ប្រជាពលរដ្ឋ​ចំនួន ២២គ្រួសារ រងគ្រោះ​ដោយ​ខ្យល់​កន្ត្រាក់ នៅ​ស្រុក​ទឹកឈូ ទទួល​អំណោយ​មនុស្សធម៌​កាកបាទក្រហមកម្ពុជា

កំពត៖ ប្រជាពលរដ្ឋ​ចំនួន ២២គ្រួសារ ដែល​រងគ្រោះ​ដោយ​ខ្យល់​កន្ត្រាក់ បង្ក​ឱ្យ​ខូចខាត និង​រលំ​ផ្ទះ នៅក្នុង​ឃុំ​កូន​សត្វ ស្រុក​ទឹកឈូ ខេត្តកំពត បានទទួល​អំណោយ​មនុស្សធម៌​កាកបាទ​ក្រហម​កម្ពុជា។ ស្របពេល​ជាមួយគ្នានេះដែរ ស្ពានបេតុង​មួយកន្លែង​ទៀត ត្រូវបាន​ក្រុម ការងារ​ស្រុក​ទឹកឈូ ឧបត្ថម្ភ​ថវិកា​សាងសង់​ជូន​ពលរដ្ឋ​ប្រើប្រាស់​ផងដែរ កាលពី​ថ្ងៃទី២២ ខែកញ្ញា ឆ្នាំ២០២០ ។

ប្រជាពលរដ្ឋ​ចំនួន ២២គ្រួសារ រងគ្រោះ​ដោយ​ខ្យល់​កន្ត្រាក់ នៅ​ស្រុក​ទឹកឈូ ទទួល​អំណោយ​មនុស្សធម៌​កាកបាទក្រហមកម្ពុជា

ពិធី​នេះ​ស្ថិតក្រោម​វត្តមាន លោក អ៊ឹង ឆាយ អភិបាលរង​ខេត្តកំពត ព្រមទាំង​មានការ ចូលរួម​ពី​សមាជិក​សាខា អនុសាខា និង​មន្ត្រី​ស្ម័គ្រចិត្ត​កាកបាទក្រហម​ថ្នាក់មូលដ្ឋាន ដោយបាន​នាំយក​នូវ​អំណោយ​មនុស្សធម៌​កាកបាទក្រហមកម្ពុជា​ផ្តល់ជូន​ដល់ គ្រួសារ​ប្រជា ពលរដ្ឋ​រងគ្រោះ​ដោយ​ខ្យល់​កន្ត្រាក់ រលំ​ផ្ទះ និង​ប៉ើង​ដំបូល​ចំនួន២២គ្រួសារ នៅក្នុង​ភូមិ​ចំនួន៣ គឺ​នៅ​ភូមិ​កំពង់​នង់​ចំនួន១៩គ្រួសារ ភូមិ​កំពង់​ត្នោត១គ្រួសារ និង​ភូមិ​កូន​សត្វ​ចំនួន២គ្រួសារ (រលំ​ផ្ទះ​ទាំងស្រុង១គ្រួសារ) ។

លោក អ៊ឹង ឆាយ បាន​សម្តែង​ការចូលរួម​សោកស្ដាយ ជាមួយ​គ្រួសារ​ប្រជា ពលរដ្ឋ​រងគ្រោះ​ព្រមទាំង​បាន​ពាំនាំ​ការសួរសុខទុក្ខ​របស់ ឯកឧត្តម  ជាវ តា​យ ប្រធាន​គណៈ ក​ម្មា​ធិ​ការ​សាខា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា  ដែលជា​និច្ចកាល សម្តេច​តែងតែ​គិតគូរ​ពី​សុខទុក្ខ​របស់​បងប្អូន​ប្រជាពលរដ្ឋ​ជួប​ការលំបាក ជន​ងាយ​រងគ្រោះ និង​រងគ្រោះ​ដោយ​គ្រោះមហន្តរាយផ្សេងៗ និង​ជន​ចាស់ជរា​គ្មាន​ទីពឹង ដោយ​មិន​ប្រកាន់​រើសអើង​វណ្ណៈ ជាតិ​សាសន៍ ពណ៌​សម្បុរ ឬ​និន្នាការ​នយោបាយ​អ្វី​ឡើយ។

ក្នុងឱកាស​នោះ​លោក​បាន​លើកទឹកចិត្ត​ដល់​ពលរដ្ឋ​រងគ្រោះ សូមកុំ​អស់សង្ឃឹម ត្រូវខិតខំ​បង្កបង្កើនផល​កសិកម្ម ដើម្បី​បង្កើន​ជីវភាព​គ្រួសារ ហើយ​យើង​ត្រូវខិតខំ​យកចិត្ត​ទុក ដាក់ ប្រកាន់យក​នូវ​អនាម័យ​ល្អ រស់នៅ​ស្អាត ហូប​ស្អាត ផឹក​ស្អាត ពិសេស​អនុវត្តន៍​នូវ​វិធាន ការបង្ការ​ទប់ស្កាត់​ជំងឺ​កូ​វីដ-១៩ កុំឱ្យ​រីក​រាលដាល។

ប្រជាពលរដ្ឋ​ចំនួន ២២គ្រួសារ រងគ្រោះ​ដោយ​ខ្យល់​កន្ត្រាក់ នៅ​ស្រុក​ទឹកឈូ ទទួល​អំណោយ​មនុស្សធម៌​កាកបាទក្រហមកម្ពុជា

ចំពោះ​អំណោយ​កាកបាទក្រហម ផ្ដល់ជូន​គ្រួសារ​រងគ្រោះ​ទាំង ២២គ្រួសារ​នៅ ពេលនេះ ក្នុង​មួយ​គ្រួសារ​អង្ករ ២៥​គីឡូក្រាម មី១កេស ទឹកស៊ីអ៊ីវ១យួរ និង​ថវិកា​ចំនួន៩ ម៉ឺន​រៀល សម្រាប់២១គ្រួសារ និង​មួយ​គ្រួសារ​ដែល​រលំ​ផ្ទះ​ចំនួន ១៥ម៉ឺន​រៀល។ ដោយឡែក លោក អ៊ឹង ឆាយ បាន​ជួយ​កសាង​ផ្ទះ​ដល់​ស្ត្រី​រងគ្រោះ​រលំ​ផ្ទះ​ទាំងស្រុង​នោះ​ឡើងវិញ​ផងដែរ។

ក្រោយ​ប្រគល់​ជូនអំណោយ​កាកបាទក្រហម លោក អ៊ឹង ឆាយ បាន​បន្តដំណើរ ទៅពិនិត្យ​ស្ពាន និង​បាន​ឧបត្ថម្ភ​ថវិកា​សម្រាប់​ជួយ​ការសាងសង់​ស្ពានបេតុង​មួយកន្លែង សម្រាប់​ឆ្លើយតប​តាម​ការស្នើសុំ​របស់​ប្រជាពលរដ្ឋ​ក្នុង​មូលដ្ឋាន ដែល​ស្ពាន​នេះ​មាន​ប្រវែង១២ ម៉ែត្រ ទទឹង៤ម៉ែត ដើម្បី​បង្ក​ភាពងាយស្រួល​ក្នុងការ​ធ្វើដំណើរ​ឆ្លងកាត់ និង​ដឹក​កសិផល​ពលរដ្ឋ​នៅ​តំបន់​នោះ៕

ប្រភព៖ AKP