ជប៉ុន៖ ការប្រកាសសភាវអាសន្នរបស់រដ្ឋបាលជប៉ុន គឺសង្កត់ធ្ងន់ទៅលើការកាត់បន្ថយពេលវេលាបម្រើសេវាកម្ម របស់ភោជនីយដ្ឋាន និងហាងស៊ីផឹកផ្សេងៗ ដោយអនុញ្ញាតឱ្យលក់ដូរភេសជ្ជៈស្រវឹង បានត្រឹមម៉ោង ១៩.០០ ឬម៉ោង ៧យប់ និងបិទហាងនៅម៉ោង ២០.០០ ឬម៉ោង ៨យប់ប៉ុណ្ណោះ ព្រោះក្រុមអ្នកជំនាញការ បានរៀបចំធ្វើវិធានការនេះឡើង ដោយអះអាងពីរបាយការណ៍ ដែលបានផ្សព្វផ្សាយដោយគណៈអ្នកវិទ្យាសាស្ត្រ របស់មហាវិទ្យាល័យ ស្ទែនហ្វ៉ដ និងផ្សេងៗទៀត នៅក្នុងព្រឹត្តិបត្រ Nature កាលពីខែវិច្ឆិកា ឆ្នាំ២០២។
អ្នកជំនាញការប្រឆាំងវីរុសកូរ៉ូណាប្រភេទថ្មី របស់រដ្ឋបាលជប៉ុន បានរួបរួមសំណូមពរក្នុងករណីអាសន្នកាលពីអំឡុងដើមខែមករា ដោយបានបញ្ជាក់អំពីភាពចាំបាច់ ដែលនឹងត្រូវកាត់បន្ថយភាពប្រឈមរបស់ការឆ្លងមេរោគនៅតាមភោជនីយដ្ឋាន និងរង្គសាល។
ក្រុមអ្នកវិទ្យាសាស្ត្រ បានរកឃើញថា ទីកន្លែងដែលមានភាពប្រឈមខ្ពស់បំផុតគឺ ភោជនីយដ្ឋាន បន្ទាប់មកគឺកន្លែងហាត់ប្រាណ ហាងកាហ្វេ និងសណ្ឋាគារ។
ភោជនីយដ្ឋាន មានភាពប្រឈមខ្ពស់ ព្រោះជាទីកន្លែងដែលទទួលអតិថិជនក្នុងចំនួនដ៏ច្រើន និងស្ថិតនៅក្នុងហាងរយៈពេលយូរ។ អ្នកជំនាញការបានណែនាំ វិធីដែលភោជនីយដ្ឋានអាចការពារការចម្លងរាលដាលរបស់មេរោគវីរុសបាន ដោយបញ្ជាក់ថា បើភោជនីយដ្ឋាន អាចកំណត់ចំនួនអតិថិជន ដែលចូលមកប្រើសេវាកម្ម ឱ្យស្ថិតក្នុងចំនួន ២០%នៃកន្លែងអង្គុយទាំងអស់បាន នោះភោជនីយដ្ឋាន នឹងអាចកាត់បន្ថយការចម្លងមេរោគបាន ៨០%។
ការកំណត់ចំនួនរបស់មនុស្សម្នានៅក្នុងភោជនីយដ្ឋាន ទទួលបានលទ្ធផលច្រើនជាងការការពារដោយវិធីផ្សេងៗ ប៉ុន្តែ ដោយសារតែការអនុញ្ញាតឱ្យមានអតិថិជនត្រឹមតែ ២០%នេះ ធ្វើឱ្យភោជនីយដ្ឋាន មិនអាចគ្រប់គ្រងដើមទុន និងចំណូល-ចំណាយខាងធុរកិច្ចបានទេ ដូច្នេះហើយ ទើបរដ្ឋបាលត្រូវតែប្រើវិធីកាត់បន្ថយពេលវេលាបម្រើសេវាកម្ម របស់ភោជនីយដ្ឋានជំនួសវិញហ្នឹងឯង។
ក្រុមអ្នកជំនាញការ ថែមទាំងបញ្ជាក់ទៀតថា បើមានការផឹកគ្រឿងស្រវឹង និងមានមនុស្សចាប់ពី ៥នាក់ឡើងទៅ អង្គុយញ៉ាំអាហាររួមគ្នាផងនោះ ក៏នឹងរឹតតែបង្កើនភាពប្រឈមខ្លាំងឡើង ព្រោះមនុស្សម្នានឹងមានអារម្មណ៍ហ៊ឹកហ៊ាក់ រីករាយ និងជជែកគ្នាឮខ្លាំងៗ ធ្វើឱ្យមេរោគកាន់តែសាយភាយបានច្រើនឡើងដូចគ្នា៕
ប្រភព៖ សារព័ត៌មានបរទេស
ប្រែ និងសម្រួលដោយ តាវ៉ែនតា
#អរគុណសន្តិភាព
