អាមេរិក៖ លោកប្រធានាធិបតី ចូ បៃដិន នៃសហរដ្ឋអាមេរិក កាលពីថ្ងៃព្រហស្បតិ៍ (ទី២៥កុម្ភៈ) បានបញ្ជាឱ្យកងទ័ពអាមេរិក បើកការវាយប្រហារខាងអាកាសនៅភាគខាងកើតនៃប្រទេសស៊ីរី កម្ទេចសំណង់អគារផ្សេងៗដែលខាងមន្ទីរបញ្ចកោណបញ្ជាក់ថា ជារបស់ក្រុមឧទ្ទាមអ្នកប្រយុទ្ធ ដែលគាំទ្រដោយប្រទេសអ៊ីរ៉ង់ ជាការឆ្លើយតបនឹងហេតុការណ៍ បាញ់កាំជ្រួចវាយប្រហារមូលដ្ឋានផ្សេងៗរបស់សហរដ្ឋអាមេរិក នៅក្នុងប្រទេសអ៊ីរ៉ាក់ កាលពីអំឡុងប៉ុន្មានថ្ងៃកន្លងទៅ។
ហេតុការណ៍វាយប្រហារ ដែលទីភ្នាក់ងារព័ត៌មានរ៉យទ័រ បានរាយការណ៍មុនគេនេះ មើលទៅហាក់ដូចជាដំណើរការក្នុងដែនកំណត់ និងមានភាពប្រឈមកម្រិតទាប ក្នុងការបង្កឱ្យស្ថានការណ៍រីលរាលដាលធំ។
ការសម្រេចចិត្តរបស់លោកបៃដិន ក្នុងការចាប់ផ្ដើមវាយប្រហារចំពោះតែប្រទេសស៊ីរី មិនរួមប្រទេសអ៊ីរ៉ាក់នេះ យ៉ាងហោចណាស់ក៏ពេលនេះ បានជួយឱ្យរដ្ឋាភិបាលក្នុងប៊ែកឌែត ធូរស្រាលចិត្តបានខ្លះដែរ ក្នុងខណៈដែលពួកគេនៅតែស្ថិតក្នុងអំឡុងពេលដំណើរការស៊ើបអង្កេត ពីហេតុការណ៍វាយប្រហារនៅក្នុងប្រទេស កាលពីថ្ងៃទី១៥ កុម្ភៈ ដែលបណ្ដាលឱ្យកម្លាំងទ័ព និងធនធានមនុស្សរបស់សហរដ្ឋអាមេរិក រងរបួសជាច្រើននាក់។
“តាមបញ្ជារបស់លោកប្រធានាធិបតីបៃដិន កាលពីពេលមុននេះ នៅពេលល្ងាច កងទ័ពសហរដ្ឋអាមេរិក បានបើកប្រតិបត្តិការវាយប្រហារខាងអាកាស កម្ទេចគ្រោងសាងមូលដ្ឋានរបស់ក្រុមឧទ្ទាមអ្នកប្រយុទ្ធ ដែលគាំទ្រដោយអ៊ីរ៉ង់ នៅភាគខាងកើតរបស់ប្រទេសស៊ីរី” លោក ចន ឃើរប៊ី អ្នកនាំពាក្យមន្ទីរបញ្ចកោណ បានបញ្ជាក់នៅក្នុងសេចក្ដីថ្លែងការណ៍ “លោកប្រធានាធិបតីបៃដិន នឹងដំណើរការ ដើម្បីការពារប្រជាជនអាមេរិក និងធនធានមនុស្សរបស់សម្ព័ន្ធមិត្ត ខណៈពេលជាមួយគ្នា យើងក៏បានរួមសហការក្នុងកម្មវិធីដែលល្អិតល្អន់ និងហ្មត់ចត់មួយ ដោយមានគោលដៅ មិនឱ្យស្ថានការណ៍ក្នុងទិដ្ឋភាពរួម ទាំងភាគខាងកើតរបស់ស៊ីរី និងអ៊ីរ៉ាក់ រីករាលដាលធំឡើយ”
អ្នកនាំពាក្យរូបនេះ បានបង្ហើបឱ្យដឹងថា ប្រតិបត្តិការវាយប្រហារខាងអាកាស កម្ទេចសំណង់អគារផ្សេងៗក្នុងបរិវេណចំណុចគ្រប់គ្រងព្រំដែន ដែលត្រូវបានប្រើការដោយក្រុមឧទ្ទាមអ្នកប្រយុទ្ធ ដែលគាំទ្រដោយអ៊ីរ៉ង់ ក្នុងនោះរួមទាំងក្រុមប្រដាប់អាវុធកាតាអ៊ីប ហេឆបូលឡោះហ៍ និងក្រុមកាតាអ៊ីប សាំយីត អាល់-ស៊ូហាដា ទៀតផង។
មន្ត្រីសហរដ្ឋអាមេរិកម្នាក់ ដែលសុំមិនបញ្ចេញឈ្មោះ បានបញ្ជាក់ថា ការសម្រេចចិត្តក្នុងប្រតិបត្តិការនេះ មានចេតនាបញ្ជូនជាសារ ដើម្បីប្រាប់ថា ទោះជាអាមេរិក ត្រូវការដាក់ទោសទណ្ឌក្រុមឧទ្ទាមអ្នកប្រយុទ្ធមែន តែខណៈពេលជាមួយគ្នា អាមេរិកក៏មិនត្រូវការ ឱ្យស្ថានការណ៍នេះ រីករាលដាលធំ ក្លាយជាទំនាស់ដែលកាន់តែធំឡើងដែរ។
មិនទាន់ប្រាកដច្បាស់ថា ប្រតិបត្តិការវាយប្រហារខាងអាកាសរបស់សហរដ្ឋអាមេរិកក្នុងគ្រានេះ បានបង្កការខូចខាត ឬបាត់បង់ច្រើន-តិចប៉ុនណានៅឡើយ តែខាងក្រុមអ្នកសង្កេតការណ៍ ដើម្បីសិទ្ធិមនុស្សនៅក្នុងប្រទេសស៊ីរី បានបញ្ជាក់ថា មានពួកឧទ្ទាមអ្នកប្រយុទ្ធនិយមអ៊ីរ៉ង់ ស្លាប់ ១៧នាក់៕
ប្រភព៖ ទីភ្នាក់ងារព័ត៌មាន Reuter
ប្រែសម្រួលដោយ ស៊ីតា
#អរគុណសន្តិភាព
