កងទ័ព​មី​យ៉ាន់​ម៉ា ប្រកាស​ដាក់​ប្រទេស​ក្នុង “ស្ថានការណ៍​អាសន្ន” ១ឆ្នាំ ព្រមទាំង​តែងតាំង​ឧត្ដមសេនីយ៍​យោធា​ម្នាក់ ជា​ប្រធានាធិបតី​ស្ដីទី

កងទ័ព​នៃ​ប្រទេស​មី​យ៉ាន់​ម៉ា បានប្រកាស “ស្ថានការណ៍​អាសន្ន” ដោយ​ទីភ្នាក់ងារ​ព័ត៌មាន AFP បាន​រាយការណ៍​ព័ត៌មាន Update អំពី​ករណី​កងទ័ព​មី​យ៉ាន់​ម៉ា បាន​សម្រុកចូល​ចាប់ខ្លួន​លោកស្រី អ៊ុង​សាន ស៊ូ​ជី ទីប្រឹក្សា​នៃ​រដ្ឋ និង​រដ្ឋមន្ត្រី​ក្រសួងការបរទេស របស់​ប្រទេស​មី​យ៉ាន់​ម៉ា រួមទាំង​លោក​ប្រធានាធិបតី វិ​ន មីន​ត៍ និង​ថ្នាក់ដឹកនាំ​គណបក្ស​សម្ព័ន្ធជាតិ​ដើម្បី​ប្រជាធិបតេយ្យ ឬ NLD កាលពី​ព្រឹក​ព្រលឹម​ថ្ងៃនេះ ថា កងទ័ព​មី​យ៉ាន់​ម៉ា បានប្រកាស​ដាក់​ប្រទេស​ក្នុង​ស្ថានការណ៍​អាសន្ន រយៈពេល ១ឆ្នាំ ព្រមទាំង​តែងតាំង​ឧត្ដមសេនីយ៍​យោធា ថ្នាក់​ឧត្ដមសេនីយ៍ឯក​ម្នាក់ ឱ្យ​ឡើង​គ្រង​តំណែង​ជា​ប្រធានាធិបតី​ស្ដីទី។

ស្ថានីយទូរទស្សន៍ “មៀ​វ​ឌី ធី​វី” របស់​កងទ័ព​មី​យ៉ាន់​ម៉ា បាន​បញ្ជាក់ថា កងទ័ព​ប្រកាស​ប្រើ​ស្ថានការណ៍​គ្រាអាសន្ន រយៈពេល ១ឆ្នាំ ព្រមទាំង​តែងតាំង​លោក​ឧត្ដមសេនីយ៍ឯក មីន សួយ អតីត​អនុ​ប្រធានាធិបតី និង​អតីត​ប្រធានាធិបតី​ស្ដីទី កាលពី​គ្រា​ដែល​លោក ទីន ច អតីត​មេដឹកនាំ​មី​យ៉ាន់​យ៉ា បាន​លាឈប់​ពី​តំណែង​ក្នុង​ឆ្នាំ២០១៦ ឡើង​គ្រង​តំណែង​ជា​ប្រធានាធិបតី​ស្ដីទី។

ដោយ​អំណាច​គ្រប់គ្រង និង​តុលាការ នឹងត្រូវ​បញ្ជូន​បន្តទៅ​ជូន​លោក​ឧត្ដមសេនីយ៍ឯក មីន អង់ ឡាយ អគ្គមេបញ្ជាការ។

ការសម្រេចចិត្ត​ប្រកាស​ដាក់​ប្រទេស​ក្នុង​ស្ថានការណ៍​គ្រាអាសន្ន បានធ្វើ​ឡើង ដើម្បី​ថែរក្សា​ការពារ​សន្តិសុខ​របស់​រដ្ឋ ព្រមទាំង​ចោទប្រកាន់​គណៈកម្មការ​រៀបចំ​ការបោះឆ្នោត អំពី​ការបរាជ័យ​ក្នុងការ​ទប់ទល់​នឹង​ការបោះឆ្នោត ដែលមាន​ភាពខុសប្រក្រតី និង​បង្ហាញ​សញ្ញា​ទុច្ចរិត កាលពី​ខែវិច្ឆិកា ឆ្នាំ​កន្លងទៅ និង​ជា​មូលហេតុ​ធ្វើឱ្យ​កងទ័ព ត្រូវតែ​ធ្វើ​រដ្ឋប្រហារ។

ខណៈដែល​សកម្មភាព​នៅ​ខាងក្រៅ​ប្រទេស​មី​យ៉ាន់​ម៉ា​វិញ លោកស្រី ចេ​ន សា​គី អ្នកនាំពាក្យ​ក្រសួងការបរទេស​សហ​រដ្ឋ​អាមេរិក បានបញ្ជាក់​នៅក្នុង​សេចក្ដីថ្លែងការណ៍​ថា រដ្ឋបាល​សហរដ្ឋអាមេរិក ជំទាស់់​ជាដាច់ខាត​រាល់​ក្ដី​ព្យាយាម​ណាមួយ ក្នុងការ​ផ្លាស់ប្ដូរ​លទ្ធ​ផល​ការបោះឆ្នោត កាលពីពេលថ្មីៗនេះ ឬ​រារាំង​ការផ្ទេរ-ប្រគល់​អំណាច​តាមរយៈ​របប​ប្រជាធិបតេយ្យ ហើយនឹង​ដំណើរការ​ទៅលើ​អ្នក​ដែលមាន​ចំណែក​រួម​ទទួលខុសត្រូវ បើ​សកម្មភាព​នេះ​មិនមាន​ការវិលត្រឡប់​វិញ​ទេនោះ។

ចំណែក​លោកស្រី ម៉ា​រី​ស៍ ផេ​ន រដ្ឋមន្ត្រី​ក្រសួងការបរទេស របស់​ប្រទេស​អូស្ត្រាលី បាន​ថ្លែង​ទាមទារ​ឱ្យ​កងទ័ព​មី​យ៉ាន់​ម៉ា​ដោះលែង​លោកស្រី អ៊ុង​សាន ស៊ូ​ជី និង​ថ្នាក់ដឹកនាំ​គណបក្ស NLD ដោយបាន​ដាស់តឿន​ថា កងទ័ព​កំពុង​ព្យាយាម​ដណ្ដើម​អំណាច​គ្រប់គ្រង​ប្រទេស​ជាថ្មី​ម្ដងទៀត “យើង​អំពាវនាវ​ឱ្យ​កងទ័ព គោរព​ច្បាប់ ដើម្បី​ដោះស្រាយ​បញ្ហា​ទំនាស់​តាមរយៈ​កម្មវិធី​ដែល​ត្រឹមត្រូវ និង​ដោះលែង​មេដឹកនាំ​ស៊ីវិល រួមទាំង​អ្នក​ផ្សេងទៀត ដែល​ត្រូវបាន​ចាប់ខ្លួន​យ៉ាង​ខុសច្បាប់​ផងដែរ”។

ប្រភព៖ ទីភ្នាក់ងារ​ព័ត៌មាន AFP

ប្រែ និង​សម្រួល​ដោយ ស៊ី​តា

#អរគុណសន្តិភាព

Related Posts

Leave a Reply

Your email address will not be published.