ស្ថានភាព​ក្នុង​តំបន់​បិទ​ខ្ទប់ នៃ​ភូមិសាស្ត្រ​សង្កាត់​ទាំង៣ ក្នុង​ក្រុង​សៀមរាប មាន​សណ្តាប់ធ្នាប់​ល្អ

សៀមរាប៖ គិត​មកទល់​រសៀល​ថ្ងៃទី១៩ ខែមេសា ឆ្នាំ ២០២១នេះ បើ​ពិ​នោ​ត្យ​ជារួម​នៅ​ទិដ្ឋភាព​ទូទៅ ក្នុង​តំបន់​បិទ​ខ្ទប់ នៃ​ភូមិសាស្ត្រ​សង្កាត់​ទាំង៣ របស់​ក្រុង​សៀមរាប រួមមាន ៖ សង្កាត់​សាលា​កំរើក, សង្កាត់​ស្វាយដង្គំ និង​សង្កាត់​សៀមរាប គឺ ពុំមាន​បញ្ហា​អ្វី​ច្រើន​នោះទេ ដោយសារ​មានការ​យល់ដឹង​ពី​បងប្អូន​ប្រជាពលរដ្ឋ និង​មានការ​ចូលរួម​ពី​សំណាក់​បងប្អូន​ប្រជាពលរដ្ឋ ធ្វើ​ឲ្យ​ស្ថានភាព​ក្នុង​តំបន់​មាន​ភាពល្អប្រសើរ ខណៈដែល​កងកម្លាំង​ឈរជើង​តំបន់​បិទ​ខ្ទប់​នេះ ដែលមាន​កងកម្លាំង​នគរបាល​ខេត្ត និង​ក្រុង​សៀមរាប និង​កងរាជអាវុធហត្ថ​ខេត្ត និង​ក្រុង​សៀមរាប ព្រមទាំង​អាជ្ញាធរ​ពាក់ព័ន្ធ កំពុង​បំពេញភារកិច្ច មាន​សន្តិសុខ​សណ្តាបធ្នាប់​ល្អ ដោយមាន​ការសម្របសម្រួល​បាន​យ៉ាង​ប្រសើរ និង​ប្រកបដោយ​ការទទួលខុសត្រូវ​ខ្ពស់បំផុត ។

លោក ញឹក សុខន នាយរង​ការិយាល័យ​នគរបាល​ចរាចរ​ផ្លូវគោក នៃ​ស្នងការដ្ឋាន​នគរបាល​ខេត្តសៀមរាប បាន​ឲ្យ​នៅថ្ងៃនេះ​ថា  សម្រាប់​កងកម្លាំង​រប​ស់លោក គឺ​ប្រចាំការ​នៅ៣គោលដៅ រួមមាន ៖១. គោលដៅ​ស្តុ​ប​សារមន្ទីរ , ២. គោលដៅ​ស្តុ​ប​សុខា និង ៣. គោលដៅ​សួនច្បារ​ព្រះរាជដំណាក់ ហើយ​ពួកគាត់​បាន​បំពេញការងារ​ស្របតាម​តួនាទី និង​ភារកិច្ច​ដែល​ថ្នាក់ដឹកនាំ​ប្រគល់​ឲ្យ ហើយ​អនុវត្ត​ឲ្យ​បានល្អ​ប្រសើរ ដើម្បី​ចូលរួម​ក្នុងការ​ទប់ស្កាត់​ការឆ្លង​រីក​រាលដាល​នូវ​ជំងឺ​កូ​វីដ-១៩ ស្របតាម​សេចក្តីណែនាំ​របស់​ប្រមុខ​រាជរដ្ឋាភិបាល ដ៏​ដូចជា​រដ្ឋបាល​ខេត្តសៀមរាប ធ្វើយ៉ាងណា​រក្សាបាន​សន្តិ​សុខ​សណ្តាប់ធ្នាប់ នៅ​តំបន់​បិទ​ខ្ទប់​នេះ ។

រដ្ឋបាល​ខេត្តសៀមរាប កាលពី​ថ្ងៃទី១៥ ខែមេសា ឆ្នាំ២០២១កន្លងទៅថ្មីៗនេះ បានចេញ​សេចក្ដីសម្រេច​មួយ ដោយ​សម្រេច​បិទ​ខ្ទប់​ជា​បណ្ដោះអាសន្ន​ភូមិសាស្ត្រ​សង្កាត់​ចំនួន០៣ក្នុង​ក្រុង​សៀមរាប រួមមាន ៖ សង្កាត់​ស្វាយដង្គំ , សង្កាត់​សាលា​កំរើក និង សង្កាត់​សៀមរាប ដែលជា​តំបន់​មានការ​ឆ្លង​រាលដាល​នៃ​ជំងឺ​កូ​វីដ-១៩ ក្នុង​រយៈពេល ០២ សប្ដាហ៍ ដោយ​គិត​ចាប់ពី​ថ្ងៃទី១៦ រហូតដល់​ថ្ងៃទី២៩ ខែមេសា ឆ្នាំ២០២១ ប៉ុន្តែ​ការលក់ដូរ​ទំនិញ និង​អាជីវកម្ម​ដំណើរការបាន​ជាធម្មតា ហើយ​រដ្ឋបាលខេត្ត​នឹង​ចាត់វិធានការ​ចំពោះ​ជន​ឆ្លៀតឱកាស​ឡើងថ្លៃ​ទំនិញ ។

សូមបញ្ជាក់ថា គិត​ត្រឹម​ថ្ងៃទី១៩ ខែមេសា ឆ្នាំ២០២១ ក្នុង​ព្រឹត្តិការណ៍​ការឆ្លង​រាលដាល​ក្នុង​សហគមន៍២០កុម្ភៈ ខេត្តសៀមរាប មាន​អ្នក​វិជ្ជមាន​ជំងឺ​កូ​វីដ-១៩ សរុប​ចំនួន ២០នាក់ ក្នុងនោះ​ព្យាបាល​ជាសះស្បើយ ចំនួន ០៨នាក់ និង​កំពុង​សម្រាក​ព្យាបាល​នៅ​មន្ទីរពេទ្យបង្អែក​ខេត្ត ចំនួន ១២នាក់ ៕

#អរគុណសន្តិភាព

Related Posts

Leave a Reply

Your email address will not be published.