បរទេស ៖ ស្ថាប័នពេទ្យធំៗ នៃសហរដ្ឋអាមេរិក កាលពីថ្ងៃអង្គារ(ទី17 វិច្ឆិកា) បានចូលមកជ្រែកកណ្ដាលក្នុងជម្លោះទាស់ទែងការផ្ទេរ-ប្រគល់អំណាចនៅក្នុងមន្ទីរសេតវិមាន ក្រោយពេលបោះឆ្នោតរួច ដោយទាមទារឱ្យលោកប្រធានាធិបតី ដូណាល់ ត្រាំ ចែករំលែកទិន្នន័យកូវីដ-១៩ ជាមួយក្រុមការងាររបស់អនាគតប្រធានាធិបតី ចូ បៃដិន បើមិនដូច្នោះទេ អាចនឹងប្រថុយប្រថានក្នុងការធ្វើឱ្យការព្យាយាមចាត់ការជំងឺរាតត្បាតដ៏ធំនេះ ត្រូវយឺតយ៉ាវ និងខ្សោយកម្លាំង ដោយមិនចាំបាច់។
លិខិតចំហមួយរបស់ស្ថាប័នពេទ្យលំដាប់កំពូល ៣កន្លែងរបស់សហរដ្ឋអាមេរិក ត្រូវបានធ្វើឡើង ក្នុងខណៈដែលក្រុមការងាររបស់លោកបៃដិន កំពុងព្យាយាមរៀបចំផែនការយុទ្ធសាស្ត្រសហការលំដាប់ថ្នាក់ជាតិ ដើម្បីចាត់ការលើជំងឺរាលដាលដ៏ធំ វីរុសកូរ៉ូណាប្រភេទថ្មី ហើយអាជ្ញាធរទាំងក្នុងកម្រិតរដ្ឋ និងលំដាប់តំបន់ជាច្រើនកន្លែង កំពុងស្ទុះស្ទាព្យាយាមរិះរកវិធីទប់ស្កាត់ ការឆ្លងសាយភាយរបស់មេរោគកូវីដ-១៩ ដែលកំពុងធ្វើឱ្យមន្ទីរពេទ្យនានាទូទាំងប្រទេស ជួបប្រទះនឹងបញ្ហាអ្នកជំងឺលើសចំនួនគ្រែ។
“មានភាពចាំបាច់ ត្រូវតែចែករំលែកទិន្នន័យព័ត៌មានបែបRealtime ទាំងផ្នែកការសិក្សា ស្បៀងអាហារ ឈុតពិនិត្យមេរោគ ឧបករណ៍ការពារផ្នែកបុគ្គល(PPE) ម៉ាស៊ីនជួយដកដង្ហើម បរិមាណគ្រែក្នុងមន្ទីរពេទ្យ និងអត្រាកម្លាំងមនុស្ស ដែលត្រៀមជាស្រេច សម្រាប់ផែនការប្រចាំការ និងធនធានរបស់ប្រទេសបន្ថែម ដើម្បីការពារជីវិតមនុស្សជាច្រើនលើសគណនា” លិខិតចំហ ដែលចុះហត្ថលេខាដោយបណ្ដាមេដឹកនាំរបស់សមាគមកិច្ចការពេទ្យអាមេរិក សមាគមអ្នកព្យាបាលនៃសហរដ្ឋអាមេរិក និងសមាគមមន្ទីរពេទ្យនៃសហរដ្ឋអាមេរិក។
លិខិតចំហនេះ ត្រូវបានផ្សព្វផ្សាយចេញមក ១ថ្ងៃក្រោយពីលោកបៃដិន បេក្ខជនមកពីគណបក្សដេម៉ូក្រេត ដាស់តឿនពលរដ្ឋអាមេរិកាំងថា អាចនឹងត្រូវខាតបង់ជីវិតមនុស្សបន្ថែមទៀត បើលោកត្រាំ និងគណៈគ្រប់គ្រង នៅតែមិនព្រមសហការជាមួយក្រុមដោះដូរអំណាចរបស់លោក ក្នុងការចាត់ការវិបត្តិជំងឺរាតត្បាត រួមទាំងនៅតែរារាំង ការចូលទៅដល់ទិន្នន័យព័ត៌មានសម្ងាត់ ផ្នែកសន្តិសុខរបស់ប្រទេស ប្រធានបទខាងនយោបាយ និងផែនការចែកចាយវ៉ាក់សាំង។
លិខិតខាងលើ អាចនិយាយបានថា ជាការដាស់តឿនយ៉ាងម៉ឺងម៉ាត់បំផុតរបស់លោកចូ បៃដិន ដែលបានទទួលជ័យជម្នះក្នុងការបោះឆ្នោតជ្រើសតាំងប្រធានាធិបតីសហរដ្ឋអាមេរិក កាលពីថ្ងៃទី៣ វិច្ឆិកា តែលោក ដូណាល់ ត្រាំ ប្រធានាធិបតីបច្ចុប្បន្ន មិនព្រមទទួលស្គាល់ការបរាជ័យ និងបដិសេធក្នុងការសហការជាមួយគណៈគ្រប់គ្រងឈុតថ្មី ដើម្បីផ្ទេរ-ប្រគល់អំណាចយ៉ាងរលូន។
អត្រាអ្នកឆ្លងមេរោគថ្មី ដែលកើនឡើងក្នុងរដូវស្លឹកឈើជ្រុះនេះ បានកើតឡើង សូម្បីតែនៅតាមតំបន់ជនបទទាំងឡាយ ដែលធ្លាប់រួចផុតពីស្ថានការណ៍អាក្រក់នៃជំងឺរាតត្បាតដ៏ធំនេះកាលពីរដូវក្ដៅកន្លងមកក៏ដោយ និងមានដល់ទៅ ៤១រដ្ឋ ដែលមានរបាយការណ៍ រកឃើញអ្នកឆ្លងមេរោគថ្មីប្រចាំថ្ងៃ បានបំបែកស្ថិតិក្នុងខែវិច្ឆិកានេះ និង ២០រដ្ឋ ដែលបំបែកស្ថិតិ អ្នកស្លាប់ខ្ពស់បំផុតប្រចាំថ្ងៃ និងមានដល់ទៅ ២៦រដ្ឋ ដែលបានរាយការណ៍ថា មានចំនួនអ្នកជំងឺកូវីដ-១៩ ចូលព្យាបាលក្នុងមន្ទីរពេទ្យ ខ្ពស់បំផុត ចាប់តាំងពីមានការឆ្លងរាលដាលកើតឡើង។
អភិបាលរដ្ឋ អូហៃអូ និងម៉ារីលែនដ៍ កាលពីថ្ងៃអង្គារ(ទី១៧ វិច្ឆិកា) បានក្លាយជារដ្ឋចុងក្រោយគេ ដែលប្រកាសបិទការធ្វើចរាចរណ៍ ដើម្បីគ្រប់គ្រងការឆ្លងរាលដាលរបស់វីរុសក្នុងអំឡុងរដូវរងា ក្នុងខណៈដែលសញ្ញានៃការមានវ៉ាក់សាំងគ្រប់គ្រាន់ សម្រាប់ប្រើការក្នុងរង្វង់ធំទូលាយនោះ អាចនឹងត្រូវរង់ចាំយូរតទៅទៀតច្រើនខែ។
អាជ្ញាធរនៅក្នុងរដ្ឋជាច្រើន បានអំពាវនាវឱ្យប្រជាជន រស់នៅយ៉ាងប្រយ័ត្នប្រយែង ក្នុងអំឡុងរដូវកាលថ្ងៃឈប់សម្រាកអរគុណព្រះជាម្ចាស់ រួមទាំងផ្អាកការធ្វើដំណើរ និងរួមជួបជុំគ្នាខាងសង្គម ដែលតាមទំនៀមទម្លាប់ ច្រើនតែមានការរៀបចំពិធីជប់លៀងនៅក្នុងនៅក្នុងទីម្លប់រួមគ្នា៕
ប្រភព៖ សារព័ត៌មានបរទេស
#អរគុណសន្តិភាព
