ធ្លាក់​យន្តហោះ​យោធា​នៅ​អ៊ុយ​ក្រែ​ន​ស្លាប់​មនុស្ស២៥នាក់

ភ្នំពេញ៖នៅ​ថ្ងៃ​សៅរ៍​នេះ​ប្រទេស​អ៊ុយ​ក្រែ​ន​បានប្រកាសថា​មនុស្ស ២៥ នាក់​បាន​ស្លាប់​នៅក្នុង​ហេតុ​ការធ្លាក់​យន្ដហោះ​យោធា​មួយ​ក្បែរ តំបន់ Kharkiv ភាគ​ឥសាន​របស់​ប្រទេស​ហើយ​ក្នុងនោះ​មាន​មនុស្ស​ពីរ​នាក់​ដែល​រស់​ជីវិត​និង​កំពុងស្ថិត​ក្នុងស្ថានភាព​ធ្ងន់ធ្ងរ​នៅឡើយ។

យោងតាម​មន្ត្រី​ជំនាញ​ដែល​បានធ្វើ​ដំណើរ​ទៅដល់​ទីតាំង​កើតហេតុ​គឺ​លោក Oleksiy Kucher បានឱ្យដឹងថា​មុន​ពេលដែល​យន្តហោះ​ធ្លាក់​អ្នកបើកបរ​យន្តហោះ​បាន​រាយការណ៍​ថា​បាន​គាំង​នៅក្នុង​ម៉ាស៊ីន​ខាងឆ្វេង​ប៉ុន្តែ​អះអាងថា​នេះ​មិនមែនជា​បញ្ហា​ខ្លាំង​សម្រាប់​អ្នកបើក​យន្តហោះ​ដែល​ពោរពេញ​ទៅដោយ​បទពិសោធ​ឡើយ​ហើយ​បញ្ជាក់ថា ការស៊ើបអង្កេត​នឹង​បន្តធ្វើ​បន្ថែមទៀត។

របាយការណ៍​ដដែល​បាន​បញ្ជាក់ថា​យន្តហោះ​យោធា​ប្រភេទ An-26 នៃ​កងកម្លាំង​ទ័ពអាកាស​អ៊ុយ​ក្រែ​ន​បាន​ប៉ះទង្គិច​នៅពេលដែល​ព្យាយាម​ចុះចត​នៅឯ​អាកាសយានដ្ឋាន​នៃ​ទីក្រុង Chuguev ខណៈ​ដែលមាន​មនុស្ស​សរុប២៨នាក់​បានរួម​ដំណើរ​ដែល​ភាគច្រើន​សុទ្ធតែជា​និស្សិត​នៃ​សកល​វិទ្យាល័យ​យោធា​ជាតិ Kharkov៕