ប្រទេសចិន៖ ប៉ូលិសនៅក្នុងប្រទេសចិន និងអាហ្វ្រិកខាងត្បូង បានរឹបអូសវ៉ាក់សាំងកូវីដ-១៩ ក្លែងក្លាយ បានជាច្រើនពាន់ដូស នេះបើតាមការបង្ហើបឱ្យដឹងពីស្ថាប័នប៉ូលិសអន្តរជាតិ ឬ Interpol កាលពីថ្ងៃពុធ ទី៣មីនា ព្រមទាំងបានអះអាងថា នេះគ្រាន់តែជា “ចំណែកតូចមួយ” ប៉ុណ្ណោះ ក្នុងបទល្មើសឧក្រិដ្ឋ ដែលពាក់ព័ន្ធនឹងវ៉ាក់សាំង។
Interpol ដែលមានទីស្នាក់ការធំ នៅក្នុងទីក្រុងលីយ៉ុង ប្រទេសបារាំង បានបញ្ជាក់ថា វ៉ាក់សាំង ៤០០ដប ស្មើនឹងបរិមាណ ប្រមាណជា ២ ៤០០ដូស ត្រូវបានរកឃើញនៅក្នុងឃ្លាំស្តុកទំនិញមួយកន្លែង នៅក្នុងទីក្រុងជើមិស្តុន ជាយក្រុងចូហានេស្ប៊ើក ប្រទេសអាហ្វ្រិកខាងត្បូង ក្រៅពីនេះ តាមរយៈការឆែកឆេរ អាជ្ញាធរនៅបានរកឃើញម៉ាស់ការពារក្លែងក្លាយ ព្រមទាំងបានចាប់ខ្លួនជនសង្ស័យ ៤នាក់ និងជនជាតិហ្ស៊ែមបៀ ១នាក់ទៀតផង។
ចំណែកនៅក្នុងប្រទេសចិនវិញ ប៉ូលិស បានទទួលជោគជ័យនៅក្នុងការបញ្ជាក់អត្តសញ្ញាណខ្សែបណ្ដាញ លក់វ៉ាក់សាំងក្លែងក្លាយ នៅក្នុងការស៊ើបអង្កេត ដែលបានការគាំទ្រពី Interpol ដែលមានសមាជិក ១៩៤ប្រទេស។
សេចក្ដីថ្លែងការណ៍ បានបញ្ជាក់ថា Interpol បានចេញ “ប្រកាសពណ៌ទឹកក្រូច” ដាស់តឿនអាជ្ញាធរទូទាំងពិភពលោក ឱ្យត្រៀមខ្លួនទប់ទប់នឹងខ្សែបណ្ដាញក្រុមឧក្រិដ្ឋជន ដែលមានគោលដៅពាក់ព័ន្ធនឹងវ៉ាក់សាំងកូវីដ-១៩ ទាំងខាងរូបវន្ត និងខាងអនឡាញ។
លោក ជើហ្គេន ស្តុក លេខាធិការ Interpol បានបញ្ជាក់ថា “ទោះជាយើងរីករាយនឹងលទ្ធផលដែលបង្ហាញឱ្យឃើញនេះក្ដី តែនេះ វាគ្រាន់តែជា ចំណែកមួយតូចប៉ុណ្ណោះ ក្នុងរឿងដែលពាក់ព័ន្ធនឹងវ៉ាក់សាំងកូវីដ-១៩”
Interpol បានបញ្ជាក់ទៀតថា ក្រៅពីការចាប់បាន នៅក្នុងប្រទេសអាហ្វ្រិកខាងត្បុង និងចិនហើយ ខាងទីស្នាក់ការនៅបានទទួលរបាយការណ៍បន្ថែម ពាក់ព័ន្ធនឹងការព្យាយាមចែកចាយវ៉ាក់សាំងក្លែងក្លាយ និងឧបាយកលផ្សេងៗ ដោយមានគោលដៅទៅលើអង្គការសុខភាពសាធារណៈទាំងឡាយ ក្នុងនោះរួមទាំងមណ្ឌលថែទាំមនុស្សចាស់ជរាផងដែរ។
ខណៈពេលជាមួយគ្នា ខាង Interpol នៅបានដាស់តឿនថែមទៀតថា បច្ចុប្បន្ននៅមិនទាន់មានវ៉ាក់សាំងមួយណា ដែលបានទទួលការអនុម័តហើយ អាចបញ្ជាទិញបានតាមអនឡាញនៅឡើយទេ “វ៉ាក់សាំងទាំងអស់ណា ដែលឃោសនាផ្សាយពាណិជ្ជកម្មនៅតាមវេបសាយផ្សេងៗ ឬវេបសាយផ្សារងងឹត គឺជារឿងខុសច្បាប់ មិនធ្លាប់ឆ្លងកាត់ការពិសោធ ឬអាចមានគ្រោះថ្នាក់ទៀតផង។
លោកស្តុក ធ្លាប់បានដាស់តឿនកាលពីខែធ្នូ ម្ដងរួចមកហើយថា រកឃើញបទល្មើសឧក្រិដ្ឋដែលពាក់ព័ន្ធនឹងការចែកចាយវ៉ាក់សាំងកើនឡើងជារឿយៗ ក្នុងនៅរួមទាំងការលួច ការគាស់ឃ្លាំងស្តុកវ៉ាក់សាំង និងការវាយប្រហារក្បួនរថយន្ត ក្នុងអំឡុងពេលដឹកជញ្ជូនវ៉ាក់សាំងទៀតផង៕
ប្រភព៖ ទីភ្នាក់ងារព័ត៌មាន AFP
ប្រែ និងសម្រួលដោយ តាវ៉ែនតា
#អរគុណសន្តិភាព
