ពេញចិត្ត​ខ្លាំងណាស់!  «អា​លី​បា​បា» ផ្អាក​ឡើង​ប្រាក់ខែ​អ្នកគ្រប់គ្រង យកមក​បន្ថែម​ឱ្យ​បុគ្គលិក ព្រោះ «ជា​ធនធានមនុស្ស​ដ៏​សំខាន់បំផុត»

បរទេស៖ ទីភ្នាក់ងារ​ព័ត៌មាន​អន្តរជាតិ បាន​រាយការណ៍​កាលពី​ថ្ងៃទី1 ឧសភា​ថា «Alibaba Group Holding~ មហា​យក្ស​ផ្នែក Ecommerce របស់​ប្រទេស​ចិន បានប្រកាស​ផ្អាក​ដំឡើង​ប្រាក់ខែ​ឱ្យ​អ្នកគ្រប់គ្រង​ជាន់ខ្ពស់​នៅ​ឆ្នាំ2021នេះ ដើម្បី​ទុក​បន្ថែម​ប្រាក់ខែ​ឱ្យ​បុគ្គលិក​ជំនាន់​ថ្មី។

របាយការណ៍ បាន​បញ្ជាក់ថា ក្នុងអំឡុង​ដំណាច់ឆ្នាំ​កន្លងទៅ អ្នកគ្រប់គ្រង​អា​លី​បា​បា បាន​ដំឡើង​ប្រាក់ខែ​ដោយ​គិត​ជាធ​មធ្យម ៥-១០ភាគរយ​ក្នុង ១ឆ្នាំ និង​ថែមទាំង​បានទទួល​ភាគហ៊ុន​ទៀតផង តែ​យ៉ាងណាក្ដី អ្នកគ្រប់គ្រង​លំដាប់​ខ្ពស់​ជាច្រើន​រយ​នាក់​របស់​អា​លី​បា​បា មិនបាន​ឡើង​ប្រាក់ខែ​ក្នុងឆ្នាំនេះ​ទេ លើកលែង​តែមាន​ស្នាដៃ​ល្អ​លេចធ្លោ​ពិសេស។

«បុគ្គលិក​ដែលមាន​សមត្ថភាព​ពិសេស ជា​ធនធាន​ដ៏​សំខាន់បំផុត​របស់​អា​លី​បា​បា​គ្រុប  យើង​មាន​ប្រព័ន្ធ​ការផ្ដល់​រង្វាន់​ដ៏​រឹងមាំ និង​អាច​ប្រកួតប្រជែង​បាន ដែល​ឆ្លុះបញ្ចាំង​ឱ្យឃើញ​ពី​ការផ្ដល់​ភាព​សំខាន់​ក្នុងការ​បណ្ដុះបណ្ដាល​អ្នក​មាន​សមត្ថភាព​ក្នុង​ជំនាន់​របស់​យើង» នេះ​ជា​សេចក្ដីថ្លែងការណ៍​របស់​ក្រុមហ៊ុន។

ជាទូទៅ អា​លី​បា​បា​នឹង​ពិចារណា​ដំឡើង​ប្រាក់ខែ​ឱ្យ​បុគ្គលិក​នៅក្នុង​ខែមេសា ដោយ​ទាំងអស់នេះ អា​លី​បា​បា មាន​បុគ្គលិក​ទាំងអស់​ច្រើនជាង 252,000នាក់។

អាណាចក្រ​ធុរកិច្ច​របស់​អា​លី​បា​បា ស្ថិតក្រោម​ការត្រួតពិនិត្យ​យ៉ាង​តឹងរ៉ឹង​នៅក្នុង​ប្រទេស​ចិន ចាប់តាំងពី “ជែក ម៉ា” មហាសេដ្ឋី​ស្ថាបនិក​អា​លី​បា​បា បាន​រិះគន់​ប្រព័ន្ធ​ការគ្រប់គ្រង​របស់​ប្រទេស​កាលពី​ខែតុលា ឆ្នាំ2020 ក្រោម​ក្ដីបារម្ភ​របស់​រដ្ឋបាល​ចិន ពាក់ព័ន្ធ​នឹង​ការគ្រប់គ្រង​ទីផ្សារ និង​សមត្ថភាព​ក្នុងការ​គ្រប់គ្រង​ការយល់ឃើញ​របស់​សាធារណជន។

កាលពី​ខែមេសា ក្រុមហ៊ុន​មួយ​នេះ ទើបតែ​ត្រូវ​រង​ការផាកពិន័យ​ជា​ប្រាក់ ១៨ពាន់​លាន​យន់ ឬ​ប្រមាណ ២,៧៨ពាន់​លាន​ដុល្លារ ក្រោយពី​ការស៊ើបអង្កេត​ប្រឆាំងនឹង​ការគ្រប់គ្រង​ទីផ្សារ​ផ្ដាច់មុខ បាន​រកឃើញថា ក្រុមហ៊ុន​ដ៏​ធំ​ខាង​អ៊ី​ខំ​មើ​កស៍​មួយ​នេះ បាន​ប្រើប្រាស់​តួនាទី​ខាង​ទីផ្សារ​ដែល​លេចធ្លោ​ក្នុង​ផ្លូវ​ដែល​ខុស​ជាច្រើន​ឆ្នាំ​មកហើយ៕

ប្រភព៖ សារព័ត៌មាន​បរទេស

ប្រែ​សម្រួល៖ ភ្នែក៤

#អរគុណសន្តិភាព

Leave a Comment

Your email address will not be published.