ភ្នពេញ៖ ក្រសួងកិច្ចការនារីបានរៀបចំ កិច្ចប្រជុំប្រចាំឆ្នាំ និងកិច្ចប្រជុំពាក់ព័ន្ធនានារបស់គណៈកម្មាការអាស៊ានដើម្បីស្ត្រី តាមរយៈប្រព័ន្ធវីដេអូ ខណៈពេលដែលប្រទេសកម្ពុជាទទួលតំណែងជាប្រធានគណៈកម្មាការអាស៊ានស្ដីពីស្ត្រីចាប់ពីចុងខែធ្នូឆ្នាំ២០២០ ដល់ខែតុលា ឆ្នាំ២០២១ បន្ទាប់ពីប្រទេសប្រ៊ុយណេដារ៉ូសាឡឹម បានផុតអាណិត្តនៅក្នុងឆ្នាំ២០២០ ។
កិច្ចប្រជុំប្រចាំឆ្នាំ និងកិច្ចប្រជុំពាក់ព័ន្ធនានា នៅថ្ងៃទី១៥-១៦ ខែធ្នូ ឆ្នាំ២០២០ក្រោមប្រធានបទ “ការជម្រុញឱ្យមានស្ត្រីជាថ្នាក់ដឹកនាំ និងការចូលរួមកររបស់ស្ត្រីលើឆាកនយោបាយ” នេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោកជំទាវ ខេង សំវ៉ាដា រដ្ឋលេខាធិការប្រចាំការនៃក្រសួងកិច្ចការនារី និងជាប្រធានរបស់គណៈកម្មាការអាស៊ានដើម្បីស្ត្រី។
កិច្ចប្រជុំប្រចាំឆ្នាំ បានពិភាក្សាយ៉ាងស៊ីជម្រៅទៅលើសេចក្ដីព្រាងផែនការសកម្មភាពថ្មីរបស់គណៈកម្មាការអាស៊ានស្ដីពីស្ត្រី ឆ្នាំ ២០២១-២០២៥ ដើម្បីដាក់ជូន រដ្ឋមន្ត្រីស្ត្រីអាស៊ាន ដើម្បីពិនិត្យនិងសម្រេចនៅត្រីមាសទី១ ឆ្នាំ២០២១ ។
កិច្ចប្រជុំបានឯកភាពលើការដាក់ចេញនូវឯកសារសំខាន់ៗមួយចំនួនក្នុងការអនុវត្តនិងធានាថាយេនឌ័រត្រូវបានគិតគូរគ្រប់ជ្រុងជ្រោយក្នុងសកម្មភាពរបស់គណៈកម្មាការអាស៊ានដើម្បីស្ត្រី គណៈកម្មាធិការអាស៊ានក្នុងការលើកកម្ពស់និងការការពារសិទ្ធដល់ស្ត្រី និងកុមារ ស្ថាប័នអន្តរវិស័យអាស៊ាន ក៏ដូចជាការចូលរួមពីសង្គមស៊ីវិលមួយចំនួនដែលធ្វើការពាក់ព័ន្ធស្ត្រី និងក្មេងស្រី។
ស្របពេលក្នុងកិច្ចប្រជុំគណៈកម្មាការអាស៊ានដើម្បីស្ត្រីនេះផងដែរ វត្តមានរបស់អាស៊ានបូកបី ប្រទេសចិន ជប៉ុន និងកូរ៉េ ក៏បានចូលរួមក្នុងកិច្ចប្រជុំលើកទី១២របស់គណៈកម្មាការអាស៊ានដើម្បីស្ត្រីបូកបី តាមរយៈប្រព័ន្ធវីដេអូ ។
សិក្ខាសាលាចំនួនពីរបានរៀបចំឡើង ១) សិក្ខាសាលា ស្ដីពី ការជម្រុញឱ្យមានស្ត្រីជាថ្នាក់ដឹកនាំ និងការចូលរួមលើឆាកនយោបាយនៅក្នុងតំបន់អាស៊ាន ក្នុងគោលបំណងទទួលបានធាតុចូលលើ ភាពជោគជ័យ និងបញ្ហាប្រឈមរបស់ស្ត្រីក្នុងភាពជាអ្នកដឹកនាំ និងការចូលរួមក្នុងនយោបាយក្នុងបណ្តាប្រទេសជាសមាជិកអាស៊ាន និង ២) វេទិការពិភាក្សា ស្ដីពី សេចក្ដីកំណត់នៃការងារគ្មានប្រាក់កម្រៃ និងការងារផ្ទះ ក្នុងគោលបំណងជម្រុញអោយមានការផ្លាស់ប្តូរការយល់ដឹង និងពិភាក្សាពីសារៈសំខាន់នៃការដោះស្រាយពីបញ្ហា ការងារគ្មានប្រាក់កម្រៃ និងការងារផ្ទះ ជាការរួមចំណែកក្នុងការពង្រឹងការផ្តល់អំណាចសេដ្ឋកិច្ចដល់ស្ត្រីក្នុងតំបន់អាស៊ាន។
កិច្ចប្រជុំប្រចាំឆ្នាំ និងកិច្ចប្រជុំពាក់ព័ន្ធនានារបស់គណៈកម្មាការអាស៊ានដើម្បីស្ត្រី គឺជាវេទិកាដ៏មានសារៈសំខាន់មួយ សម្រាប់កិច្ចសន្ទនារបស់អាស៊ានដើម្បីពិនិត្យឡើងវិញនូវវឌ្ឍនភាពនៃការអនុវត្តការងារ និងកំណត់ទិសដៅបន្តដែលអាចឆ្លើយតបនឹងផែនការសកម្មភាពប្រាំឆ្នាំរបស់ខ្លួន ក៏ដូចជាអាចសម្រេចឱ្យបាននូវសមភាពយេនឌ័រ និងកិច្ចការពារសិទ្ធិស្ត្រីនៅក្នុងតំបន់អាស៊ានទាំងមូល៕
#អរគុណសន្តិភាព
