នាយឧត្តមសេនីយ៍ វង្ស ពិសេន បានថ្លែងថា ក្រោមម្លប់សន្តិភាពដែលកើតចេញពីនយោបាយ ឈ្នះ ឈ្នះ របស់សម្តេចតេជោ ហ៊ុន សែន វិស័យព្រះពុទ្ធសាសនាត្រូវបានយកចិត្តទុកដាក់ និងលើកកម្ពស់ជានិច្ច ពីព្រោះព្រះពុទ្ធសាសនា គឺជាឃ្លាំងផ្តល់នូវពុទ្ធិ ថែរក្សាគម្ពីរអក្សរសាស្រ្ត វប្បធម៌ អរិយធម៌ ប្រពៃណី និងថែរក្សាព្រលឹងជាតិ។
ការលើកឡើងរបស់ នាយឧត្ដមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ ប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង បែបនេះ ខណៈអញ្ជើញជាអធិបតីភាពក្នុងពិធីបុណ្យឆ្លងឧបដ្ឋានសាលា និងសមិទ្ធផលនានានៅវត្តត្រគៀត ស្ថិតក្នុងភូមិត្រគៀត ឃុំរកា ស្រុកពារាំង ខេត្តព្រៃវែង។
នាយឧត្ដមសេនីយ៍ វង្ស ពិសេន បានលើកឡើងថា នៅក្នុងរបបប្រល័យពូជសាសន៍ ប៉ុល ពត បានកាប់សម្លាប់ប្រជាពលរដ្ឋស្លូតត្រង់ និងបំផ្លិចបំផ្លាញហេដ្ឋារចនាសម្ព័ន្ធដល់ឬសគល់ ក្នុងនោះទីអារាមព្រះពុទ្ធសសាសនាត្រូវបានវាយកម្ទេច ព្រះវិហារធ្វើជាឃ្លាំង និងជាទីកន្លែងចិញ្ចឹមសត្វ សិទ្ធិសេរីភាពជំនឿសាសនា ទំនៀមទំលាប់ប្រពៃណី ត្រូវបានលុបបំបាត់ទាំងស្រុង។
ឯកឧត្តមបានបន្តថា ផ្តើមចេញពីការតស៊ូរំដោះជាតិ ដឹកនាំដោយគណបក្សប្រជាជន បានសង្រ្គោះជាតិ និងអាយុជីវិតប្រជាជនឲ្យរួចផុតពីសេចក្តីស្លាប់ នាថ្ងៃទី៧មករា ឆ្នាំ១៩៧៩ ហើយនេះចាត់ទុកជាជ្រោះមរណៈទីមួយ។ ដោយឡែក ក្នុងបរិបទដែលកម្ពុជាស្ថិតក្នុងជ្រោះមរណៈ នៃការឆ្លងរាតត្បាតដោយជំងឺកូវីដ-១៩ សម្តេចតេជោ ហ៊ុន សែន បានដាក់ចេញយុទ្ធសាស្ត្រនិងវិធានការមុតស្រួច ដើម្បីសង្គ្រោះជីវិតពលរដ្ឋឱ្យរួចផុតពីជ្រោះមរណៈនៃជំងឺកូវីដ-១៩ ជាលើកទីពីរ។
«កម្ពុជាភ័ព្វសំណាង ដែលមានមេដឹកនាំដ៏ឈ្លាសវៃ គឺសម្តេចតេជោ ហ៊ុន សែន ដែលជាវីរបុរសស្នេហាជាតិ ជាបិតាស្ថាបនិកសន្តិភាព ជាអ្នកធានាការពារអធិបតេយ្យជាតិ បូរណភាពទឹកដីយ៉ាងរឹងមាំ ពង្រឹងខឿនការពារសុខភាពរបស់ប្រជាជន និងលើកកម្ពស់កម្រិតជីវភាពប្រជាពលរដ្ឋ ឱ្យរស់នៅក្នុងសង្គមដែលមានភាពសុខដុមរមនា និងការអភិវឌ្ឍ»។
នាយឧត្តមសេនីយ៍ វង្ស ពិសេន បានកោតសសើរ និងវាយតម្លៃខ្ពស់ចំពោះព្រះទ័យផ្តួចផ្តើម និងការខិតខំរបស់ព្រះចៅអធិការគ្រប់ជំនាន់ ព្រមទាំងព្រះសង្ឃគ្រប់ព្រះអង្គ រួមជាមួយសប្បុរសជន ពុទ្ធបរិស័ទ បានសាមគ្គីគ្នាបរិច្ច្ចាគធនធាន កសាងសមិទ្ធផលក្នុងទីអារាម សម្រាប់ប្រើប្រាស់ដល់វិស័យព្រះពុទ្ធសាសនា ដែលជាសាសនារបស់រដ្ឋ។
បន្ថែមលើសនេះ ឯកឧត្តម អគ្គមេបញ្ជាការ បានលើកឡើងពីតម្លៃសន្តិភាព ដែលមានសារៈសំខាន់ខ្លាំងណាស់សម្រាប់ការអភិវឌ្ឍរីកចម្រើន ទាំងផ្នែកពុទ្ធចក្រ និងផ្នែកអាណាចក្រ។ ហើយថ្មីៗនេះ សន្តិភាព បានផ្តល់ឱកាសឱ្យកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលៗ កម្រិតពិភពលោក ទទួលបានជោគជ័យ ដែលជាការលើកកម្ពស់មុខមាត់កម្ពុជានៅលើឆាកអន្តរជាតិ។
«មនុញ្ញផលនៃសន្តិភាព ដែលកម្ពុជាទទួលបាននាបច្ចុប្បន្ននេះ មិនមែនកើតឡើងដោយចៃដន្យនោះទេ តែជាផែនទីចង្អុលផ្លូវដ៏ច្បាស់លាស់ លើមាគ៌ាដឹកនាំដ៏ត្រឹមត្រូវរបស់សម្តេចតេជោ ហ៊ុន សែន ដែលបានផ្តល់អាទិភាពខ្ពស់បំផុត គឺសន្តិភាព»។
ជាមួយនោះ នាយឧត្ដមសេនីយ៍ វង្ស ពិសេន ក៏បានអំពាវនាវដល់ប្រជាពលរដ្ឋទាំងអស់ ឲ្យបន្តរួមគ្នាថែរក្សាពួនជ្រុំរាល់សមិទ្ធផលដ៏ថ្លៃថ្លារបស់សង្គមជាតិឱ្យបានរឹងមាំ និងប្តេជ្ញាដាច់ខាតការពារសន្តិភាព ឯកភាពជាតិឱ្យបានស្ថិតស្ថេរគង់វង្សជានិច្ច មិនឱ្យជនណា ឬអានុភាពណាមកបំផ្លាញបានឡើយ៕
