ភ្នំពេញ៖ អនុវត្តន៍តាមសេចក្តីប្រកាសរបស់សម្តេចនាយករដ្ឋមន្ត្រី ហ៊ុន សែន កាលពីថ្ងៃទី២៤ ខែមិថុនា ឆ្នាំ២០២០ ស្តីពីការឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះក្នុងអំឡុង ពេលប្រយុទ្ធនឹងជំងឺកូវីដ-១៩ រយៈពេល៣ខែ ចាប់ពីខែមិថុនាមកនេះ ក្រសួងសង្គមកិច្ច អតីតយុទ្ធជន និងយុវនីតិសម្បទា បានឧបត្ថម្ភសាច់ប្រាក់ដល់គ្រួសារក្រីក្របានចំនួន ៦២៤.៦៤៤គ្រួសារ ស្មើនឹង ២.៥០១.៥២០នាក់ សរុបថវិកាអស់ ១០០លានដុល្លារអាម៉េរិក។
ឯកឧត្តមរដ្ឋមន្ត្រី វង សូត បានលើកឡើងថា សម្តេចនាយករដ្ឋមន្ត្រី បានប្រកាស បើកកម្មវិធីអនុវត្តន៍ការឧបត្ថម្ភសាច់ប្រាក់ជូនគ្រួសារក្រីក្រ នៅថ្ងៃទី២៤ ខែមិថុនា ហើយនៅ ថ្ងៃទី២៥ ខែមិថុនា ឆ្នាំ២០២០ ចាប់ផ្តើមបើកលុយ។ ផ្អែកលើទិន្នន័យរួម ដែលមានភាគី ពាក់ព័ន្ធ ពិសេសក្រសួងផែនការទាក់ទិនការកំណត់ទិន្នន័យ ក្រសួងសង្គមកិច្ចជាអ្នកប្រតិបត្តិ ជាក់ស្តែង ក្រសួងហិរញ្ញហិរញ្ញវត្ថុជាអ្នកផ្តល់លុយ។
ក្នុងតួលេខ ៥៦ម៉ឺនគ្រួសារ ដល់ អនុវត្តន៍ជាក់ស្តែងមានគ្រួសារក្រីក្រកើនលើសហ្នឹង។ អីចឹង តួលេខនេះយើងបានត្រួតពិនិត្យ មុនក្នុងកម្រិតប៉ាន់ស្មាន តែប្រតិបត្តិជាក់ស្តែងយើងផ្អែកទៅតាមចំនួនជាក់ស្តែង តែក៏ យើងមានហេតុផលមួយទាក់ទិននឹងការឧបត្ថម្ភសាច់ប្រាក់នេះ ក្រសួងផែនការក៏បានលើកថា ចំនួនគ្រួសារក្រីក្របើសិនណាគាត់ស្ថិតក្នុងស្ថានភាពក្រីក្រពិតប្រាកដ តែមិនទាន់មានប័ណ្ណ យើងបានបើកសិទ្ធិឱ្យគាត់ស្នើសុំ និងចេញប័ណ្ណទទួលស្គាល់ពួកគាត់ ហើយគាត់នឹង អាចបើកលុយបាន។
អីចឹង យើងបានកំណត់នៅរាងរាល់ថ្ងៃទី១៥ នៃខែនីមួយៗ យើងនឹង បញ្ចប់ការឧបត្ថម្ភសាច់ប្រាក់ ហើយអ្នកដែលបានបញ្ចូលថ្មីនឹងចាប់ បើកជូនពីថ្ងៃទី១៦ទៅ ក្នុងខែជាបន្តបន្ទាប់។ សម្រាប់ខែកញ្ញានេះយើងបញ្ចប់ការឧបត្ថម្ភនៅថ្ងៃទី២៤ ហើយចាប់ ពីថ្ងៃទី២៥ ខែកញ្ញានេះទៅយើងចាប់ផ្តើមបើកប្រាក់ឧបត្ថម្ភខែថ្មីទៀត។
តាមរបាយការណ៍របស់ឯកឧត្តម សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសប្បទា បានឱ្យដឹងថា មកដល់ថ្ងៃនេះយើងបាន អនុវត្តន៍បាន៣ខែ ហើយអស់សាច់ប្រាក់ជាង ១០០លានដុល្លារ ដល់គ្រួសារក្រីក្រចំនួនជាង ២លាន ៥សែននាក់ តែបច្ចុប្បន្នយើងកំពុងបានទទួលការស្នើសុំ ចូលជាសមាជិកគ្រួសារក្រីក្រថ្មីជាច្រើនបន្ត បន្ទាប់ទៀត៕
