ភ្នំពេញ៖ នៅថ្ងៃទី១៧ ខែមីនា ឆ្នាំ២០២១នេះ ក្រសួងអប់រំ យុវជន និង កីឡា បានចេញសេចក្ដីណែនាំមួយ ស្ដីពីការពង្រឹងវិធានការសុវត្ថិភាពសុខភាពសិក្សានៅតាមគ្រឹះស្ថានសិក្សា ដែលតម្រូវឲ្យគ្រប់គ្រឹះស្ថានសិក្សាទាំងអស់ និង មន្ទីរអប់រំ យុវជននិងកីឡារាជធានីខេត្ត រួមទាំងការិយាល័យអប់រំ យុវជននិងកីឡាក្រុងស្រុកខ័ណ្ឌ ចូលរួមអនុវត្តប្រកបដោយស្មារតីទទួលខុសត្រូវខ្ពស់ ដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ-១៩ ។
សេចក្ដីណែនាំក៏បានជំរុញឲ្យបង្កើត និងពង្រឹងភារកិច្ចរបស់គណៈកម្មការសុខភាពសិក្សានៅតាមគ្រឹះស្ថានសិក្សា ដែលមាននាយកសាលា ជាប្រធាន និងមានការចូលរួមពីសហគមន៍ , ត្រូវតាមដានជាប្រចាំនូវសកម្មភាព និងការចល័តទីកន្លែងរបស់បុគ្គលិកអប់រំក្រោមឱវាទ , សហការជាមួយអាជ្ញាធរដែនដី ដើម្បីតាមដាន និងជនចំណូលស្រុក រួមទាំងការអនុវត្ត វិធានការធ្វើចត្តាឡីស័ក ហើយក្នុងករណីមានការសង្ស័យ គ្រឹះស្ថានសិក្សាត្រូវផ្អាកដំណើរការជាបណ្តោះអាសន្ន និងត្រូវរាយការណ៍ ជូនអាជ្ញាធរអប់រំតាមលំដាប់ថ្នាក់ និង ករណីមានការសង្ស័យ ឬសភាពមិនប្រក្រតី ដែលជារោគសញ្ញានៃជំងឺកូវីដ-១៩ ត្រូវរាយការណ៍ ឬ ទូរសព្ទទៅលេខ ១១៥ ជាបន្ទាន់ ។
កាលពីថ្ងៃទី០៩ ខែមីនា ឆ្នាំ២០២១កន្លងទៅនេះ បន្ទាប់ពីបានរកឃើញករណីវិជ្ជមានជំងឺកូវីដ១៩ ដែលជាប់ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ ទៅលើស្ត្រីមួយរូបមានលំនៅឋាននៅភូមិព្រៃវែង ឃុំសំរោងយា ស្រុកពួក រួចមក ការិយាល័យអប់រំ យុវជន និង កីឡាស្រុក នៃរដ្ឋបាលស្រុកពួក បានសម្រេចផ្អាកការរៀន នៅសាលារៀនមួយចំនួនរួមមាន ៖ ឃុំខ្នាត ចំនួន០៦ សាលា , ឃុំពួក ចំនួន០៥ សាលា , ឃុំសំរោងយា ចំនួន០៣ សាលា និង ឃុំកែវព៌ណ ចំនួន ០៥ សាលា ប៉ុន្តែនៅថ្ងៃទី១១ ខែមីនា ឆ្នាំ២០២១នេះ ការិយាល័យអប់រំយុវជន និងកីឡាស្រុកពួក ក៏សម្រេចបើកឲ្យដំណើរការសិក្សារបស់សាលាទាំង១៩ ជាធម្មតាវិញ ដោយអនុវត្តតាមវិធានការ ៣ការពារ និង ៣កុំ ឱ្យបានខ្ជាប់ខ្លួន បន្ទាប់ពីការស្រាវជ្រាវ និងពិនិត្យសំណាកលើកទី១ ចំពោះអ្នកពាក់ព័ន្ធផ្ទាល់ និងប្រយោល ជាមួយស្ត្រី ដែលផ្ទុកជំងឺកូវីដ-១៩ លទ្ធផល គឺអវិជ្ជមាន កូវីដ -១៩ ទាំងអស់ ។
ដោយឡែកកាលពីថ្ងៃទី១៦ ខែមីនា ឆ្នាំ២០២១ម្សិលមិញនេះ លោក ទួន មិថុនា ប្រធានការិយាល័យអធិការកិច្ច នៃមន្ទីរអប់រំ យុវជននិងកីឡាខេត្តសៀមរាប បានបញ្ជាក់ថា សម្រាប់ខេត្តសៀមរាប មន្ទីរមិនមានគោលការណ៍ក្នុងការផ្អាក ឬបិទសាលានៅឡើយនោះទេ ទោះបីរដ្ឋបាលខេត្ត បានចេញប្រកាសពីការបិទពីធីបុណ្យ ឬរៀបអាពាហ៍ពិពាហ៍ក៏ដោយ ប៉ុន្តែបើមានករណីផ្ទុះជំងឺកូវីដ-១៩ខ្លាំងក្នុងខេត្ត ដែលត្រូវបិទសាលា យើងនឹងមានសេចក្តីជូនដំណឹងឱ្យបានដឹងទាំងអស់គ្នា ៕
#អរគុណសន្តិភាព
