បរទេស៖ Pfizer Ink និង BioNtech អាចបានទទួលការអនុម័ត ពីអាជ្ញាធរសហរដ្ឋអាមេរិក និងអឺរ៉ុប សម្រាប់ការប្រើប្រាស់វ៉ាក់សាំងប្រឆាំងកូវីដ-១៩ របស់ពួកគេ ក្នុងករណីអាសន្ន ក្នុងខែខាងមុខនេះ ក្រោយពីលទ្ធផលការសាកល្បងដំណាក់កាលចុងក្រោយ រកឃើញថា វាមានអត្រាទទួលបានជោគជ័យដល់ទៅ ៩៥% និងមិនបង្កផលប៉ះពាល់បន្ទាប់បន្សំឡើយ។ នេះបើតាមការបង្ហើបឱ្យដឹងរបស់ក្រុមហ៊ុនផលិតឱសថទាំង២ កាលពីថ្ងៃពុធ(ទី១៨ វិច្ឆិកា) ហើយគេរំពឹងថា ប្រហែលជាអាចនឹងផ្ទេរ-ប្រគល់បាន មុនថ្ងៃគ្រីស្តស្មាស់ទៀតផង។
លទ្ធផលការសាកល្បង បានរកឃើញថា វ៉ាក់សាំងនោះ មានប្រសិទ្ធភាពយ៉ាងប្រក្រតី (មិនប្រែប្រួល) នៅក្នុងមនុស្សគ្រប់អាយុ និងជាតិសាសន៍ ជាសញ្ញានៃក្ដីសង្ឃឹម សម្រាប់ការព្យាយាមទប់ស្កាត់ការឆ្លងរាលដាលរបស់មេរោគកំណាច ដែលហុចផលប៉ះពាល់ដល់មនុស្សម្នាខុសប្លែកពីគ្នា ដោយវាបានបង្កផលប៉ះពាល់ធ្ងន់ធ្ងរខ្លាំងជាងគេ ជាមួយមនុស្សចាស់ជរា និងក្រុមមនុស្សមួយចំនួន ក្នុងនោះរួមទាំងមនុស្សស្បែកខ្មៅផងដែរ។
លោក អ៊ូគូ សាអ៊ីន នាយកប្រតិបត្តិរបស់ បៃអូ អ៊ែន ថេក ក្រុមហ៊ុនសញ្ជាតិអាល្លឺម៉ង់ បានបង្ហើបប្រាប់ទីភ្នាក់ងារព័ត៌មានរ៉យទ័រ ថា ការិយាល័យអាហារ និងថ្នាំ នៃសហរដ្ឋអាមេរិក អាចអនុម័តឱ្យប្រើ ក្នុងករណីអាសន្ន ក្នុងអំឡុងពាក់កណ្ដាលខែធ្នូខាងមុខ ចំណែកឯនៅសហភាពអឺរ៉ុបវិញ ប្រហែលជាបានទទួលការអនុម័ត បែបមានលក្ខខណ្ឌ ក្នុងអំឡុងពាក់កណ្ដាលក្រោយ នៃខែធ្នូ។
លោកថ្លែងថា “បើវាដំណើរការទៅយ៉ាងល្អនោះ ខ្ញុំសន្និដ្ឋានថា យើងនឹងបានទទួលការអនុម័ត ក្នុងពាក់កណ្ដាលក្រោយ នៃខែធ្នូ និងចាប់ផ្ដើមផ្ទេរ-ប្រគល់ បានមុនគ្រីស្តស្មាស់ តែវានឹងកើតឡើងបាន ក៏នៅពេលដែលអ្វីគ្រប់យ៉ាង ដំណើរការទៅក្នុងមុមវិជ្ជមានដែរ”
អត្រាភាពជោគជ័យរបស់វ៉ាក់សាំង ដែលអភិវឌ្ឍដោយ ហ្វ៉ៃហ្ស៊ើរ អ៊ីងក៍ អ្នកផលិតឱសថ សញ្ជាតិអាមេរិក ជាមួយ បៃអូ អ៊ែន ថេកនេះ ខ្ពស់ជាងអ្វីដែលគណៈអ្នកគ្រប់គ្រងរបៀបរបបច្បាប់ បានកំណត់ទុកច្រើនណាស់ ហើយពួកអ្នកជំនាញការ បានប្រាប់ថា វាគឺភាពជោគជ័យគ្រាសំខាន់មួយ ក្នុងការព្យាយាមប្រញឹកដៃ ដើម្បីបញ្ឈប់ជំងឺរាតត្បាតដ៏ធំនេះ។
ការសិក្សាស្រាវជ្រាវ របស់ហ្វ៉ៃហ្ស៊ើរ ពាក់ព័ន្ធនឹងក្រុមអ្នកស្ម័គ្រចិត្ត ច្រើនជាង ៤៣ ០០០នាក់ ហើយនៅក្នុងការសាកល្បងដំណាក់កាលចុងក្រោយ គឺជាការសរុប ក្រោយរកឃើញថា មានអ្នកស្ម័គ្រចិត្តឆ្លងមេរោគកូវីដ-១៩ ទាំងអស់តែ ១៧០នាក់ប៉ុណ្ណោះ តែក្នុងនោះ មាន ១៦២នាក់ បានទទួលថ្នាំបន្លំ នោះមានន័យថា វ៉ាក់សាំងមានប្រសិទ្ធភាពខ្ពស់ដល់ ៩៥% ។ ទាំងអស់នេះ ក្នុងបណ្ដាអ្នកស្ម័គ្រចិត្ត ១០នាក់ ដែលមានអាការកូវីដ-១៩ យ៉ាងធ្ងន់ធ្ងរ មានតែ ១នាក់គត់ ដែលទទួលបានវ៉ាក់សាំងពិតប្រាកដ។
“វាជាលើកដំបូង ក្នុងប្រវត្តិសាស្ត្ររបស់មនុស្សជាតិ វាប្រើពេលវេលាមិនដល់ ១ឆ្នាំផង រាប់ចាប់ពីការរៀងលំដាប់គ្រឹះសារធាតុពូជរបស់មេរោគវីរុស រហូតដល់ការសាកល្បងខាងគ្លីនិក(ការព្យាបាល)ខ្នាតធំរបស់វ៉ាក់សាំង ខ្លាំងជាងហ្នឹងទៅទៀតនោះ វាថែមទាំងស្ថិតនៅលើមូលដ្ឋានតិចនិកថ្មីទាំងអស់ទៀតផង” លោក អេនរីកូ ប៊ុសស៊ី អ្នកជីវវិទ្យា មកពីមហាវិទ្យាល័យ ថេមភើល ក្នុងរដ្ឋហ្វ៊ីឡាដែលហ្វៀ បានថ្លែងបែបនេះ និងបន្ថែមថា “ថ្ងៃនេះ ជាថ្ងៃដ៏វិសេសបំផុត” ។
លោកសាអ៊ីន របស់ក្រុមហ៊ុន បៃអូ អ៊ែន ថេក បានប្រាប់ថា លោកនឹងដាក់ពាក្យសុំការអនុម័តប្រើប្រាស់ក្នុងករណីអាសន្ន នៅក្នុងសហរដ្ឋអាមេរិក នៅថ្ងៃសុក្រ(ទី២០ វិច្ឆិកា) ខណៈដែលប្រភពព័ត៌មានជិតស្និទ្ធនឹងស្ថានការណ៍នេះ បានបង្ហើបថា គណៈកម្មការទីប្រឹក្សារបស់ការិយាល័យអាហារ និងថ្នាំ នៃសហរដ្ឋអាមេរិក មានផែនការជួបប្រជុំគ្នា នៅថ្ងៃទី៨-១០ ខែធ្នូ ដើម្បីពិភាក្សាគ្នាពាក់ព័ន្ធនឹងវ៉ាក់សាំងនេះ តែថ្ងៃ និងពេលវេលានេះ អាចផ្លាស់ប្ដូរបាន។
លទ្ធផលវិភាគការសាកល្បងដំណាក់កាលចុងក្រោយ កើតឡើងក្រោយពីលទ្ធផលក្នុងរយៈដំបូង បានបង្ហាញឱ្យឃើញថា វ៉ាក់សាំង ១នេះ មានប្រសិទ្ធិភាពច្រើនជាង ៩០% ហើយ ម៉ូឌើណា អ៊ិងក៍ (ក្រុមហ៊ុនផលិតវ៉ាក់សាំង ១ទៀតរបស់សហរដ្ឋអាមេរិកដែរ)កាលពីថ្ងៃចន្ទ (ទី១៦ វិច្ឆិកា) បានថ្លែងថា តាមរយៈទិន្នន័យបឋម វ៉ាក់សាំងរបស់ពួកគេ មានប្រសិទ្ធផល ៩៤,៥% ។
ក្រុមហ៊ុន ហ្វ៉ៃហ្ស៊ើរ រំពឹងថា ខ្លួននឹងអាចផលិតវ៉ាក់សាំងនេះ បានខ្ពស់បំផុត ៥០លានដូសក្នុងឆ្នាំនេះ គ្រប់គ្រាន់សម្រាប់ការពារប្រជាជន ២៥លាននាក់ និងបន្ទាប់ពីនោះ នឹងលើកកម្ពស់កម្លាំងផលិតឱ្យបាន ១ ៣០០លានដូស ក្នុងឆ្នាំ២០២១ ។
ចំណែកលោក ម៉ៃក៍ រ៉ៃអាន់ អគ្គនាយកគ្រប់គ្រង ផ្នែកគ្រោងការគ្រាអាសន្ន របស់អង្គការសុខភាពពិភពលោក(WHO) បានប្រាប់ថា វានឹងប្រើពេវេលាយ៉ាងតិច ៤-៦ខែ មុននឹងកម្រិតការចែកចាយវ៉ាក់សាំងក្នុងរង្វង់ទូលំទូលាយ អាចកើតឡើងបានទូទាំងពិភពលោក៕
ប្រភព៖ ទីភ្នាក់ងារព័ត៌មានរ៉យទ័រ
#អរគុណសន្តិភាព
