អាល់កុល​ក្លែងក្លាយ ឬ​មេ​តា​ណុល​ប្រមាណ​ជាង៧០០០លីត្រ ត្រូវបាន​មន្ត្រី​អគ្គនាយកដ្ឋាន ក.ប.ប. ចុះបង្ក្រាប

ភ្នំពេញ៖  មន្ត្រី​អគ្គនាយកដ្ឋាន ក.ប.ប. ដោយមាន​ការអនុញ្ញាត​ពី​លោក​ព្រះរាជអាជ្ញារង អម​សាលាដំបូង​រាជធានី​ភ្នំពេញ និង​មាន​ការចូល​រួមសហកា​រ​ដោយ​អាជ្ញាធរ​ដែនដី​ខណ្ឌ​ពោធិ៍​សែន​ជ័យ បាន​ចុះបង្ក្រាប​ទីតាំង​ស្តុក និង​ចែកចាយ​អាល់កុល​ក្លែងក្លាយ ឬ​មេ​តា​ណុល មួយកន្លែង​ដែលមាន​អាសយដ្ឋាន​ស្ថិតនៅ​សង្កាត់​ចោមចៅ២ ខណ្ឌ​ពោធិ៍​សែន​ជ័យ រាជធានី​ភ្នំពេញ។

ក្នុង​សកម្មភាព​ត្រួតពិនិត្យ​នេះ​កាលពី​ថ្ងៃទី២៤ ខែមិថុនា ឆ្នាំ២០២១មន្ត្រី​ជំនាញ​បាន​ដកយក​គំរូ​ផលិតផល​ធ្វើការ​វិភាគ​ភ្លាម ៗ ដោយ​រថយន្ត​ពិសោធន៍​ចល័ត​របស់​អគ្គនាយក​ដ្ឋា​ន ក.ប.ប. ដោយ​ទទួលបាន​លទ្ធផល​ដូចខាងក្រោម៖

– ផលិតផល​ចំនួន ១២១កាន និង ៨០០ដប ស្មើនឹង ៤ ០៣០លីត្រ គឺជា​សារធាតុ​មេ​តា​ណុល

– ផលិតផល​ចំនួន ១០៤កាន ស្មើនឹង ៣ ១២០លីត្រ មាន​ល្បាយ​សារធាតុ​មេ​តា​ណុល

ក្រោយ​ការត្រួតពិនិត្យ មន្ត្រី​ជំនាញ​បាន​ដកយក​គំរូ​ផលិតផល​ទាំងនោះ មក​វិភាគ​បន្ថែម​នៅ​មន្ទីរពិសោធន៍​របស់​អគ្គ​នាយកដ្ឋាន ក.ប.ប. ដើម្បី​បញ្ជាក់​លទ្ធផល​បន្ថែម។

វត្ថុតាង​ទាំងអស់ ត្រូវបាន​រក្សាទុក​ដោយ​ហ៊ុ​ព័ទ្ធ ឃ្លុំបេ និង​បិទ​សៀ​ល​ជា​បណ្តោះអាសន្ន​នៅនឹងកន្លែង រង់ចាំ​អនុវត្ត​នីតិវិធី​បន្ត៕

#អរគុណសន្តិភាព

Leave a Comment

Your email address will not be published.