ទស្សនារូបភាព៖ CNN រាយការណ៍ ពីលទ្ធផលបាតុកម្មលោកត្រាំ សម្រុកចូល “រដ្ឋសភាជាតិ” ដើម្បីរារាំងសភាកុងហ្គ្រេស រ៉ាប់រង “លោកបៃដិន” ឈ្នះការបោះឆ្នោត បង្កឱ្យស្លាប់មនុស្ស ៤នាក់

សហរដ្ឋអាមេរិក៖ ដឹ ឃែភីថល ហ៊ីលល៍ ឬសភាកុងហ្គ្រេសសហរដ្ឋអាមេរិក បានវិលត្រឡប់មករកសភាពប្រក្រតីឡើងវិញជាថ្មី ក្រោយពីត្រូវបាតុកម្មរបស់លោកត្រាំ សម្រុកចូលទៅដល់ខាងក្នុង។ មានរូបភាព បាតុករចូលទៅអង្គុយនៅក្នុងការិយាល័យធ្វើការ របស់លោកស្រី នែនស៊ី ប៉េឡូស៊ី ប្រធានសភាតំណាងរាស្ត្រសហរដ្ឋអាមេរិក និងព័ត៌មានចុងក្រោយ មានមនុស្សស្លាប់ ៤នាក់។ FBI អះអាង រកឃើញគ្រាប់បែក នៅជិតទីស្នាក់ការបក្សរីផាប្ល៊ីកាន់។

CNN ទីភ្នាក់ងារព័ត៌មានសហរដ្ឋអាមេរិក បានរាយការណ៍កាលពីថ្ងៃព្រហស្បតិ៍ ទី៧ មករា ម្សិលមិញថា តាមរយៈការដែលមេដឹកនាំសហរដ្ឋអាមេរិក លោក ដូណាល់ ត្រាំ ចេញមកអំពាវនាវឱ្យអ្នកគាំទ្ររបស់លោក ដែលហៅថា MAGA ចេញមកប្រមូលផ្ដុំគ្នាតវ៉ា គឺដើម្បីរារាំងការរាប់ពិន្ទុអង្គបោះឆ្នោតនៅក្នុងរដ្ឋសភាសហរដ្ឋអាមេរិក ដើម្បីអះអាងពីជ័យជម្នះរបស់អនាគតប្រធានាធិបតីសហរដ្ឋអាមេរិកថ្មី មកពីគណបក្សដេម៉ូក្រេត លោក ចូ បៃដិន។

ហើយមិនយូរប៉ុន្មាន ពីវេលាម៉ោង ១៣.០០នាទី ម៉ោងនៅភាគខាងកើតនៃសហរដ្ឋអាមេរិក ក្រុមបាតុករជាច្រើនរយនាក់ បានប្រើកម្លាំងរុញច្រានផ្ទាំងរបារការពារ ដែលមានអាជ្ញាធរបង្ក្រាបចលាចលប្រដាប់ដោយអាវុធ នៅប្រចាំការ និង ៩០នាទីបន្ទាប់ពីនោះ អាជ្ញាធរបានឱ្យដឹងថា ក្រុមបាតុករ បានចូលទៅដល់ផ្នែកខាងក្នុង នៃអគារសភាកុងហ្គ្រេសបានសម្រេច តែទ្វារបន្ទប់ប្រជុំសភាតំណាងរាស្ត្រសហរដ្ឋអាមេរិក និងព្រឹទ្ធសភា ត្រូវបានបិទយ៉ាងជិត។

មិនប៉ុន្មាននាទីក្រោយមក មានការបញ្ជាឱ្យជម្លៀសមនុស្សដែលនៅខាងក្នុងបន្ទប់ប្រជុំសភាតំណាង

រាស្ត្រសហរដ្ឋអាមេរិក ដោយប៉ូលិសបានរកឃើញថា លោកអនុប្រធានាធិបតីសហរដ្ឋអាមេរិក ម៉ៃក៍ ផេនស៍ ត្រូវបានកងការពារ នាំខ្លួនចេញបន្ទប់ប្រជុំសភា ទៅយ៉ាងបន្ទាន់បំផុត ដោយសារតែលោកផេនស៍ ក៏កំពុងស្ថិតនៅក្នុងការរាប់ពិន្ធុអង្គបោះឆ្នោត នៅពេលនោះដែរ។

CNN បានរាយការណ៍បន្តថា វេលាម៉ោងប្រមាណ ១៥.០០នាទី នៅឯមាត់ទ្វារបន្ទប់ប្រជុំសភាជាន់ទាបសហរដ្ឋអាមេរិក ត្រូវបានគេដឹងថា មានអាជ្ញាធរប្រដាប់ដោយអាវុធ នៅខាងក្នុង បានដកកាំភ្លើងត្រៀមរួចជាស្រេច ក្នុងការបាញ់ពួកអ្នកដែលសម្រុកចូលទៅ។

មានរបាយការណ៍ថា មានស្ត្រីម្នាក់ត្រូវបានបាញ់ចំដើមទ្រូង នៅក្នុងទីតាំងរដ្ឋសភា។ ប៉ូលិស DC បានអះអាងអំពីរឿងនេះប្រាប់ CNN តែសេចក្ដីលម្អិត មិនទាន់ត្រូវបង្ហើបឱ្យដឹងនៅឡើយ ចំណែកប្រធានក្រុមប៉ូលិស DC លោក Robert Contee បានថ្លែងថា នៅមានអ្នកស្លាប់ ៣នាក់ផ្សេងទៀត។

“ស្ត្រី ១នាក់ និងបុរស ៣នាក់ទៀត បានរងរបួសធ្ងន់ និងបានស្លាប់នៅពេលក្រោយមក។ ការស្លាប់បាត់បង់ជីវិតណាមួយនៅក្នុងតំបន់ DC នេះ គឺជារឿងដែលគួរឱ្យភ័យរន្ធត់ខ្លាំងណាស់ ហើយខាងយើង សូមផ្ញើទឹកចិត្តជូនទៅមនុស្សគ្រប់រូប ដែលរងផលប៉ះពាល់ពីការស្លាប់លើកនេះ” លោកContee បានថ្លែងនៅក្នុងការថ្លែងព័ត៌មានកាលពីយប់ថ្ងៃពុធ(ទី៦មករា)។

ប្រភពព័ត៌មាន បានបង្ហើបឱ្យដឹងថា មានមន្ត្រីសហរដ្ឋអាមេរិកជាច្រើននាក់បានរងរបួស និងមានយ៉ាងតិច ១នាក់ ត្រូវបាននាំទៅមន្ទីពេទ្យ។ គេបានដឹងថា ប៉ូលិសបានប្រើប្រាស់គ្រាប់បែកផ្សែង នៅក្នុងបន្ទប់ព្រឹទ្ធសភា ដើម្បីព្យាយាមបណ្ដេញក្រុមបាតុករចេញទៅក្រៅវិញ និងអាចចូលទៅសម្អាតទីតាំង ក្នុងផ្នែកសភាជាន់ខ្ពស់សហរដ្ឋអាមេរិក បានសម្រេចនៅវេលាម៉ោង ១៥.៣០នាទី។

អគារសភាកុងហ្គ្រេសសហរដ្ឋអាមេរិក បានត្រឡប់មកស្ថិតក្រោមការគ្រប់គ្រងរបស់អាជ្ញាធរវិញ នៅវេលាម៉ោង ១៧.៤០នាទី ដោយហេតុការណ៍បង្កចលាចលសម្រុកចូលទៅដល់ខាងក្នុងនៃអគាររដ្ឋសភាកុងហ្គ្រេស កាលពីថ្ងៃទី៦ មករានោះ គឺជាលើកដំបូងហើយ ក្នុងប្រវត្តិសាស្ត្រ ចាប់តាំងពីខែសីហា ឆ្នាំ១៨១៤ ដែលអង់គ្លេសបានបញ្ជូនកងកម្លាំងចូលវាយប្រហារ និងដុតបំផ្លាញ ក្នុងសង្គ្រាមនៃឆ្នាំ១៨១២។

CNN បានរាយការណ៍ទៀតថា កម្លាំងប៉ូលិស ដែលចូលគ្រប់គ្រងការចលាចលបាតុកម្មលោកត្រាំសម្រុកចូលអគាររដ្ឋសភាកុងហ្គ្រេសនេះ មានចំនួនតិចជាង ការបង្កចលាចលរបស់ក្រុម ប្ល៊ែក ឡាយហ្វ៍ មែតធើរស៍ ដែលចេញមកតវ៉ាទាមទារ ក្រោយការស្លាប់របស់ចច ហ្វ្លយទៅទៀត។

ចំណែក ABC News បានរាយការណ៍ថា មានរូបភាពស្រដៀងគ្រាប់បែក ចំនួន ២គ្រាប់ ត្រូវបានរកឃើញនៅជិតទីស្នាក់ការគណបក្សរីផាប្ល៊ីកាន់ RNC នៅឯផ្លូវ First Street, S.E ក្នុងទីក្រុងវ៉ាស៊ីនតោន ឌីស៊ី ដោយរូបភាពបានបង្ហាញឱ្យឃើញពីខ្សែភ្លើងភ្ជាប់ជាមួយនាឡិកា និងមិនយូរប៉ុន្មាន បន្ទាប់ពីនោះ អាជ្ញាធរ បានបញ្ជូនកម្លាំងចូលទៅពិនិត្យទីតាំងក្បែរទីស្នាក់ការគណបក្សដេម៉ូក្រេត DNC ដែលស្ថិតនៅឆ្ងាយទៅទៀតប្រហែលជា ៣-៤អគារ និងបានរកឃើញគ្រាប់បែកទី២ បង្កប់នៅក្រោមគុម្ពផ្កា។

ទាំងអស់នេះ ដោយសារតែទីស្នាក់ការគណបក្សរីផាប្ល៊ីកាន់ RNC និងរបស់គណបក្សដេម៉ូក្រេត DNC ស្ថិតនៅមិនឆ្ងាយប៉ុន្មាន ពីអគារសភាកុងហ្គ្រេសសហរដ្ឋអាមេរិកហ្នឹងឯង។

FBI បានរាយការណ៍ អះអាងពីការរកឃើញគ្រាប់បែក ២គ្រាប់នេះថា “គ្រាប់បែកសង្ស័យទាំង ២គ្រាប់នោះ ត្រូវបានដោះចេញដោយសុវត្ថិភាព ដោយមន្ត្រីរបស់ FBI និងអាជ្ញាធរមានសមត្ថកិច្ចដែលបានរួមសហការគ្នា”៕