អាស្រូវ​លំដាប់​ពិភពលោក! សារព័ត៌មាន​ល្បី ទម្លាយ៖ អភិ​មហាសេដ្ឋី​ចិត្តបុណ្យ “Bill Gates” ធ្លាប់​ខូច​ជាមួយ​បុគ្គលិក​ស្រី ក្នុង​មៃ​ក្រូ​សូ​ហ្វ​ត៍

បរទេស៖ អភិ​មហាសេដ្ឋី​ចិត្តបុណ្យ ប៊ី​ល​ល៍ ហ្គេ​ត​ស៍ (Bill Gates) ត្រូវបាន​អះអាងថា ធ្លាប់មាន​សម្ព័ន្ធភាព​បែ​ប​សហាយស្មន់ ជាមួយ​បុគ្គលិក​ស្រី​ម្នាក់​នៅក្នុង​ក្រុមហ៊ុន​របស់ខ្លួន ហើយ​លោក បាន​លាឈប់​ពី​តំណែង​ប្រធាន​គណៈកម្មការ​គ្រប់គ្រង​ក្រុមហ៊ុន​ម៉ៃ​ក្រូ​សូ​ហ្វ​ត៍ កាលពី​ឆ្នាំ​កន្លងទៅ ក្នុងអំឡុង​ពេលដែល​ខាង​គណៈកម្មការ​គ្រប់គ្រង​ក្រុមហ៊ុន កំពុង​ស៊ើបអង្កេត​ពី​រឿងរ៉ាវ​នោះ។ នេះ​បើតាម​របាយការណ៍ របស់​ប្រព័ន្ធ​ផ្សព្វផ្សាយ​របស់​សហរដ្ឋ​អាមេរិក កាលពី​ថ្ងៃអាទិត្យ ទី១៦ ឧសភា​កន្លងទៅ។

សារព័ត៌មាន​Wall Street Journal បាន​រាយការណ៍​ថា គណៈកម្មការ​គ្រប់គ្រង​ក្រុមហ៊ុន បានដឹង​រឿង​នោះ​ក្នុង​ឆ្នាំ២០១៩ នៅពេលដែល​ស្ត្រី​វិស្វករ​ម្នាក់​របស់​ម៉ៃ​ក្រូ​សូ​ហ្វ​ត៍ បាន​សរសេរ​សំបុត្រ​ប្ដឹងផ្ដល់ ដោយ​អាង​ថា នាង និង​លោក​ហ្គេ​ត​ស៍ មាន​សម្ព័ន្ធភាព​ខាង​ផ្លូវភេទ​ជាមួយគ្នា​ជាច្រើន​ឆ្នាំកន្លងមក។ ស្ត្រី​រូបនោះ បានទាមទារ កែសម្រួល​មុខតំណែង​តួនាទី​ការងារ​នៅក្នុង​ម៉ៃ​ក្រូ​សូ​ហ្វ​ត៍ និង​សំណូមពរ​សុំឱ្យ​លោកស្រី​មេ​លីន​ដា ភរិយា​របស់លោក​ហ្គេ​ត​ស៍ ដែល​បច្ចុប្បន្ន​លែងលះគ្នា​ហើយ​នោះ បាន​អានសំបុត្រ ១ច្បាប់​នោះ​ផង (តែ​រឿងនេះ មិន​ច្បាស់​ថា តើ​លោកស្រី​មេ​លីន​ដា បាន​អានសំបុត្រ ១ច្បាប់ ឬក៏​អត់​ឡើយ)។

របាយការណ៍​របស់ វ៉​ល ស្ទ្រី​ត ហ្សួ​រណាល់ បាន​បញ្ជាក់ថា ខាង​គណៈកម្មការ​គ្រប់គ្រង បាន​ជួល​ក្រុមហ៊ុន​ច្បាប់​មួយ ឱ្យ​ចូលមក​ស៊ើបអង្កេត​រឿងនេះ ជាពិសេស​ក្នុង​រឿង​សម្ព័ន្ធភាព​របស់​អ្នក​ទាំង។

ក្នុងអំឡុង​ការស៊ើបអង្កេត សមាជិក​គណៈកម្មការ​មួយផ្នែក បាន​សម្ដែង​ក្ដីកង្វល់​ចំពោះ​ការចោទប្រកាន់​នោះ និង​សម្រេចចិត្តថា លោក​ហ្គេ​ត​ស៍ ដែលជា​ស្ថាបនិក​ក្រុមហ៊ុន​តិច​ណូ​ឡូ​ជី​មួយ​នេះ​ក្នុង​ឆ្នាំ១៩៧៥ គួរតែ​លាឈប់​ពី​តំណែង​ប្រធាន​គណៈកម្មការ​គ្រប់គ្រង​ក្រុមហ៊ុន។

តែ​យ៉ាងណាក្ដី អភិ​មហាសេដ្ឋី​ម្នាក់នេះ នៅតែ​បានទទួល​ការជ្រើសរើស ឱ្យ​ត្រឡប់មក​គ្រង​តំណែង​នៅក្នុង​ជួរ​គណៈកម្មការ​គ្រប់គ្រង​ម៉ៃ​ក្រូ​សូ​ហ្វ​ត៍ ក្នុង​កិច្ចប្រជុំ​ភាគ​ហ៊ុ​និក​ប្រចាំឆ្នាំ​ដដែល។ របាយការណ៍​ព័ត៌មាន បាន​បញ្ជាក់ថា ទោះជា​យ៉ាងនេះ​ក្ដី ទីបំផុត​ទៅ លោក​បាន​លាឈប់ មុន​ការស៊ើបអង្កេត​នឹង​ចប់សព្វគ្រប់ ដោយ​អាង​ថា ត្រូវការ​ផ្ដោតអារម្មណ៍​ទៅលើ​ការងារ​សប្បុរសធម៌។

“ម៉ៃ​ក្រូ​សូ​ហ្វ​ត៍ បានទទួល​សំបុត្រ​ដែល​គួរឱ្យ​ព្រួយបារម្ភ ១ច្បាប់ ក្នុងអំឡុង​ពាក់កណ្ដាល​ឆ្នាំ២០១៩ ដែល​អះអាងថា លោក ប៊ី​ល ហ្គេ​ត​ស៍ ចាប់ផ្ដើម​មាន​សម្ព័ន្ធភាព​ជិតស្និទ្ធ ជាមួយ​បុគ្គលិក​ស្រិ​ម្នាក់​របស់​ក្រុមហ៊ុន​ក្នុង​ឆ្នាំ២០០០” អ្នកនាំពាក្យ​របស់​ក្រុមហ៊ុន​ម៉ៃ​ក្រូ​សូ​ហ្វ​ត៍​បាន​ថ្លែងបន្តថា “គណៈកម្មការ​គ្រប់គ្រង បាន​ពិនិត្យមើល​ក្ដី​ព្រួយបារម្ភ​នោះ ក្រោម​ជំនួយ​របស់​ក្រុមហ៊ុន​ច្បាប់​មកពី​ក្រៅ ដែល​បាន​ដំណើរការ​ស៊ើបអង្កេត​យ៉ាង​ល្អិតល្អន់…ពេញ​មួយ​រយៈពេល​ស៊ើបអង្កេត ម៉ៃ​ក្រូ​សូ​ហ្វ​ត៍ បានប្រគល់​ការគាំទ្រ​យ៉ាង​ធំ​ទូលាយ​ដល់​បុគ្គលិក​ដែល​លើកឡើង​ពី​ក្ដី​ព្រួយ​កង្វល់​នោះ​ផងដែរ”

ចំណែក​អ្នកនាំពាក្យ​របស់លោក​ហ្គេ​ត​ស៍ បាន​ទទួលស្គាល់ថា “ការ​សេពគប់​សហាយស្មន់​នេះ បានកើត​ឡើង​ជិត ២០ឆ្នាំមុន ដែល​វា​ក៏​យូរយារ​ណាស់​ហើយ និង​បាន​ចប់​ទៅវិញ​ដោយ​សម្រួល” និង​បាន​ថ្លែង​ទៀតថា ការសម្រេចចិត្ត​លាឈប់​ពី​គណៈកម្មការ​គ្រប់គ្រង មិនមាន​ពាក់ព័ន្ធ​នឹង​រឿងនេះ​ទេ “ការពិត លោក​ធ្លាប់បាន​ប្រាប់ថា  ចង់​មាន​ពេលវេលា​ឱ្យបាន​ច្រើនឡើង ជាមួយ​កិច្ចការ​សប្បុរសធម៌ ដែល​ចាប់​ផ្ដើមឡើង​រួចហើយ​កាលពី​ច្រើន​ឆ្នាំមុន”

ក្រុមហ៊ុន​ម៉ៃ​ក្រូ​សូ​ហ្វ​ត៍ ធ្លាប់​រង​ការរិះគន់​យ៉ាងខ្លាំង នៅក្នុង​ខែមេសា ២០១៩ ក្រោយពី​វេ​ប​សាយ​ព័ត៌មាន Quartz បាន​រាយការណ៍​ថា មាន​សំបុត្រ​ពាក់ព័ន្ធ​ត​គ្នា ១ច្បាប់ ត្រូវបាន​ផ្ញើ​បន្ត​គ្នា​នៅក្នុង​ក្រុមហ៊ុន ជា​រឿងរ៉ាវ​ដែល​បណ្ដា​បុគ្គលិកស្រីៗ នាំគ្នា​ចែករំលែក​ពីបទ​ពិសោធ​ការរង​ការ​ល្មើស​ផ្លូវភេទ និង​ការប្រតិបត្តិ​មិន​ស្មើភាព។

តាម​ពីក្រោយ​របាយការណ៍​ព័ត៌មាន​នោះ ខាង​លោក សា​តា​យ៉ា ណេ​ដេ​ល​ឡា CEO របស់​ម៉ៃ​ក្រូ​សូ​ហ្វ​ត៍ បាន​ថ្លែងថា ក្រុមហ៊ុន​នឹង​ផ្លាស់ប្ដូរ​កម្មវិធី​ការចាត់ការ​ពាក្យ​តវ៉ា​ប្តឹងផ្ដល់​រឿង​រង​ការ​ល្មើស​ផ្លូវភេទ និង​ការប្រតិបត្តិ​មិន​ស្មើភាព​របស់​ក្រុម​បុគ្គលិក។

របាយការណ៍​ព័ត៌មាន​របស់ វ៉​ល ស្ទ្រី​ត ហ្សួ​រណាល់ កើតមានឡើង​ក្រោយពី​ប្រព័ន្ធ​ផ្សព្វផ្សាយ​មួយទៀត បាន​រាយការណ៍​ក្នុង​ថ្ងៃ​ជាមួយគ្នា បកអាក្រាត​លម្អិត​រឿងរ៉ាវ ដែល​លោក​ហ្គេ​ត​ស៍ ធ្លាប់​ពាក់ព័ន្ធ​រឿងអាស្រូវ​ជាមួយ​ស្ត្រី​ជាច្រើន​នាក់​នៅក្នុង​ការិយាល័យរ​ប​ស់លោក ទោះជា​លោក​បាន​រៀបការ​ជាមួយ​លោកស្រី មេ​លីន​ដា នៅ​ឆ្នាំ១៩៩៤ រួចហើយ​ក៏ដោយ ខណៈដែល​កាសែត នី​វ​យ៉​ក ថា​ម​ស៍ បាន​លើកយក​ឧទាហរណ៍ ២ករណី ដែល​មហាសេដ្ឋី​រូបនេះ បបួលស្រីៗ ដែល​ធ្វើ​ការឱ្យ​លោក​នៅក្នុង​ម៉ៃ​ក្រូ​សូ​ហ្វ​ត៍ និង​មូលនិធិ ប៊ី​ល​ល៍ និង​មេ​លីន​ដា ចេញទៅ​ដើរលេង​ជាមួយគ្នា។

ទាំង ២ហេតុការណ៍ និង​ហេតុការណ៍ផ្សេងៗទៀត បាន​បង្កើត​សភាព​បរិស្ថាន​ដែល​ទើសទាល់ ធុញថប់​ចិត្ត​នៅក្នុង​កន្លែងធ្វើការ ក្នុងខណៈដែល​ជីវិត​ផ្ទាល់ខ្លួន​របស់លោក​ហ្គេ​ត​ស៍ ចាប់ផ្ដើម​ក្លាយជា​រឿង​ខ្សិ​ប​ខ្សៀវ និយាយដើម​ច្រើនឡើង​ក្នុង​ក្រុម​បុគ្គលិក។ វ៉​ល ស្ទ្រី​ត ហ្សួ​រណាល់ បាន​រាយការណ៍​ថា យ៉ាងណាក៏ដោយ  មិនបាន​ប្រាកដ​ច្បាស់​ថា លោកស្រី​មេ​លីន​ដា បានដឹង​អំពី​ទង្វើ​របស់​ស្វាមី ឬក៏​អត់​ឡើយ។

កាលពី​អំឡុង​ដើមខែ​កន្លងទៅ លោក​ប៊ី​ល​ល៍ ហ្គេ​ត​ស៍ និង​លោកស្រី​មេ​លីន​ដា បាន​ថ្លែង​បញ្ចប់ជីវិត​អាពាហ៍ពិពាហ៍ ២៧ឆ្នាំ ដោយ​ប្រាប់ថា “លែង​ជឿ​ត​ទៀតហើយ​ថា យើង​អាច​រីក​ធំធាត់​ទៅ​ជាមួយគ្នា​បាន ក្នុងឋានៈ​ជា​គូគ្រង​នឹង​គ្នា​ក្នុងអំឡុងពេល​តទៅ​ខាង​មុខ​ទៀត​នៃ​ជីវិត​របស់​យើង” ចំណែក​លោកស្រី​មេ​លីន​ដា បានបញ្ជាក់​នៅក្នុង​ពាក្យ​បណ្ដឹងសុំ​លែងលះ​ថា ជីវិត​អាពាហ៍ពិពាហ៍​របស់​យើង​ទាំង២ “បាក់​ដួលរលំ បែប​មិនអាច​កែកុន​បាន​ទៀតឡើយ”៕

ប្រភព៖ Newyork Post

ប្រែ​សម្រួល​ដោយ ទិ​ទី​តំ​តា​តូ

#អរគុណសន្តិភាព   

Related Posts

Leave a Reply

Your email address will not be published. Required fields are marked *