ពិភពលោក៖ ទ្វីបអង់តាក់ទិក បានរកឃើញអ្នកឆ្លងមេរោគកូវីដ-១៩ ក្រុមដំបូងគេហើយ ក្រោយពីមន្ត្រីចំនួន ៣៦នាក់ នៅក្នុងមូលដ្ឋានស្រាវជ្រាវមួយ មានលទ្ធផលពិនិត្យមេរោគ “វិជ្ជមាន” តាមរយៈសេចក្ដីថ្លែងការណ៍ ដែលផ្សព្វផ្សាយដោយកងទ័ពរបស់ប្រទេសស៊ីលី ធ្វើឱ្យក្នុងពេលបច្ចុប្បន្ននេះ មេរោគវីរុសកូរ៉ូណាប្រភេទថ្មី ដ៏កាចសាហាវមួយនេះ បានឆ្លងរាលដាល គ្រប់ទូទាំងទ្វីបទាំងអស់នៅលើពិភពលោកមួយនេះ រួចរាល់ហើយ។
ការរកឃើញអ្នកឆ្លងមេរោគ ១ក្រុមថ្មីនេះ បានក្លាយជាជ័យជម្នះ ដ៏គួរឱ្យសោកសៅបំផុតមួយ របស់មនុស្សជាតិ ក្នុងការប្រយុទ្ធប្រឆាំងនឹងមេរោគវីរុសកូរ៉ូណាប្រភេទថ្មី ដោយសារតែកាលពីពេលកន្លងមក ទ្វីបអង់តាក់ទិក គឺជាទ្វីបមួយ ដែលរួចផុតពីក្រញ៉ាំដៃរបស់វីរុសមរណៈនេះ។
កាលពីថ្ងៃទី២០ ខែធ្នូ មូលដ្ឋានទ័ពលោកឧត្ដមសេនីយ Bernardo O’Higgins Rigelme ជាមូលដ្ឋានស្រាវជ្រាវរបស់ប្រទេសស៊ីលី ដែលស្ថិតនៅក្នុងបរិវេណឈូងសមុទ្រ ទ្រីនីធី បានអះអាងថា បុគ្គលិកខាងយោធា ចំនួន ២៦នាក់ ជាមួយនឹងពលរដ្ឋ ១០នាក់ ដែលប្រតិបត្តិភារកិច្ច ក្នុងឋានៈជាបុគ្គលិកជាប់កិច្ចសន្យា នៅក្នុងមូលដ្ឋាននោះ មានលទ្ធផលពិនិត្យកូវីដ-១៩ “វិជ្ជមាន។
ការឆ្លងរាលដាលលើកនេះ បានកើតឡើងក្រោយពីបុគ្គលិក ៣នាក់នៅលើនាវារបស់កងទ័ព ១គ្រឿង មានលទ្ធផលការពិនិត្យរកមេរោគកូវីដ-១៩ ចេញមកវិជ្ជមាន ដោយនាវា ១គ្រឿងនេះ បានបំពេញតួនាទីក្នុងការផ្ដល់ការអន្តរាគមន៍ផ្នែក ឡូជីស្ទិក ឱ្យទៅមូលដ្ឋានស្រាវជ្រាវ អូហ៊ិកហ្គិនស៍ ក្នុងអំឡុងពីថ្ងៃទី២៧ វិច្ឆិកា ដល់ថ្ងៃទី១០ ធ្នូ។
បណ្ដាកងនាវិក ២០៨នាក់ បានចូលទទួលការពិនិត្យរកមេរោគវីរុសកូរ៉ូណាប្រភេទថ្មី កាលពីថ្ងៃពុធ(ទី១៦ធ្នូ)កន្លងទៅ និងបានរកឃើញអ្នកឆ្លងមេរោគ ៣នាក់ តែយ៉ាងណាក៏ដោយ ទាំងអស់គ្នា បានធ្វើការបង្ខាំងខ្លួនឯងឱ្យនៅដោយឡែក ដើម្បីធ្វើចត្តាឡីស័ក ដែលជាផ្នែកមួយក្នុងវិធានការការពារទុកជាមុន។
សេចក្ដីថ្លែងការណ៍របស់កងទ័ពស៊ីលី បានបញ្ជាក់ថា បណ្ដាបុគ្គលិកនៅឯមូលដ្ឋានស្រាវជ្រាវ អូហ៊ិកហ្គីនស៍នេះ បានស្ថិតក្នុងការដាក់ឱ្យនៅដោយឡែក និងតាមសង្កេតមើលអាការជាបន្តបន្ទាប់ ក្រោមការគាំទ្រពីទីភ្នាក់ងារសុខភាពសាធារណៈ នៃមណ្ឌល ម៉ាកាយ៉ានេស និង ឡាអាន់តា ទីកាហ្ស៊ីលេណា ដែលរហូតមកដល់ពេលនេះ លទ្ធផលនៃការពិនិត្យរកមេរោគ ចេញមក ហាក់ដូចជាល្អប្រសើរ ដោយខាងកងទ័ព បានបញ្ជាក់ទៀតថា “មិនមានអាការជ្រៀតជ្រែកនៃជំងឺណាផ្សេង រួមជាមួយកូវីដ-១៩ នៅក្នុងក្រុមបុគ្គលិករបស់យើងឡើយ”៕
ប្រភព៖ ទីភ្នាក់ងារព័ត៌មាន CNN
ប្រែ និងសម្រួលដោយ តាវ៉ែនតា
#អរគុណសន្តិភាព
