កូរ៉េខាងត្បូង៖ លោកប្រធានាធិបតី មូន ជេអ៊ីន នៃប្រទេសកូរ៉េខាងជើង កំពុងប្រឈមនឹងចរន្តរិះគន់យ៉ាងធ្ងន់ធ្ងរ កាលពីថ្ងៃម្សិលមិញ(ពុធទី២៣ធ្នូ) អំពីផែនការចាត់ចែងទិញវ៉ាក់សាំងការពារកូវីដ-១៩ របស់លោក ដែលមើលទៅហាក់ដូចជាយឺតយ៉ាវជ្រុលពេក ខណៈដែលចំនួនអ្នកឆ្លងមេរោគប្រចាំថ្ងៃចុងក្រោយបំផុត បានហក់ឡើងជិតបំបែកស្ថិតិថ្មី។
ក្រុមសារព័ត៌មាន នៃដែនដីស្ពៃជ្រក់គីមឈី បាននាំគ្នាបន្ទោសផែនការចាត់រៀបចំ រកវ៉ាក់សាំងរបស់រដ្ឋាភិបាលលោកមូន ថា សែនរយីករយាក និងពឹងតែលើវ៉ាក់សាំងដែលផលិតនៅក្នុងប្រទេសខ្លាំងពេក ខណៈដែលការបញ្ជាទិញវ៉ាក់សាំងនាំចូលមកពីបរទេស មើលទៅហាក់ដូចជាឆាប់រហ័ស និងទាន់សភាពការណ៍ជាង។
លទ្ធផលការធ្វើប្រជាមតិ ដោយស្ថាប័ន Realmeter បានរកឃើញថា ប្រជាជនកូរ៉េខាងត្បូងចំនួន ៦នាក់ក្នុងចំណោម ១០នាក់ ជឿថា ពេលនិយាយពីវ៉ាក់សាំងកូវីដ-១៩ “ភាពប្រញាប់ប្រញាល់” គឺជារឿងដែលត្រូវគិតគូរ ខ្លាំងជាង “សុវត្ថិភាព” ហើយរដ្ឋបាល គួរតែចាប់ផ្ដើមចាក់ចែកចាយវ៉ាក់សាំងឱ្យបានលឿនបំផុត ដើម្បីបន្ថយចំនួនអ្នកឆ្លងមេរោគថ្មី ដែលកំពុងតែកើនឡើងយ៉ាងឆាប់រហ័ស។
ទីភ្នាក់ងារគ្រប់គ្រង និងការពាររោគនៃប្រទេសកូរ៉េខាងត្បូង ឬ KDCA បានរាយការណ៍ពីចំនួនអ្នកជំងឺថ្មី ១ ០៩២នាក់ ក្នុងជុំ ២៤ម៉ោងកន្លងមកនេះ ដែលចំនួននេះ ជាលំដាប់លេខ២ បន្ទាប់ពីស្ថិតិខ្ពស់បំផុត ១ ០៩៧នាក់ កាលពីថ្ងៃអាទិត្យ(ទី២០)កន្លងមក និងធ្វើឱ្យចំនួនអ្នកជំងឺសរុបនៅក្នុងប្រទេសមួយនេះ កើនឡើងចំនួន ៥២ ៥៥០នាក់ និងស្លាប់ ៧៣៩នាក់។
ទីស្ដីការប្រធានាធិបតីកូរ៉េខាងត្បូង បានចេញមកថ្លែងការណ៍ កាលពីព្រលប់ថ្ងៃទី២២ ធ្នូ ថា គ្រោងការចាក់វ៉ាក់សាំង “នឹងចាប់ផ្ដើមឡើងក្នុងពេលឆាប់ៗនេះ” ផ្ទុយនឹងកាលពីពេលមុននេះ ដែលរដ្ឋបាលលោកមូន ធ្លាប់បានបញ្ជាក់ថា នឹងចាប់ផ្ដើមចែកចាយវ៉ាក់សាំងការពារកូវីដ-១៩ នៅក្នុងអំឡុងខែកុម្ភៈ ឆ្នាំមុខ។
អង្គភាពសុខភាពសាធារណៈកូរ៉េខាងត្បូង បានសម្ដែងក្ដីកង្វល់ ចំពោះអ្វីដែលប្រជាជនភាគច្រើនមើលឃើញរឿងវ៉ាក់សាំងថា ជាការប្រកួតប្រជែងលំដាប់ពិភពលោក និងបានបញ្ជាក់ឱ្យសង្គមបានដឹងអំពីភាពចាំបាច់ក្នុងការត្រូវធានាពីសុវត្ថិភាពរបស់វ៉ាក់សាំងជាមុនសិន។
លោក សន យ៉ាំងរែ មន្ត្រីជើងចាស់នៃក្រសួងសុខាភិបាលកូរ៉េខាងត្បូង បានថ្លែងប្រាប់បណ្ដាញសារព័ត៌មានថា សហរដ្ឋអាមេរិក និងចក្រភពអង់គ្លេស មានចំនួនអ្នកឆ្លងមេរោគ និងអ្នកស្លាប់ ច្រើនជាងកូរ៉េខាងត្បូងខ្លាំងណាស់ និងគ្មានវិធានការគ្រប់គ្រងជំងឺណាផ្សេង ដែលទទួលបានលទ្ធផលល្អ ក្រៅពីការចាក់វ៉ាក់សាំងនោះទេ។
លោកថ្លែងថា “យើងគួរតែសម្លឹងមើលប្រទេសទាំងនោះជាគំរូ និងពិចារណាពីកម្មវិធីពិនិត្យមើលសុវត្ថិភាពរបស់វ៉ាក់សាំង…យើងជឿថា នៅមិនទាន់មានហេតុផល សមគួរណាមួយ ដែលកូរ៉េខាងត្បូង នឹងត្រូវក្លាយជាប្រទេសដំបូងគេ ឬជាប្រទេសទី២ ក្នុងពិភពលោក ដែលបានទទួលវ៉ាក់សាំងនោះទេ”
ខណៈពេលជាមួយគ្នា ប្រភពព័ត៌មាន បានបញ្ជាក់ថា ចំណែកវ៉ាក់សាំងកូវីដ-១៩ ឈុតដំបូង ដែលសហរដ្ឋអាមេរិក បានរៀបចំបញ្ជូនមកឱ្យកងយោធា និងបុគ្គលិករបស់ខ្លួន នៅក្នុងប្រទេសកូរ៉េខាងត្បូង ប្រមាណជា ២៨ ៥០០នាក់នោះ នឹងធ្វើដំណើរមកដល់ យ៉ាងលឿនបំផុត នៅថ្ងៃព្រហស្បតិ៍(ទី២៤)នេះ។
កងកម្លាំងសហរដ្ឋអាមេរិក នៅក្នុងប្រទេសកូរ៉េខាងត្បូង ឬ USFK បានប្រកាសថា ក្រុមមន្ត្រីខាងកិច្ចការពេទ្យ និងអ្នកប្រតិបត្តិការបន្ទាន់ជួរមុខ នឹងក្លាយជាក្រុមដំបូងគេដែលបានទទួលវ៉ាក់សាំង។
ស្ថានការណ៍ដែលត្រឡប់មកអាក្រក់ឡើងវិញ កំពុងក្លាយជាវិបត្តិថ្មី ១ទៀត សម្រាប់ប្រទេសកូរ៉េខាងត្បូង ដែលធ្លាប់បានប្រើវិធានការត្រួតពិនិត្យចម្រាញ់ និងតាមដានស៊ើបអង្កេត ប្រភពមេរោគជាប្រព័ន្ធ រហូតអាចចៀសបានពីការបិទប្រទេស និងគ្រប់គ្រងចំនួនអ្នកឆ្លងមេរោគថ្មី ឱ្យស្ថិតក្នុងកម្រិតទាបជាង ៥០នាក់ បានរហូតមកពេញមួយរដូវក្ដៅកន្លងមក។
លោកនាយករដ្ឋមន្ត្រី ឈុង សេ គយុន បានបញ្ជាក់កាលពីថ្ងៃទី២៣ ម្សិលមិញថា រដ្ឋាភិបាលអាចរៀបចំរកគ្រែអ្នកជំងឺបានទៀតហើយ ចំនួន ៨ ០០០ ពីតម្រូវការទាំងអស់ ១០ ០០០គ្រែ ដែលនឹងនាំយកមកបន្ថែមសម្រាប់អ្នកជំងឺកូវីដ-១៩ ដោយបានទទួលការគាំទ្រពីមន្ទីពេទ្យឯកជន។
ទីក្រុងសេអ៊ូល និងទីក្រុងផ្សេងទៀតដែលនៅជុំវិញ បានចេញបញ្ជា ហាមការជួបជុំគ្នាលើសពី ៤នាក់ ចាប់តាំងពីថ្ងៃទី២៣ ធ្នូ រហូតដល់ថ្ងៃទី៣ ខែមករា ឆ្នាំថ្មី ជាពិសេស ចំពោះភោជនីយដ្ឋាន ឬអតិថិជនណា ដែលលើ្មសវិធានការនេះ នឹងត្រូវរងការពិន័យជាប្រាក់ខ្ពស់បំផុតដល់ទៅ ៣លានវ៉ុន(ប្រមាណជា ២ ៥០០ដុល្លារអាមេរិក)។
ហើយរដ្ឋបាល ថែមទាំងបានបញ្ជាឱ្យបិទមណ្ឌលកម្សាន្ត ស្គីរីសត និងបណ្ដាមណ្ឌលទេសចរណ៍ល្បីៗជាច្រើនទៀត ក្នុងអំឡុងរដូវរងា ដើម្បីទប់ស្កាត់ការឆ្លងរាលដាលរបស់កូវីដ-១៩ ក្នុងរដូវកាលបុណ្យគ្រិស្តស្មាស់ និងចូលឆ្នាំសកលថ្មីនេះ៕
ប្រភព៖ ទីភ្នាក់ងារព័ត៌មានរ៉យទ័រ
ប្រែ និងសម្រួលដោយ តាវ៉ែនតា
#អរគុណសន្តិភាព
