អាមេរិក៖ មកដល់សប្តាហ៍នេះ មានពលរដ្ឋអាមេរិកាំងប្រមាណជា ១៤លាននាក់ហើយ ដែលបានឆ្លងមេរោគវីរុសកូវីដ-១៩ និងប្រមាណជា ២៧៥ ០០០នាក់បានស្លាប់បាត់បង់ជីវិត ខណៈដែលស្ថានភាពនៃជំងឺឆ្លងរាតត្បាតដ៏ធំនេះ ហាក់មិនទាន់ថមថយចុះនៅឡើយ។
ថ្លែងទៅកាន់អ្នកយកព័ត៌មាន របស់ទីភ្នាក់ងារព័ត៌មាន CNN អនាគតប្រធានាធិបតិអាណត្តិថ្មី លោក Joe Biden បាននិយាយថា លោកនឹងធ្វើរឿងមួយ នៅក្នុងថ្ងៃប្រកាសចូលកាន់តំណែងរបស់លោក ដើម្បីឱ្យចំនួននៃការឆ្លងជំងឺមួយនេះ អាចធ្លាក់ចុះមកវិញបានយ៉ាងមានប្រសិទ្ធភាពជាងមុន។
ក្នុងបទសម្ភាស ជាមួយអ្នកយកព័ត៌មាន Jake Tapper របស់ CNN លោក Biden បានមានប្រសាសន៍ថា៖ “នៅថ្ងៃទី១ ដែលខ្ញុំចូលកាន់តំណែង ជាប្រធានាធិបតី ខ្ញុំនឹងអំពាវនាវជាសាធារណៈ ឱ្យពលរដ្ឋអាមេរិកាំងទាំងអស់ នាំគ្នាពាក់ម៉ាស់អនាម័យការពារ ឱ្យខ្ជាប់ខ្ជួន រយៈពេល 100 ថ្ងៃពេញ»។
លោកបានបន្តទៀតថា ប្រសិនបើយើងអាចធ្វើវាបាននោះ ចំនួននៃការឆ្លងកូវីដ-១៩ នឹងធ្លាក់ចុះខ្លាំងជាមិនខាន ហើយក្នុងពេលជាមួយគ្នានោះដែរ វ៉ាក់សាំងក៏អាចចាប់ផ្តើមដំណើរការចែកចាយបានផងដែរ៕
#អរគុណសន្តិភាព
