តំណាង WHO ប្រចាំកម្ពុជា៖ ការរាតត្បាតនៃជំងឺកូវីដ-១៩ អាចធ្លាក់ក្នុងស្ថានភាពធ្ងន់ធ្ងរជាងនេះ បើសិនជាបងប្អូនពលរដ្ឋ ភ្លេចខ្លួន

ភ្នំពេញ៖ លោកស្រី លី អាយឡាន តំណាងអង្គការសុខភាពពិភពលោក ប្រចាំកម្ពុជា បានថ្លែងថា ស្ថានភាពនៃការរាតត្បាតនៃជំងឺកូវីដ១៩ វានឹងអាចមានសភាពធ្ងន់ធ្ងរជាងអ្វីដែលយើងឃើញនាពេលបច្ចុប្បន្ននេះ ប្រសិនបើប្រជាពលរដ្ឋកម្ពុជាឆាប់ភ្លេចខ្លួន ថាមិនអីទេ ហើយបន្ធូរបន្ថយនូវវិធានការពារ នោះវានឹងក្លាយជាគ្រោះថ្នាក់មួយជាក់ជាមិនខាន។ នេះបើយោងតាមការចេញផ្សាយរបស់ Fresh News នៅព្រឹកថ្ងៃទី១១ ខែមិថុនា ។

លោកស្រី លី អាយឡាន បានថ្លែងបន្ដថា «ការបន្ធូរបន្ថយនូវវិធានការពារកូវីដ១៩ នឹងធ្វើឱ្យមានកំណើនកើនឡើងនៃការជួបជុំគ្នា ហើយការជួបជុំគ្នានេះហើយ ដែលជំរុញឱ្យមានឆ្លងកាន់តែច្រើនឡើង ហើយបច្ចុប្បន្ននេះ មិនមែនជាពេលវេលាដែលយើងត្រូវបន្ថូរបន្ថយវិធានការពារកូវីដ១៩នោះទេ គឺជាពេលវេលាមួយដែលត្រូវខិតខំបន្ថែមទៀត ដើម្បីការពាររៀងៗខ្លួន ដើម្បីយើងបានចៀសផុត និងបញ្ចប់ការរាតត្បាតនៃជំងឺកូវីដ១៩នេះ។ ខ្ញុំសង្ឃឹមថា យើងនឹងអាចឆ្លងកាត់ដំណាក់កាលដ៏លំបាកនេះទាំងអស់គ្នា»។

លោកស្រី លី អាយឡាន ក៏បានថ្លែងអំពាវនាវពលរដ្ឋកម្ពុជា បន្ដអនុវត្ដនូវវិធានការពារកូវីដ១៩ឱ្យបានគ្រប់ៗគ្នា ព្រោះការរួមចំណែកនេះ នឹងអាចធ្វើឱ្យយើងដើរចេញបានពីប្រអប់នៃការចម្លងវីរុសកូវីដ១៩ ជាពិសេសការចាក់វ៉ាក់សាំងកូវីដ១៩ គឺអាចជួយទៅដល់អាយុជីវិតរបស់ប្រជាពលរដ្ឋ។ ប៉ុន្ដែការប្រើប្រាស់វ៉ាក់សាំងតែមួយមុខ មិនមែនជាជម្រើសក្នុងការទប់ស្កាត់បាននូវការឆ្លងជំងឺកូវីដ១៩នោះទេ អ្វីដែលសំខាន់ គឺយើងត្រូវរួមគ្នាអនុវត្ដឱ្យបានខ្ជាប់ខ្ជួន ៣ការពារ ៣កុំ បូកទាំងការចាក់វ៉ាក់សាំងការពារកូវីដ១៩ និងវិធានការផ្សេងៗទៀតដែលរាជរដ្ឋាភិបាល និងក្រសួងសុខាភិបាល បានដាក់ចេញ។

ពាក់ព័ន្ធនឹងការចាក់វ៉ាក់សាំងការពារជំងឺកូវីដ១៩នេះ លោកស្រី លី អាយឡាន ក៏បានគូសបញ្ជក់ថា «ពលរដ្ឋកម្ពុជា មានភ័ព្វសំណាងណាស់ ដែលទទួលបានការចាក់វ៉ាក់សាំង ដោយមិនគិតថ្លៃទន្ទឹមនឹងនោះក៏មាន មានជនបរទេសផងដែរ។ ហើយខ្ញុំពិតជាសប្បាយចិត្ដ ដែលឃើញមនុស្សវ័យចំណាស់ និងជនដែលមានពិការភាព បានទទួលការវ៉ាក់សាំងការពារជំងឺកូវីដ១៩ ជាពិសេសផ្ដល់អាទិភាពមុនគេ ដោយការយកចិត្ដទុកដាក់»៕

#អរគុណសន្តិភាព