុន្មានថ្ងៃខាងមុខនេះ។
តាមរយៈទិន្នន័យ របស់បណ្ដាអ្នកស្រាវជ្រាវ នៃមហាវិទ្យាល័យវេជ្ជសាស្ត្រ នៃសាកលវិទ្យាល័យខូឡុំបៀ បានបញ្ជាក់ថា ក្នុងចំណោមអ្នកឆ្លងមេរោគថ្មី រហូតមកដល់ពាក់កណ្ដាលខែកុម្ភៈនេះ ត្រូវបានរកឃើញថា មានអ្នកឆ្លងមេរោគក្លាយពូជថ្មី ដែលមានឈ្មោះថា B.1.526 ប្រមាណជា ១២%។
ក្រុមអ្នកវិទ្យាសាស្ត្រនៃសាកលវិទ្យាល័យខូឡុំបៀ បានរកឃើញថា B.1.526 មានលក្ខណៈដែលគួរឱ្យខ្លាចមួយចំនួន ដូចគ្នានឹងមេរោគក្លាយពូជអាហ្វ្រិកខាងត្បូង និងប្រេស៊ីលដែរ ដោយលទ្ធផលនៃការសិក្សាស្រាវជ្រាវជាច្រើន បានបង្ហាញថា វាអាចតតាំងនឹងវ៉ាក់សាំងកូវីដ-១៩ប្រភេទខ្លះ នាពេលបច្ចុប្បន្ន បានខ្លាំងជាងវីរុសកូរ៉ូណាប្រភេទថ្មីក្លាយពូជឯទៀតកាលពីពេលមុននេះ។
CDC បានរកឃើញអ្នកឆ្លងមេរោគកូវីដ-១៩ប្រភេទក្លាយពូជផ្សេងៗរួចហើយ ច្រើនជាង ១ ៩០០ករណី សាយភាយរាយប៉ាយ នៅស្ទើរតែគ្រប់រដ្ឋទាំងអស់របស់សហរដ្ឋអាមេរិក ភាគច្រើនជាប្រភេទក្លាយពូជ B.1.1.7 ដែលរកឃើញលើកដំបូងនៅក្នុងចក្រភពអង់គ្លេស ដែលចម្លងសាយភាយមេរោគបានងាយជាងវីរុសប្រភេទចាស់ជាច្រើនដង។
លោកវើម៉ា បានណែនាំដល់អ្នកអាន កុំអាលប្រញាប់ដាក់ចិត្តជឿលើរបាយការណ៍លទ្ធផលការស្រាវជ្រាវថ្មីបំផុតនេះពេក ព្រមទាំងបញ្ជាក់ថា មិនមែនគ្រប់មេរោគប្រភេទក្លាយពូជ សុទ្ធតែបង្កើនកម្រិតក្ដីព្រួយបារម្ភផ្នែកសុខភាពសាធារណៈទាំងអស់នោះទេ ដោយលោកបានឱ្យនិយមន័យកំណត់ លើការរកឃើញថ្មីបំផុតនេះថា ជា “មេរោគក្លាយពូជ ដែលគួរឱ្យចាប់អារម្មណ៍” ដែលគួរតែសិក្សាស្រាវជ្រាវ ឱ្យបានដិតដល់បំផុត៕
ប្រភព៖ ទីភ្នាក់ងារព័ត៌មាន Reuters
ប្រែ និងសម្រួលដោយ តាវ៉ែនតា
#អរគុណសន្តិភាព
