ភ្នំពេញ៖ អ្នកនាំពាក្យក្រសួងអប់រំ បញ្ជាក់ថា មិនមានការលើកពេលប្រឡងឌីប្លូម និងបាក់ឌុបនោះទេ បើទោះបីមានស្ថានការណ៍ក្រោយព្រឹត្តិការណ៍ ០៣វិច្ឆិកា ក៏ដោយ។
ឯកឧត្តម រស់ សុវាចា អ្នកនាំពាក្យក្រសួងអប់រំ បានប្រាប់នៅថ្ងៃទី១២ ខែវិច្ឆិកា ឆ្នាំ២០២០ម្សិលមិញនេះថា ៖ទោះបីការសិក្សារបស់សិស្សបានផ្អាកជាបណ្តោះអាសន្ន នៅតាមទីតាំងមួយចំនួន នៅរាជធានីភ្នំពេញ និងទីរួមខេត្តកណ្តាល រយៈពេល២សប្តាហ៍ ដោយសារព្រឹត្តិការណ៍ ០៣ ខែវិច្ឆិកាយ៉ាងណាក្តី ប៉ុន្តែក្រសួងអប់រំ មិនទាន់មាន ផែនការលើកពេល ការប្រឡងនោះទេ គឺ ក្រសួងអប់រំ នៅបន្តតាមដាន និងវាយតម្លៃ ស្ថានការវិវត្តន៍ទាក់ទង ស្ថានភាពនៃការរីករាលជំងឺកូវីដ-១៩ ហើយបើមានអ្វីប្រែប្រួលនោះ ក្រសួងនឹងជូនដំណឹងនៅពេល ក្រោយ។
ឯកឧត្តមបញ្ជាក់ថា សម្រាប់គុណភាពប្រឡងឆ្នាំនេះនៅរក្សាដូចឆ្នាំមុនៗដដែលដោយរក្សាគុណភាពអប់រំ អនុវត្តន៍គោលការណ៍ធំ៤ គឺគោលការណ៍ច្បាប់យុត្តិធម៌ តម្លាភាព និងលទ្ធផលអាចទទួលយកបាន ដើម្បីរក្សាគុណភាពប្រឡងជូនដល់សិស្សានុសិស្សនិងបេក្ខជនប្រឡងផ្ទាល់។
ឯកឧត្តមបញ្ជាក់ថា៖ នៅក្នុងការប្រឡងបាក់ឌុប សម្រាប់ឆ្នាំ២០២០នេះ ក្រសួងអប់រំក៏នៅតែផ្តល់ជូននិទ្ទេស (និទ្ទេស A, B, C, D និង E) ជូនដល់បេក្ខជន ដូចឆ្នាំមុនដែរ។ ធ្វើបែបនេះដើម្បីរក្សាគុណភាពនៃការប្រឡងរបស់បេក្ខជន ឆ្លើយតបនឹងការខិតខំ ប្រឹងប្រែងសិក្សារៀនសូត្រ របស់បេក្ខជនទាំងអស់។
សូមជម្រាបថា៖ ក្រសួងអប់រំបានកំណត់កាលបរិច្ឆេទសម្រាប់ការប្រឡងសញ្ញាបត្រមធ្យមសិក្សាបឋមភូមិ (ឌីប្លូម)នៅថ្ងៃទី៣០ ខែវិច្ឆិកា ឆ្នាំ២០២០ និងសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃទី២១ ខែធ្នូ ឆ្នាំ២០២០ ៕
#អរគុណសន្តិភាព
