អាមេរិក៖ លោកប្រធានាធិបតី ដូណាល់ ត្រាំ បានចុះហត្ថលេខាលើបទបញ្ជាពិសេសមួយកាលពីថ្ងៃព្រហស្បតិ៍ (ទី១២ វិច្ឆិកា) ហាមពលរដ្ឋអាមេរិកាំង វិនិយោគជាមួយក្រុមហ៊ុនចិនទាំងឡាយ ដែលខាងក្រុងវ៉ាស៊ីនតោនជឿថា មានម្ចាស់ ឬគ្រប់គ្រងដោយកងទ័ពចិន ដែលនេះជាសកម្មភាពបន្ថែមសម្ពាធ ទៅលើក្រុងប៉េកាំង តាមក្រោយសង្គ្រាមបោះឆ្នោតជ្រើសតាំងប្រធានាធិបតីសហរដ្ឋអាមេរិក។
បទបញ្ជានោះ អាចហុចផលប៉ះពាល់ទៅលើបណ្ដាក្រុមហ៊ុនយក្សធំៗ របស់ចិនមួយចំនួន ក្នុងនោះរួមទាំងបណ្ដាក្រុមហ៊ុនទូរគមនាគមន៍ទាំងឡាយ មិនថាតែ Telecom Corp, China Mobile និងរួមទាំង ហ៊ិក វីហ្សឹន ក្រុមហ៊ុនផលិតឧបករណ៍សុវត្ថិភាពផងដែរ។
សកម្មភាពនេះ កំណត់ឡើង ដើម្បីទប់ស្កាត់ ក្រុមហ៊ុនដើម្បីការវិនិយោគផ្សេងៗរបស់សហរដ្ឋអាមេរិក មូលនិធិបំណាច់ និងផ្សេងៗ មិនឱ្យទិញ-លក់ភាគហ៊ុនក្រុមហ៊ុនចិន ៣១កន្លែង ដែលត្រូវខាងក្រសួងការពារជាតិដាក់ចូលបញ្ជីខ្មៅ កាលពីដើមឆ្នាំថា បានទទួលការគាំទ្រពីកងទ័ពក្រុងប៉េកាំង។
នៅក្នុងបទបញ្ជា ដែលមានសុពលភាពចាប់ពីថ្ងៃទី១១ មករាតទៅ នឹងហាមអ្នកវិនិយោគសហរដ្ឋអាមេរិក ធ្វើធុរកម្មណាមួយ ក្នុងមូលបត្ររបស់ក្រុមហ៊ុនទាំងនោះ ក្រៅពីនេះ បទបញ្ជានោះថែមទាំងហាមពលរដ្ឋអាមេរិក ទិញ-លក់ភាគហ៊ុនរបស់ក្រុមហ៊ុនចិនណាមួយ រយៈពេល ៦០ថ្ងៃ ក្រោយក្រុមហ៊ុនទាំងនោះត្រូវបានដាក់ចូលក្នុងបញ្ជីក្នុងឋានៈជាក្រុមហ៊ុនរបស់កងទ័ពចិន។
បទបញ្ជាដែលផ្សព្វផ្សាយដោយមន្ទីរសេតវិមាននោះ បានបញ្ជាក់ថា “ប្រទេសចិនកំពុងប្រើប្រាស់ប្រយោជន៍ពីប្រាក់វិនិយោគទុន របស់សហរដ្ឋអាមេរិកកាន់តែច្រើនឡើង ដើម្បីចូលទៅដល់ប្រភពទុន និងដើម្បីអាចអភិវឌ្ឍ និងធ្វើកំណែទម្រង់កងទ័ព ព័ត៌មានសម្ងាត់ និងយន្តការសន្តិសុខផ្សេងៗរបស់ពួកគេ ឱ្យមានភាពទាន់សម័យឡើង” ។
សកម្មភាពនេះ ជាការសម្រេចចិត្តខាងនយោបាយគ្រាសំខាន់ដំបូងបំផុត របស់លោកប្រធានាធិបតី ដូណាល់ ត្រាំ គិតចាប់តាំងពីលោកបរាជ័យក្នុងការបោះឆ្នោតជ្រើសតាំងប្រធានាធិបតីនៅថ្ងៃទី៣ វិច្ឆិកា ចំពោះលោក ចូ បៃដិន ដែលការណ៍នេះបង្ហាញឱ្យឃើញយ៉ាងច្បាស់ថា លោកកំពុងឆ្លៀតឱកាសក្នុងអំឡុងពេលចុងក្រោយនៃការគ្រប់គ្រងប្រទេស ដើម្បីដេញបង្ក្រាបចិន បើទោះជាមើលទៅឃើញដូចជា លោកកំពុងសង្កត់ធ្ងន់ទៅលើការជំទាស់លទ្ធផលការបោះឆ្នោតជាសំខាន់ក៏ដោយ។
លោកចូ បៃដិន ដណ្ដើមបានជ័យជម្នះក្នុងសមរភូមិបោះឆ្នោតផ្សេងៗ បានច្រើនល្មមគ្រប់គ្រាន់ក្នុងការទទួលបានពិន្ទុក្រុមបោះឆ្នោតលើសជាង ២៧០សំឡេង ដែលចាំបាច់សម្រាប់ការឈានឡើង ឆ្ពោះទៅកាន់កៅអីប្រធានាធិបតី តែយ៉ាងណាក៏ដោយ រហូតមកដល់ពេលនេះ លោកត្រាំ បេក្ខជនមកពីគណបក្សរីផាប្ល៊ីកាន់ មិនទាន់ព្រមទទួលស្គាល់លទ្ធផលការបោះឆ្នោតនៅឡើយ និងអះអាងដោយគ្មានភ័ស្តុតាងអ្វីទាំងអស់ថា មានការកេងបន្លំ។
ទាំងអស់នេះ សកម្មភាពកាលពីថ្ងៃព្រហស្បតិ៍ (ទី១២ វិច្ឆិកា)ម្សិលមិញ ថែមទាំងមើលទៅដូចជា កាន់តែទាញទម្លាក់សម្ព័ន្ធភាពដែលពោរពេញទៅដោយបញ្ហា រវាងប្រទេសសេដ្ឋកិច្ចធំៗទាំង២ របស់ពិភពលោក ឱ្យកាន់តែអាក្រក់ឡើងថែមទៀត ដោយទាំង ២ភាគី ឈ្លោះទាស់ទែងគ្នា ទាំងក្នុងរឿងដំណើរការទប់ស្កាត់ជំងឺរាតត្បាតដ៏ធំកូវីដ-១៩ របស់ចិន និងករណីដែលក្រុងប៉េកាំងប្រើច្បាប់ផ្នែកសន្តិសុខថ្មី នៅក្នុងទីក្រុងហុងកុង។
លោកបៃដិន មិនទាន់បង្ហាញសេចក្ដីលម្អិតនៃយុទ្ធសាស្ត្រពាក់ព័ន្ធជាមួយចិននៅឡើយ តែតាមរយៈសាច់រឿង ដែលបង្ហាញឡើងទាំងអស់នេះ ជឿថា លោកនឹងដំណើរការទៅមុខ ដោយប្រើវិធីការដែលតឹងរ៉ឹងជាមួយចិន ជាបន្តមិនខាន។
បទបញ្ជាពិសេសរបស់លោកត្រាំ ស៊ីចង្វាក់គ្នាជាមួយសេចក្ដីព្រាងច្បាប់មួយដែលស្នើឡើងដោយលោក ម៉ារកូ រូប៊ីអូ សមាជិកព្រឹទ្ធសភា មកពីគណបក្សរីប្ល៊ិកាន់ កាលពីខែកន្លងទៅ ដែលត្រូវការឱ្យទប់ស្កាត់បណ្ដាក្រុមហ៊ុនចិន ដែលត្រូវក្រុងវ៉ាស៊ីនតោន ដាក់ចូលក្នុងបញ្ជីខ្មៅ ពីការចូលទៅដល់ផ្សារហ៊ុនរបស់សហរដ្ឋអាមេរិក។
សេចក្ដីព្រាងច្បាប់នោះ ជាផ្នែកមួយ ក្នុងការព្យាយាមរបស់សភាកុងហ្ក្រេស និងរដ្ឋបាលសហរដ្ឋអាមេរិក ដែលត្រូវការារាំងក្រុមហ៊ុនចិនទាំងឡាយ ដែលសប្បាយរីករាយនឹងប្រាក់វិនិយោគរបស់អាមេរិក តែមិនប្រតិបត្តិតាមច្បាប់របស់សហរដ្ឋអាមេរិក។
កាលពីខែសីហា គណៈកម្មការគ្រប់គ្រងមូលបត្រ និងផ្សារហ៊ុនសហរដ្ឋអាមេរិក ជាមួយមន្ត្រីក្រសួងហិរញ្ញវត្ថុ បានទាមទារឱ្យដកចេញក្រុមហ៊ុនចិនដែលទិញ-លក់នៅក្នុងផ្សារហ៊ុនអាមេរិក បើសិនក្រុមហ៊ុនទាំងនោះមិនអាចប្រតិបត្តិតាមច្បាប់កំណត់ផ្នែកការពិនិត្យបញ្ជីរបស់សហរដ្ឋអាមេរិក ក្នុងអំឡុងខែមករា ឆ្នាំ២០២២ ទេនោះ៕
ប្រភព៖ សារព័ត៌មានរ៉យទ័រ
#អរគុណសន្តិភាព
